Hüseyn İbrahimov: “Uğurlu xarici siyasəti və enerji diplomatiyası sayəsində enerji resurslarımız dünya bazarına çıxır”
Prezident İlham Əliyev 31-ci “Baku Energy Forum”un rəsmi açılış mərasimində çıxışı zamanı bildirib ki, bütün bu nailiyyətlər yüksəksəviyyəli diplomatik fəaliyyət nəticəsində mümkün olmuşdur:
“Çünki Azərbaycan dənizə birbaşa çıxışı olmayan ölkədir. Bizim dünya okeanlarına çıxışımız yoxdur. Bu səbəbdən enerji resurslarımızı ixrac etmək üçün digər ölkələrin ərazisindən keçmək zərurəti yaranır. Buna nail olmaq üçün isə yalnız qonşularınızla deyil, qonşularınızın qonşuları ilə də yaxşı münasibətlər qurmalısınız. Biz buna nail olmuşuq. Bu gün Cənub Qaz Dəhlizi və onun genişləndirilmiş marşrutları vasitəsilə Azərbaycanın qazı 16 ölkəyə çatdırılır. Bu ölkələrin hər biri ilə danışıqlar aparmışıq, sazişlər imzalamışıq, fikir ayrılıqlarını aradan qaldırmışıq və imzalanma mərasimləri təşkil etmişik. Nəticədə geniş mənada regional əməkdaşlığın çoxşaxəli və əhatəli formatı meydana gəlmişdir”.
Sözügedən məsələni baki-xeber.com-a şərh edən İdarəçilik Akademiyasının müəllimi, sosioloq Hüseyn İbrahimovun fikrincə, Azərbaycanın uğurlu xarici siyasəti və enerji diplomatiyası sayəsində enerji resurslarımız dünya bazarına çıxır: “Bəli bütün bunlar asan başa gəlməyib. Qonşu dövlətlərlə aparılan hərtərəfli iş sayəsində mümkün olub. Azərbaycanın enerji strategiyasının əsası Ümummilli Lider Heydər Əliyevin rəhbərliyi ilə qoyulub. 1994-cü ildə imzalanmış “Əsrin müqaviləsi” ölkənin enerji sektorunda yeni dövrün başlanğıcını qoyub. Bu, xarici investisiyaların cəlb edilməsinə və enerji ehtiyatlarının dünya bazarlarına çıxarılmasına imkan yaradıb. Sonrakı illərdə bu siyasət Prezident İlham Əliyev tərəfindən uğurla davam etdirilib. Enerji diplomatiyası daha da gücləndirilib. Bu baxımdan Cənub Qaz Dəhlizi layihəsi Azərbaycanın təşəbbüsü ilə həyata keçirilmiş nəhəng enerji layihəsidir. Layihənin əsas məqsədi Xəzər dənizində yerləşən zəngin qaz yataqlarından hasil olunan təbii qazın beynəlxalq bazarlara, xüsusilə Avropa ölkələrinə çatdırılması olub. Cənub Qaz Dəhlizi əsas tranzit və təyinat xətti olaraq 6 ölkənin (Azərbaycan, Gürcüstan, Türkiyə, Yunanıstan, Albaniya və İtaliya) ərazisindən keçir. Layihənin genişləndirilməsi və yeni interkonnektorlar sayəsində təbii qazın çatdırıldığı ölkələrin sayı artıq 16-ya çatıb. Nəzərə alsaq ki, Cənubi Qafqazda bir sıra dövlətlərin geosiyasi maraqları toqquşur, belə bir uğurun əldə edilməsinin nə qədər böyük məharət tələb etdiyini ortaya qoyur. Bir vaxtlar Azərbaycanın enerji layihələrinə şübhə ilə yanaşanlar, bu gün tamam fərqli mövqedən çıxış edirlər. Azərbaycanla yanaşı, Mərkəzi Asiya ölkələri də bu kəmərlərdən istifadə edir”.
Vidadi ORDAHALLI
