Bəhruz Quliyev: “Əldə edilən gəlirlər məqsədyönlü şəkildə müdafiə potensialının güclənməsinə yönəldildi”
“Biz milli maraqlar üzərində dayanan çox praqmatik siyasət həyata keçirdik və işimizə müdaxilə etmək, bizə pis məsləhət vermək istəyənlərə qulaq asmadıq”. Bu barədə Prezident İlham Əliyev 31-ci “Baku Energy Forum”un rəsmi açılış mərasimində çıxışı zamanı bildirib.
Ölkə başçısı bildirib ki, ordunu qurmaq üçün pulumuz olmasaydı, torpaqlarımız işğal altında olardı: “Biz hər bir işi strategiyamız əsasında etdik. Bütün taktiki gedişlərimiz həmin strategiyaya əsaslanırdı. Biz demək olar ki, 30 il ərzində işğal altında qalmış torpaqlarımızı azad edən güclü ordu qurduq. Biz cəmi 44 gün ərzində Ermənistanı tamamilə məğlub etdik və kapitulyasiya aktını imzalamağa məcbur etdik. Əlbəttə ki, müharibədə qələbə dedikdə, sadəcə, pul və hətta silahlar nəzərdə tutulmur. Söhbət döyüş ruhundan gedir. Lakin gəlin etiraf edək, ordunu qurmaq üçün pulumuz olmasaydı, yəqin ki, bu gün hələ də torpaqlarımız işğal altında olardı”.
Həqiqətən də pul olmasaydı güclü ordu yarada bilməzdik, müasir silahları əldə etmək ya çətin olardı, ya da mümkün olmazdı. Yəni bütün bunlar ərazilərimizin işğaldan azad edilməsində önəmli faktor olub.
Sözügedən məsələ ilə bağlı fikirlərini baki-xeber.com-la bölüşən “SƏS” qəzetinin baş redaktoru, politoloq Bəhruz Quliyev hesab edir ki, məhz bu strategiya nəticəsində Azərbaycan regionun aparıcı dövlətinə çevrildi: “Prezident İlham Əliyevin 31-ci Baku Energy Forumunda səsləndirdiyi fikirlər ölkəmizin son 30 ilə yaxın dövrdə keçdiyi inkişaf yolunun, həyata keçirilən uzaqgörən dövlət siyasətinin və əldə olunan tarixi Zəfərin əsas səbəblərini bir daha aydın şəkildə ortaya qoyur. Dövlət başçısının da vurğuladığı kimi, Azərbaycan hər zaman milli maraqlara söykənən praqmatik siyasət həyata keçirib. Müstəqilliyimizin ilk illərində ölkənin üzləşdiyi ağır iqtisadi və siyasi vəziyyət fonunda güclü dövlət quruculuğu, iqtisadi inkişaf və milli təhlükəsizliyin təmin edilməsi əsas prioritetlər kimi müəyyənləşdirildi. Məhz bu strategiya nəticəsində Azərbaycan regionun aparıcı dövlətinə çevrildi. Bu gün heç kimə sirr deyil ki, güclü iqtisadiyyat olmadan güclü ordu yaratmaq mümkün deyil. Müasir dövrdə orduların döyüş qabiliyyəti yalnız şəxsi heyətin hazırlığı ilə deyil, həm də ən son texnologiyalara əsaslanan silah sistemləri, hərbi infrastruktur, peşəkar kadr hazırlığı və davamlı maliyyə təminatı ilə ölçülür. Azərbaycan enerji layihələrindən əldə etdiyi gəlirləri məqsədyönlü şəkildə iqtisadiyyatın inkişafına, sosial rifahın yüksəldilməsinə və eyni zamanda, müdafiə potensialının gücləndirilməsinə yönəltdi”.
Politoloq onu da qeyd etdi ki, əgər ölkəmizin güclü iqtisadi imkanları formalaşmasaydı, müasir silah və texnikaların alınması, hərbi sənaye kompleksinin inkişaf etdirilməsi, peşəkar ordunun qurulması son dərəcə çətin, bəzi hallarda isə mümkünsüz olardı: “Bu baxımdan iqtisadi qüdrətlə hərbi güc arasında birbaşa əlaqə mövcuddur. Azərbaycanın qazandığı hər bir iqtisadi uğur son nəticədə dövlətimizin təhlükəsizliyinin və müdafiə qabiliyyətinin möhkəmlənməsinə xidmət edib. Hesab edirəm ki, 44 günlük Vətən müharibəsində əldə edilən möhtəşəm Qələbə ilk növbədə Azərbaycan əsgərinin qəhrəmanlığı, xalqın birliyi, Ali Baş Komandanın qətiyyəti və düzgün hərbi strategiya nəticəsində mümkün oldu. Lakin bununla yanaşı, illər ərzində yaradılmış iqtisadi baza və müasir ordu quruculuğu siyasəti də bu Zəfərin mühüm sütunlarından biri idi. Azərbaycan müharibə meydanında yalnız döyüş ruhu ilə deyil, həm də uzun illər ərzində formalaşdırdığı hərbi-texniki üstünlüklə qalib gəldi. Prezident İlham Əliyevin çıxışında səsləndirdiyi fikirlər bir daha göstərir ki, dövlətlərin taleyini təsadüfi qərarlar deyil, strateji baxış, milli maraqlara söykənən siyasət və uzunmüddətli inkişaf konsepsiyası müəyyən edir. Azərbaycanın işğal altında olan torpaqlarını azad etməsi də məhz bu uzaqgörən siyasətin, iqtisadi gücün, hərbi hazırlığın və xalq-iqtidar birliyinin məntiqi nəticəsi oldu. Bu gün Azərbaycan artıq yalnız hərbi qələbə qazanmış dövlət deyil, həm də regionda yeni reallıqlar yaradan, öz milli maraqlarını təmin etməyi bacaran, güclü iqtisadiyyata, qüdrətli orduya və müstəqil siyasi iradəyə malik suveren dövlətdir. Bu uğurların təməlində isə illər boyu ardıcıl şəkildə həyata keçirilən milli inkişaf strategiyası dayanır”.
Vidadi ORDAHALLI
