Təbriz Musayev: “Azərbaycan Ermənistanla sülh sazişi imzalayacaq, amma onun ratifikasiyasını sonrakı dövrə saxlayacaq”
Məlum olduğu kimi, Ermənistanda parlament seçkiləri başa çatıb. Mərkəzi Seçki Komissiyasının iyunun 8-də açıqladığı ilkin nəticələrə görə, Baş nazir Nikol Paşinyanın “Vətəndaş Müqaviləsi” partiyası 49,81 faiz səs toplayaraq parlamentdə çoxluğu qoruyub. Bu nəticə hakim partiyaya təkbaşına hökumət formalaşdırmaq imkanı verir.
Bununla belə, Paşinyanın partiyası parlamentdə Konstitusiya dəyişiklikləri üçün tələb olunan üçdə iki səs çoxluğunu əldə edə bilməyib. Məsələ ondadır ki, Azərbaycan sülh sazişinin imzalanması üçün Ermənistandan Konstitusiyasından Qarabağla bağlı hissəni çıxarmasını tələb edir. Bunun üçün isə Paşinyana parlamentdə üçdə iki səs çoxluğu lazımdır. Bu, o deməkdir ki, özü konstitusiyada islahatlar apara bilməyəcək. Ermənistanda Konstitusiya dəyişikliyi etmək üçün 105 nəfərlik parlamentdə 70 səs lazımdır. Hazırda Paşinyanın bu qədər səsi yoxdur, 6 səs çatmır. O zaman Azərbaycanın tələb etdiyi Konstitusiyadan Qarabağla bağlı məsələnin çıxarılması necə olacaq?
Sözügedən məsələyə aydınlıq gətirən İrəvan Azadlıq Təşkilatının sədri Təbriz Musayev baki-xeber.com-a açıqlamasında bildirdi ki, burada bəzi variantlardan istifadə edilə bilər: “Həqiqətən də Azərbaycan üçün əsas məsələ Konstitusiya dəyişikliyidir. Konstitusiya dəyişikliyi məsələsi seçkilərdən əvvəl də gündəmdə idi. Sözügedən məsələ həm daxili səbəblərdən, həm də regionda formalaşan yeni reallıqlar kontekstində yenidən gündəmdədir. Təbii ki, məsələnin bir də Azərbaycan tərəfi var. Rəsmi Bakı sülh sazişinin tam imzalanması kontekstində Ermənistan Konstitusiyasında Azərbaycana qarşı ərazi iddiaları ilə əlaqələndirilən müddəaların dəyişdirilməsini hələ də vacib şərt olaraq görür. Ancaq göründüyü kimi, Paşinyanın partiyası parlamentdə Konstitusiya dəyişiklikləri üçün tələb olunan üçdə iki səs çoxluğunu əldə edə bilməyib. Heç şübhəsiz parlamentdə təmsil olunan iki Rusiyaya bağlı revanşist partiya bu məsələdə Paşinyana kömək etməyəcəklər. Ya gərək Paşinyan müxalifətin 5 deputatını öz tərəfinə çəksin, ya da başqa variantlar nəzərdən keçirilməlidir. Referendum keçirmək elə də asan deyil. Ola bilsin ki, bununla bağlı Ermənistan qanunvericiliyində hansısa dəyişikliklər edilsin. Ya da ola bilər ki, Azərbaycan Ermənistanla sülh sazişi imzalayacaq, amma onun ratifikasiyasını sonrakı dövrə saxlayacaq. Yəni nə vaxt Ermənistanda Konistitusiya ilə bağlı referendum keçirilsə, o zaman Azərbaycan sülh sazişini ratifikasiya edəcək. Hesab edirəm ki, həll variantlarından biri bu da ola bilər. Məlumata görə, bu ayın sonunda Paşinyanla Prezident Əliyev görüşə bilər. Hər halda bununla bağlı ortaq məxrəcin tapılacağını güman edirəm”.
Vidadi ORDAHALLI
