Əli Orucov: “Xristian amili, korporativ səbəblər və digər faktorlar üzündən Rusiyaya münasibətdə bənzər mövqe sərgilənmədi”
“Reuters” Agentliyinin yaydığı məlumata görə, Vaşinqton administrasiyası İranın vura biləcəyi ziyanın ödənilməsi üçün Fars körfəzi ölkələrindən olan müttəfiqlərinə İranın aktivlərinə çıxış imkanı vermək niyyətindədir: “ABŞ İranın vuracağı ziyanın aradan qaldırılması, bərpası və dəstəklənməsi üçün Fars körfəzindəki müttəfiqlərinə bu ölkənin aktivlərini təqdim edəcək”.
ABŞ rəhbərliyi eyni zamanda “artıq dəymiş ziyanın qarşılanması üçün” də İran aktivlərindən istifadə edilməsi imkanlarını nəzərdən keçirəcək. ABŞ Maliyyə naziri Skott Bessent mütəxəssislərə İranın sözügedən dövlətlərə nə qədər ziyan vurduğunu qiymətləndirməyi tapşırıb. Söhbətin konkret olaraq hansı İran aktivlərindən getdiyi isə hələ açıqlanmır.
Maraqlıdır ki, bundan əvvəl Ukraynada gedən müharibə ilə əlaqədar Rusiyanın aktivlərinin müsadirə edilməsi gündəmə gəldi və bu, çox ciddi mübahisələrə səbəb oldu. O cümlədən, ABŞ buna dəstək vermədi. Nəticədə heç bir qərar qəbul edilmədi. Ancaq İranla bağlı məsələdə ABŞ dərhal belə bir qərar verir. Beynəlxalq müstəvidə dondurulmuş aktivlərə münasibətdə belə ayrı-seçkilik nə ilə izah edilə bilər? Rusiya aktivlərinin dondurulmasına ABŞ dəstək vermir, amma İrana gəldikdə həmən bu variantın işə salınması ilə bağlı təkliflər verilir.
Sözügedən məsələyə aydınlıq gətirən AMİP funksioneri Əli Orucov baki-xeber.com-a açıqlamasında bunu ikili standartlar və subyektiv amillərlə əlaqələndirdi: “Əfsuslar olsun ki, bu gün bir sıra səbəblərdən beynəlxalq siyasətdə ikili standartlar hökm sürür. Bunu deməkdə məqsədim heç də İrandakı molla rejiminə haqq qazandırmaq deyil. Sadəcə mövcud real mənzərə bu qənaətə gəlməyə əsas verir. Xristian amili, korporativ səbəblər və digər faktorlar üzündən Rusiyaya münasibətdə bənzər mövqe sərgilənmədi. Yəni Rusiya aktivlərinin müsadirə edilməsinə nəinki Birləşmiş Ştatlar, başda Belçika olmaqla bir sıra Avropa İttifaqı ölkələri də dəstək vermədilər. Halbuki, Rusiyanın Ukraynada törətdiyi dağıntılar, Ukraynaya vurduğu ziyan İranın 40 günlük müharibə dönəmində etdikləri ilə müqayisədə qat-qat böyükdür. O dərəcədə arada böyük fərq var. Üstəlik, İran 40 ildən çoxdur sanksiyalar altındadır. Bunun əziyyətini də daha çox molla rejiminin istibdadı, zülmü altında olan xalq çəkir. Sadəcə Tramp belə istəyir. Tramp Rusiyanın cəzalandırılmasını, Ukraynaya təcavüzə görə kompensasiya ödənilməsini istəmir. Hesab edirəm ki, başlıca səbəb bununla bağlıdır. Beynəlxalq hüquq işləmədikcə belə halların miqyası daha da genişlənəcək”.
Vidadi ORDAHALLI
