7 iyun 2026-cı ildə Ermənistanda baş tutan parlament seçkilərində baş nazir Nikol Paşinyan qalib gəldiyini elan edib və bildirib ki, “Vətəndaş Müqaviləsi” Partiyası seçkilərdə qalib gəldi və hökuməti təkbaşına quracaq: “2021-ci illə müqayisədə “Vətəndaş Müqaviləsi” Partiyası daha çox səs və etimad səsi aldı. Bu, bir məsuliyyətdir və vətəndaşların dövlət, azadlıq, gələcək və sülh üçün məsuliyyət daşıması deməkdir".
Mərkəzi Seçki Komissiyasının hələ səslərin sayılmasını başa çatdırmadığını nəzərə alsaq, qələbəni necə müəyyən etdiyinə dair suala cavab olaraq Paşinyan partiyanın bütün seçki məntəqələrində etibarlı nümayəndələrinin olduğunu bildirib: "Biz artıq nəticələri hesablamışıq".
Paşinyan bildirib ki, Ermənistandakı parlament seçkilərinin nəticələri ictimaiyyətin sülhə və regional əməkdaşlığa dəstəyini nümayiş etdirir: "Türkiyə və Azərbaycan cəmiyyətlərinə mesajım: Ermənistan xalqı sülhə və regional əməkdaşlığa səs verdi". O, Türkiyə və Azərbaycandan müsbət cavab gözlədiyini bildirib. Baş nazir vurğulayıb ki, Ermənistan və Azərbaycan arasında sülhün təsis edilməsi, eləcə də Türkiyə ilə münasibətlərin normallaşdırılması əsas vəzifə olaraq qalır: "Ermənistan və Azərbaycan arasında sülhün təsis edilməsi və Türkiyə ilə sərhədlərimizin açılması lazımdır. Yəni Türkiyə sərhədi açmalıdır. Diplomatik münasibətlər qurmalıyıq". Paşinyan həmçinin Axalkalaki-Qars dəmir yolu xəttini Ermənistan malları üçün açdığına görə Türkiyəyə təşəkkür edib: "Türkiyə ilə çox yaxşı dinamikamız var. Hələlik razıyıq, amma son irəliləyiş - diplomatik münasibətlərin qurulması və sərhədlərin tam açılması üçün bu tempi davam etdirməliyik". Azərbaycanla münasibətlərdən danışan Paşinyan sülh müqaviləsinin mümkün qədər tez imzalanmasının vacibliyini vurğulayıb: "Sülh müqaviləsi imzalamalıyıq. Həmçinin, regionda oyun qaydalarını dəyişdirəcək TRIPP layihəsini mümkün qədər tez başlatmalıyıq. Regionumuzun blokadası aradan qaldırılacaq, çünki o, ölü nöqtədən yol ayrıcına çevriləcək".
Paşinyan bildirib ki, Ermənistanda cinayətkar-oliqarxik sistem tamamilə məhv edilməlidir: "Bu qüvvələrin liderləri sizə məlum olan işlər üçün Ermənistan qanunvericiliyi ilə müəyyən edilmiş prosedurlara uyğun olaraq cinayət məsuliyyətinə cəlb edilməlidir. Cinayətkar oliqarxiya çox tez bir zamanda aktivlərindən məhrum edilməlidir. Bu, qanunsuz aktivlərin müsadirə edilməsi, cinayət məsuliyyətinə cəlb edilməsi və dövlət maraqlarının qorunması yolu ilə həyata keçiriləcək. Bunlar siyasi qüvvələr deyil, cinayətkar-oliqarxik sistemin nümayəndələridir. Onlar Ermənistanda fəaliyyət göstərməməlidirlər".
Daha öncə Paşinyan müxalifət liderləri Robert Köçəryanı, Samvel Karapetyanı və Qaqik Tsarukyanı cinayətlərdə ittiham edərək, onları cinayət məsuliyyətinə cəlb etməklə hədələyib.
Tahir TAĞIYEV
