Avropa İttifaqı (Aİ) Rusiyanın tətbiq etdiyi iqtisadi məhdudiyyətlər səbəbindən çətin problemlərlə üzləşən Ermənistanı qorumaq və onu öz bazarına inteqrasiya etmək üçün hərəkətə keçib.
Ermənistan mediasının Brüssel mənbələrinə istinadən verdiyi məlumata görə, Aİ Moskvanın iqtisadi təzyiqlərinə qarşı İrəvana dəstək paketi təklif edəcək.
Məlumatlara görə, Avropa İttifaqı Ermənistan iqtisadiyyatını sabitləşdirmək üçün "Muxtar Ticarət Tədbirləri" mexanizmini aktivləşdirməyə hazırlaşır. Bu xüsusi ticarət rejimi çərçivəsində müəyyən seçilmiş Ermənistan mənşəli məhsulların heç bir gömrük rüsumu və ya kvota məhdudiyyəti olmadan Avropa bazarına daxil olmasına icazə veriləcək.
Bundan başqa ticarətin asanlaşdırılması ilə yanaşı, İrəvan üçün birbaşa maliyyə dəstəyi paketi də müzakirə olunacaq. Aİ-nin Ermənistana əhəmiyyətli maliyyə yardımı göstərməyə hazırlaşdığı bildirilsə də, maliyyə dəstəyinin dəqiq məbləği üzərində işlərin davam etdiyi və xalis rəqəmin hələ müəyyən edilmədiyi bildirilib.
Qeyd edək ki, Ermənistan 7 iyunda keçiriləcək parlament seçkilərinə hazırlaşarkən, Avropa İttifaqı ilə İrəvan arasındakı yaxınlaşmaya qarşı çıxan Rusiya, diplomatik və iqtisadi manevrlərlə onsuz da gərgin olan ikitərəfli münasibətləri böhran həddinə çatdırıb.
Rusiya prezidenti Putin və Rusiyanın rəhbərlik etdiyi Avrasiya İqtisadi Birliyinin (AİB) üzv dövlətləri İrəvanı "mümkün qədər tez" Aİ və AİB arasında seçim etmək üçün referendum keçirməyə çağırıblar.
Qazaxıstanın paytaxtı Astanada keçirilən Avrasiya İqtisadi Birliyinin (AAİB) zirvə toplantısında Rusiya, Belarus, Qazaxıstan və Qırğızıstan birgə bəyanat yayaraq Ermənistanın Aİ-yə üzvlük istiqamətində atdığı addımların AİB-in iqtisadi təhlükəsizliyinə təhlükə yaratdığını bildiriblər. Dörd ölkənin liderləri Ermənistanı AİB-də qalmaq və ya Aİ-yə qoşulmaq barədə "mümkün qədər tez" referendum keçirməyə çağırıblar.
Zirvə görüşündən sonra açıqlama verən Putin bildirib ki, əgər Ermənistan Aİ-yə qoşulmağı seçsə, AİB-in bütün imtiyazlarından məhrum olacaq. Putin İrəvanın bu addımını "Ukraynanın keçmişi" ilə müqayisə edib: "Ukraynadakı böhran bir vaxtlar həmin ölkənin AB-yə qoşulmaq cəhdləri ilə başladı. Biz buna qarşı deyildik, amma proses çevrilişə və münaqişəyə çevrildi".
Bu açıqlamalardan sonra, mayın 30-da Moskva Ermənistanın Moskvadakı səfiri Sergey Kopırkini "məsləhətləşmələr üçün" geri çağırdığını açıqlayıb.
Avropa İttifaqı isə Rusiyanı Ermənistan seçkilərinə müdaxilə etməkdə ittiham edib. Aİ sözçüsü Anuar El Anouni Rusiyanın Ermənistanın suveren hüquqlarını pozduğunu iddia edib.
Tahir TAĞIYEV
