Zaur İbrahimli: “Erməni cəmiyyəti sülhü seçməklə öz müstəqil dövlətçiliyini qorumağı seçdi, vassal taleyindən imtina etdi”
Ermənistanda iyunun 7-də keçirilən parlament seçkiləri başa çatdı. Erməni xalqı növbəti dəfə Baş nazir Nikol Paşinyanın rəhbərlik etdiyi "Vətəndaş müqaviləsi" partiyasına səs verdi. Ermənistan MSK-nın son məlumatına görə, seçicilərin 727 min 160 nəfəri hakim partiyaya səs verib. Bu isə 49.82 faiz deməkdir.
Ermənistan qanunlarına əsasən, qalib gələn qüvvə parlamentdəki yerlərin ən azı 52 faizini əldə etməlidir. Əgər bir partiya səs çoxluğu qazanarsa, lakin mandat bölgüsündə bu 52 %-lik baryerə çata bilməzsə, ona qanunvericilik tərəfindən avtomatik olaraq əlavə (bonus) mandatlar verilir. Seçkidə iştirak edən, lakin 4 %-lik (partiyalar üçün) və 8 %-lik (bloklar üçün) minimal səs həddini keçə bilməyən çoxsaylı kiçik partiyaların səsləri qanuna (D'Hondt metoduna) əsasən ləğv edilir və onların faizləri parlamentə daxil olan əsas 3 qüvvə arasında mütənasib şəkildə bölünür. Məhz bu iki amilə görə, Paşinyanın partiyası real səsvermədə 49,82% toplasa da, yekun mandat bölgüsündə parlamentdəki minimum 101 əsas yerdən 64 mandat (təxminən 63,3%) əldə edir. Bu isə o deməkdir ki, "Vətəndaş müqaviləsi" hökuməti təkbaşına qura biləcək. Müxalif “Güclü Ermənistan” və “Ermənistan” blokları isə müvafiq olaraq 29 və 12 yer (ümumilikdə 41 yer) qazanıb.
Bütün bu deyilənlərin fonunda, Ermənistanda bundan sonra proseslər siyasi və hüquqi müstəvidə necə davam edəcək?
Sözügedən məsələni baki-xeber.com-a şərh edən politoloq Zaur İbrahimlinin fikrincə, bu, o deməkdir ki, erməni cəmiyyəti sülhə səs verdi: “Ermənistan cəmiyyəti bu seçimi etməklə revanşist ideyaları ən azı tarixin indiki mərhələsində aktual saymadığını nümayiş etdirdi. Baş nazir Paşinyan məhz fəal şəkildə sülh təşəbbüsləri ilə çıxış etməklə, cəsarətli şüarlar səsləndirəndən, Azərbaycanla, Türkiyə ilə kommunikasiyaların açılması təşəbbüsləri, ticarət başlanandan sonra onun elektoral dəstəyi sürətlə artmağa başladı. Erməni cəmiyyəti bu təşəbbüslərə, şüarlara, sülhə səs verdi. Bu düşüncə dəyişikliyi əsasən Azərbaycanın sülh diplomatiyası ilə möhkəmləndi. Azərbaycan Prezidentinin irəli sürdüyü təkliflərlə başlayan sülh gündəliyi uzun müddət davam edən güclü müqavimətdən sonra yeganə real doğru seçim kimi ilk olaraq erməni elitası tərəfindən, daha sonra isə cəmiyyət tərəfindən qəbul edildi, dərk olundu. Üç il əvvəl isə indiki hakim komanda tam fərqli mövqedən çıxış edirdi. ABŞ fərqli prizmadan yanaşırdı, Brüssel, Aİ ayrıcı xətlər çəkirdi. Yaxın keçmişə baxanda Azərbaycanın, Prezident İlham Əliyevin sülh uğrunda necə əzmlə mübarizə apardığı daha aydın görünür. Bütün təzyiqlərə, vədlərə baxmayaraq Azərbaycan rəhbərliyi real, dayanıqlı sülh perspektivini güzəştə, getmədi, sülh gündəliyini qorudu. Bu gün Paşinyan məhz Azərbaycanın qoruduğu, irəli apardığı sülh gündəliyi ilə qalib gəlir. Əlbəttə zərərin yarısından qayıtmaq da xeyirdir. Erməni cəmiyyəti sülhü seçməklə ilk növbədə öz müstəqil dövlətçiliyini qorumağı seçdi, vassal taleyindən imtina etdi. Azərbaycanın əsas gözləntisi seçkilərdən dərhal sonra Ermənistan rəhbərliyinin Qarabağ separatçılarının, bu cinayətkarların bütün tör-töküntülərinin rəsmi olaraq təmizlənməsidir. Xarici nümayəndəliklər bağlanmalıdır, bütün maliyyələşdirmə, dəstək göstərilməsi dayandırılmalıdır. Ermənistan hökumətinə məxsus bütün növ əmlak geri alınmalıdır. Diasporaya açıq mesaj verilməlidir ki, Qarabağ separatçılarının, bu cinayətkarların tör-töküntülərinin hansısa formada dəstəklənməsi dövlətə, hakimiyyətə qarşı addım kimi qiymətləndiriləcək və adekvat reaksiya veriləcək. Bu, həmçinin erməni cəmiyyətinin real olaraq yeni tarixi səhifə açmaqda qərarlı olmasının bariz əlaməti olacaq”.
Vidadi ORDAHALLI
