Elşad Həsənov: “Belə bir şəraitdə Qaluzinin dediyi formada kommunikasiyaların açılması mümkün deyil”
Moskva Cənubi Qafqazda nəqliyyat kommunikasiyalarının tam açılmasını dəstəkləyir. Bunu Rusiyanın xarici işlər nazirinin müavini Mixail Qaluzin Sankt-Peterburqda keçirilən beynəlxalq iqtisadi forum çərçivəsində təşkil olunmuş “3+3 Platforması: ümumi çağırışlar və strateji tərəfdaşlıq” sessiyasında bəyan edib.
Onun sözlərinə görə, regionda nəqliyyat kommunikasiyalarının açılması “3+3” formatının tam fəaliyyət göstərməsi üçün zəruridir: “Ermənistanın Azərbaycan və Türkiyə ilə sərhədləri, eləcə də Gürcüstanın Abxaziya və Cənubi Osetiya ilə sərhədləri açılmadan tamhüquqlu nəqliyyat əlaqələrindən danışmaq mümkün deyil. Hesab edirik ki, bu nə qədər tez baş versə, regionun bütün iştirakçıları bir o qədər çox logistik imkanlar əldə edəcəklər”.
Burda diqqət çəkən məqam odur ki, Rusiya separatçı bölgələri də prosesə urcah etmək istəyir. Abxaziya və Cənubi Osetiya ilə sərhədlər necə açıla bilər ki, bu regionlar Gürcüstanın nəzarətində deyil?
Sözügedən məsələni baki-xeber.com-a şərh edən siyasi ekspert Elşad Həsənovun fikrincə, Qaluzinin nə deməsindən asılı olmayaraq reallıq fərqlidir: “Reallıq ondan ibarətdir ki, 3+3 formatı ümumiyyətlə işləmədi. Ona görə ki, Gürcüstan ora qoşulmadı, bir sıra açıq qalan məsələlər öz həllini tapmadı. Xüsusən də Cənubi Osetiya və Abxaziya ilə bağlı məsələ, Gürcüstan üçün ən həssas məsələdir. Belə bir şəraitdə Qaluzinin dediyi formada kommunikasiyaların açılması mümkün deyil. Çünki Rusiya bu iki regionu işğal edib. Belə olan halda Abxaziya və Cənubi Osetiyadan keçən yollar necə açıla bilər? Bunun yolu yalnız ondan ibarətdir ki, həmin regionlar Gürcüstana qaytarılsın. Gürcüstan dəfələrlə BMT Təhlükəsizlik Şurasında məsələ qaldırıb, amma hələ də bu, öz həllini tapmır. Hesab edirəm ki, gələcəkdə Gürcüstan öz torpaqlarını işğaldan azad etdikdən sonra Cənubi Qafqazda nəqliyyat-kommunikasiya yolları tam açılacaq. Rusiya anlamalıdır ki, qonşu dövlətlərin suverenliyinə və ərazi bütövlüyünə hörmət etmədən sağlam, effektiv əməkdaşlıq platforması qurmaq mümkün deyil. O cümlədən, Rusiya Ermənistanda keçirilən seçkilərin nəticələrini də nəzərə almalıdır. Erməni seçiciləri sülhə səs verdilər. Hakim partiyaya, daha dəqiq desək Paşinyana yenidən etimad göstərmək bunun göstəricisi idi. Fikrimcə, bu amil Rusiyanın Cənubi Qafqaza təzyiq göstərmək imkanlarını azaldacaq. Yox əgər seçkilərdə bunun revanşistlər qalib gəlsəydi, bunun əksi baş verərdi. Hesab edirəm ki, bunun baş verməməsi Cənubi Qafqazın xeyrinə oldu. Ən nəhayət, Rusiya Ukrayna ilə müharibədə ciddi məğlubiyyətə uğrasa, Gürcüstanın da öz ərazi bütövlüyünü bərpa etməsinə ümidlər artacaq”.
Vidadi ORDAHALLI
