Azər Həsrət: “Erməni cəmiyyətinin düşünən kəsimi anladı ki, əgər seçkidə fəallıq göstərməsə revanşistlər irəli çıxa bilər”
Ermənistanda başa çatan parlament seçkilərində seçici fəallığı ilə bağlı rəsmi statistika açıqlanıb. Ölkənin Mərkəzi Seçki Komissiyasının məlumatına görə, səsvermə hüququ olan 2 milyon 503 min 976 vətəndaşdan 1 milyon 476 min 597-si seçkilərdə iştirak edib. Bu göstərici ilə Ermənistanda ümumi seçici fəallığı 58,97% təşkil edib.
Bütün bunlar onu göstərir ki, seçkilərdə seçki fəallığı əvvəlki illərlə müqayisədə xeyli artıb. Məlumat üçün qeyd edək ki, 2018-ci ilin dekabrında keçirilən seçkilərdə seçici fəallığı 48 faizdən yüksək olub. 2021-ci ilin iyun ayında keçirilən parlament seçkilərində isə seçici fəallığı 49,4 faiz olub. Bu dəfə seçici fəallığının bu qədər yüksək olmasının səbəbi nədən irəli gəlir?
Sözügedən məsələyə aydınlıq gətirən siyasi şərhçi Azər Həsrət baki-xeber.com-a açıqlamasında Ermənistanda seçici fəallığının artmasını bir sıra amillərlə əlaqələndirdi: “Zaman keçdikcə erməni seçicisi anlayır ki, ölkəsinin ölüm-qalım mübarizəsi gedir və bu mübarizədə mütləq o da iştirak etməlidir. Əks təqdirdə Ermənistan yenidən Rusiyanın qucağına yuvarlanacaq. Bununla da erməni dövlətçiliyi faktiki olaraq iflasa uğramış olacaq. Ona görə də Ermənistan vətəndaşları bu dəfə daha fəal şəkildə seçkidə iştirak etdilər. O cümlədən, səslərin çoxu Paşinyana verilib. Özü də mütləq üstünlük əldə edib. Demək istədiyim odur ki, fəallıq Ermənistan dövlətini mümkün vasitələrlə qorumaq istəyindən irəli gəlir. Hamımızın gözü qarşısında Rusiyanın uzantıları olan Samvel Karapetyan və Robert Köçəryanın siyasi qüvvələri meydanda idi. Onlar yekdilliklə erməni cəmiyyətinin səslərini almaq istəyirdilər, amma alınmadı Erməni cəmiyyətinin düşünən kəsimi anladı ki, əgər seçkidə fəallıq göstərməsə revanşistlər irəli çıxa bilər. Bu da Ermənistanın dövlət kimi iflasına gətirib çıxara bilər. Fikrimcə, seçki fəallığının bu dəfə belə yüksək olması sırf bununla bağlıdır. Rusiyaya fürsət verməməkdən ötrü indiyə qədər passiv mövqedən çıxış edən seçicilər seçki məntəqələrinə getdilər. Reallıq odur ki, Ermənistan öz yolunu seçir. Bu yol Rusiyadan uzaqlaşmaq yoludur. Aralı durmaq, ümumiyyətlə qopmaq yoludur. Ermənilərin də böyük əksəriyyəti artıq Rusiyadan qopma yolunun, ən doğru yol olduğunu qəbul edir. Eyni zamanda Azərbaycan və Türkiyə münasibətlərin normallaşmasının Ermənistanın və erməni tək nicat yolu olduğunu qəbul edirlər. Bütün bu səbəblərdən belə yüksək seçici fəallığı müşahidə edilib”.
Vidadi ORDAHALLI
