Əli Orucov: “...Türkiyə Konstitusiyasına müəyyən dəyişikliklərin edilməsi gündəmdədir”
Türkiyənin hakim Ədalət və İnkişaf Partiyası (AKP) noyabr ayında növbədənkənar prezident seçkiləri keçirməyi düşünür. "Cumhuriyet" qəzetinin mənbələrə istinadən verdiyi məlumata görə, yeni iqtisadi və sosial dəstək tədbirlərinin tətbiqindən sonra hakimiyyətə dəstək artarsa, bu ssenari gündəmə gələ bilər.
Nəşrin məlumatına görə, partiya dairələri oktyabr ayında açıqlanması gözlənilən sosial və iqtisadi paketin təsirini müzakirə edir. Paketin effektivliyinin ictimai rəy sorğularının nəticələrinə əsasən qiymətləndirilməsi planlaşdırılır. Qəzet yazır ki, əgər sorğular hakim bloka artan dəstəyi göstərərsə, noyabr ayında erkən seçkilərin keçirilməsi variantı daha ciddi şəkildə nəzərdən keçiriləcək.
Lakin partiya daxilində hələlik yekdil fikir yoxdur. AKP rəhbərliyi daxilində bəziləri iqtisadi vəziyyətdə əhəmiyyətli bir irəliləyiş olmadan seçkilərin keçirilməsinin ciddi risklər daşıdığını düşünür. Digərləri isə əksinə, əmək haqqı və sosial müavinətlərdə gözlənilən artımların hökumətin seçicilər arasında mövqeyini gücləndirməyə kömək edə biləcəyinə inanır. Nəşrin mənbələrinə görə, son qərar Türkiyə prezidenti Rəcəb Tayyib Ərdoğan tərəfindən araşdırılacaq ictimai rəy sorğularının nəticələri nəzərə alınmaqla veriləcək. Bu kontekstdə, “Cümhuriyyət” qəzeti qarşıdan gələn siyasi mövsümün Türkiyə üçün son illərin ən gərgin dövrlərindən biri ola biləcəyini qeyd edir.
Bütün bu deyilənlərin fonunda maraqlıdır, hakim partiya daxilində növbədənkənar seçki debatları nə ilə bitə bilər?
Sözügedən məsələni baki-xeber.com-a şərh edən AMİP funksioneri Əli Orucovun fikrincə, bu məsələdə Ərdoğanın mövqeyi önəmlidir: “Əvvəla, Türkiyənin siyasi tarixinə nəzər salsaq görərik ki, dəfələrlə ölkədə növbədənkənar seçkilər keçirilib. Hətta 2002-ci ilin noyabrından Türkiyədə hakimiyyətdə olan AKP dövründə də növbədənkənar seçki olub. Hesab edirəm ki, vəziyyətdən asılı olaraq qərar veriləcək və bu məsələdə Ərdoğanın mövqeyi önəmli olacaq. Türkiyə qədim ənənələri olan, dərin demokratiyaya malik olan dövlətdir. Onu da nəzərə almaq lazımdır ki, CHP ətrafında baş verən məlum proseslərdən sonra müxalifətin mövqeyi xeyli zəifləyib. Bu, imkan verir ki, keçirilən növbədənkənar seçkilərdə AKP yenidən qalib gəlsin. Əgər seçkilər 2028-ci ildə keçirilsə, o zaman Ərdoğan yenidən namizəd ola bilməyəcək. Yox əgər növbədənkənar seçki olsa, o zaman Ərdoğan namizəd ola bilər. Bəzi məlumatlara görə, Türkiyə Konstitusiyasına müəyyən dəyişikliklərin edilməsi gündəmdədir. Ona görə də hesab edirəm ki, heç nəyi istisna etmək olmaz”.
Vidadi ORDAHALLI
