"Rosselxoznadzor" iyunun 3-dən Rusiyaya ixrac edilən və Rusiya vasitəsilə digər Aİİ ölkələrinə göndərilən bir sıra Ermənistan məhsullarına yeni məhdudiyyətlər elan edib. Bu, xüsusilə Ermənistandan göndərilən kartof, badımcan və quru meyvələrə aiddir. Qurumun bildirdiyinə görə, məhdudiyyətlər göndərilən malların təhlükəsizliyini təmin etmək üçün aydın bir alqoritm hazırlanana qədər qüvvədə qalacaq.
Ermənistanda 7 iyun parlament seçkiləri öncəsi Rusiya keyfiyyət uyğunsuzluqlarını əsas gətirərək bu ölkədən bir sıra malların bazara girişini məhdudlaşdırıb. Ermənistan baş naziri Nikol Paşinyan bildirib ki, hökumət Rusiyanın son qadağalarından zərər çəkmiş və haqsızlıqla üzləşmiş bizneslərə subsidiya ayıracaq. Baş nazir deyib ki, alternativ bazarlara ixrac məsələsi ilə bağlı biznes nümayəndələri ilə görüş keçirilib və razılaşmalar əldə edilib: "Bəzən keyfiyyət standartlarına cavab verməyən məhsullar olur. Biz həmin iş adamlarına məhsullarını yeni standartlara uyğunlaşdırmaqda dəstək verəcəyik. Bibər xarab olacaq - mən o bibərin pulunu ödəyəcəyəm, hökumət ödəyəcək. Lakin bütün bunların nəticəsində Ermənistanda həm bibər istehsalı, həm də ixrac artacaq. İxraca haqsız maneələrin olduğu bütün hallarda dəstək və subsidiya proqramları həyata keçiriləcək. Əgər başqalarına qarşı ədalətsizlik olubsa – yəni ixrac edilməli olduğu halda, ixrac olunmayan məhsullar varsa – onlar üçün də dəstək və subsidiya proqramları həyata keçirəcəyik".
Ermənistanda parlament seçkiləri ərəfəsində Rusiya bir sıra erməni mallarının keyfiyyət standartlarına cavab vermədiyini əsas gətirərək onların bazarına girişini məhdudlaşdırıb. Rəsmi Moskva, demək olar ki, hər gün Ermənistana xatırladır ki, ölkə eyni vaxtda həm Avropa İttifaqı ilə münasibətlərini dərinləşdirə, həm də Avrasiya İqtisadi İttifaqında (Aİİ) qala bilməz. Aİİ-nin digər üzvləri – Belarus, Qazaxıstan və Qırğızıstan liderləri Rusiya prezidenti Vladimir Putinə qoşularaq Ermənistanda referendum keçirilməsinə çağırırlar. Paşinyan iyunun 1-də Ermənistanın Rusiya, Belarus, Qazaxıstan və Qırğızıstanla birlikdə Aİİ-də qalacağını bildirib: "Avrasiya İqtisadi İttifaqında sakit, dinc, əsəbsiz və mübahisəsiz işləməyə davam edəcəyik. Əminəm ki, bu istiqamətdə hələ də potensialımız var və yaxın gələcəkdə bundan yararlanacağıq".
Samirə SƏFƏROVA
