Məlum olduğu kimi, Ermənistanda keçirilən parlament seçkilərində Nikol Paşinyanın rəhbərlik etdiyi “Vətəndaş Müqaviləsi” partiyası qalib gəlib. Erməni politoloq Karen İqityan iddia edir ki, parlament seçkilərində müxalif qüvvələrin səylərinə baxmayaraq seçki baryerini keçə bilməyən partiyalar faktiki olaraq Nikol Paşinyanın və onun rəhbərlik etdiyi “Vətəndaş Müqaviləsi” partiyasının qələbəsinə şərait yaradıb.
Onun sözlərinə görə, Ermənistan qanunvericiliyinə əsasən, partiyalar üçün seçki baryeri 4 faiz təşkil edir. Bu həddi 15 siyasi partiya keçə bilməyib və onların topladığı səslər parlamentə düşən qüvvələr arasında proporsional şəkildə bölüşdürüləcək: “Parlamentə düşə bilməyən 15 siyasi qüvvə seçici səslərinin parçalanmasına səbəb oldu. Nəticədə həmin səslər faktiki olaraq Nikol Paşinyanın qələbəsinə kömək etdi”. Karen İqityan iddia edir ki, əvvəlki seçkilərdən fərqli olaraq, bu dəfə əsas müxalif qüvvələr bir-biri ilə mübarizə aparmaq əvəzinə fərqli seçici qrupları ilə işləməyə çalışıblar. Onun fikrincə, müxalifət birlikdə səslərin yarıdan çoxunu toplaya bilsəydi, parlamentdə yeni koalisiyanın formalaşması mümkün olardı. Qeyd edək ki, Ermənistan Mərkəzi Seçki Komissiyasının yekun nəticələrinə əsasən, Nikol Paşinyanın rəhbərlik etdiyi “Vətəndaş Müqaviləsi” partiyası 49,81 faiz səslə seçkilərin qalibi olub. İkinci yeri rusiyalı oliqarx Samvel Karapetyanın rəhbərlik etdiyi “Güclü Ermənistan” partiyası 23,29 faiz səslə tutub. Keçmiş prezident Robert Köçəryanın rəhbərlik etdiyi “Ermənistan” bloku isə 9,94 faiz səslə üçüncü olub. Amma görünən odur ki, Paşinyan indi müxalif deputatları da öz tərəfinə çəkmək üçün hərəkətə keçəcək. “İşıqlı Ermənistan” partiyasının lideri Edmon Marukyan bildirir ki, Ermənistan hakimiyyətinin əlində parlamentə daxil olan müxalifət qüvvələrindən bəzi şəxslərə qarşı ittihamedici dəlillər var: “Seçkilərin qalibi olan Paşinyan parlamentdə konstitusiya çoxluğunu təmin etməsə belə, müxalifət düşərgəsindən bir çox millət vəkilini öz tərəfinə çəkə biləcək. Müxalifət siyahılarında çoxlu “həssas” insan var və bu özünü hiss etdirəcək. Xalq bir daha indiki ilə əvvəlkilər arasında seçim etdi və bu, siyasi sahənin “səhralaşması”na gətirib çıxarır. Xalqımız, mahiyyət etibarilə, siyasi səhraya səs verib. Yeni parlament indikindən daha pis olacaq. Bu, deqradasiyanın son mərhələsidir. Siyasi ideyalar irəli sürən bir dənə də olsun siyasi qüvvə parlamentə daxil olmadı”.
Samirə SƏFƏROVA
