Elşad Həsənov: “Ermənistan rəhbərliyi ilin sonuna qədər bu referenduma getməyəcək”
Avrasiya İqtisadi Birliyi (AİB) ölkələrinin liderləri Astanada Ermənistan ətrafında yaranan vəziyyəti müzakirə etmək üçün görüş keçiriblər və bəyanat qəbul ediblər.
Kreml Rusiya, Belarus, Qırğızıstan və Qazaxıstan liderlərinin Ermənistanla bağlı bəyanatını dərc edib. AİB liderləri hesab edirlər ki, Ermənistanda Aİ-yə qoşulmaq və ya AİB-də qalmaqla bağlı referendum keçirilməlidir. Bəyanatda, xüsusən də Avrasiya Hökumətlərarası Şurasının üzvlərinin dekabr ayında Ermənistan üçün AİB müqaviləsinin dayandırılmasının mümkün nəticələri barədə hesabat təqdim edəcəkləri bildirilir.
Bəyanatda daha sonra deyilir: “Biz, Belarus Respublikası, Qazaxıstan Respublikası, Qırğızıstan Respublikası və Rusiya Federasiyasının prezidentləri Ermənistan Respublikasının Avropa İttifaqına qoşulmaq məqsədi ilə atdığı addımları, o cümlədən 2025-ci ildə Ermənistan Respublikası Milli Assambleyası tərəfindən təsdiqlənməsini və Ermənistan Respublikası Prezidenti tərəfindən "Ermənistan Respublikasının Avropa İttifaqına qoşulma prosesinin başlanması haqqında" Ermənistan Respublikası Qanununun imzalanmasını, eləcə də 5 may 2026-cı ildə qəbul edilmiş ilk Ermənistan-Avropa İttifaqı sammitindən sonra birgə bəyannamədə ifadə edilən Ermənistan Respublikası Hökumətinin Avropa istəklərini Avropa İttifaqının yenidən təsdiqləməsini, Ermənistan Respublikasının Avropa İttifaqına qoşulma hazırlıqları ilə əlaqədar Avrasiya İqtisadi Birliyinin (bundan sonra İttifaq) üzv dövlətlərinin iqtisadi təhlükəsizliyinə ciddi riskləri, eləcə də Birliyin üzv dövlətlərinə dəyən zərərin qarşısının alınması zərurətini nəzərə alaraq qərara aldıq ki: Avrasiya Hökumətlərarası Şurasının üzvləri Belarus Respublikası, Qazaxıstan Respublikası, Qırğızıstan Respublikası və Rusiya Federasiyası 2026-cı ilin dekabr ayında Ali Avrasiya İqtisadi Şurasının növbəti iclasında Avrasiya İqtisadi İttifaqı haqqında Müqavilənin dayandırılmasının Ermənistan Respublikasına münasibətdə mümkün nəticələri barədə məlumat verəcək.
Biz Ermənistan Respublikasında Avropa İttifaqına qoşulmaq və ya Avrasiya İqtisadi İttifaqının tərkibində qalmaqla bağlı mümkün qədər tez bir zamanda milli referendum keçirilməsinin vacibliyi ilə bağlı mövqeyimizi bölüşürük”.
Maraqlıdır, Ermənistanda bu referendum keçiriləcəkmi və bu, nə nəticə verəcək?
Sözügedən məsələyə aydınlıq gətirən siyasi ekspert Elşad Həsənov baki-xeber.com-a açıqlamasında bildirdi ki, Ermənistanda parlament seçkiləri yaxınlaşdıqca Rusiyanın təhdidləri daha geniş miqyasda artır: “Rusiya bütün mümkün vasitələrlə çalışır ki, Moskvanın dəstəklədiyi siyasi qüvvələr seçkilərdə qələbə qazansın. Söhbət Samvel Karapetyan və Robert Köçəryanın rəhbərlik etdiyi siyasi qüvvələrdən gedir. Ancaq hesab edirəm ki, həmin qüvvələrin qələbə qazanacağı real deyil. Baxmayaraq ki, onlara ciddi maliyyə yardımı edilir, Rusiyanın Ermənistandakı bütün agenturası ayağa qaldırılıb. Hətta Rusiyada çalışan erməni miqrantları səs vermək üçün Ermənistana göndərməyə çalışırlar. Hesab edirəm ki, bütün bu fəaliyyətlər əks nəticə verəcək. Çünki Ermənistan əhalisi mövcud hakimiyyəti dəstəkləyir. Çünki əhali müharibə yox, sülh istəyir. Paşinyanın vəd etdiyi real Ermənistanı qurmaq istəyirlər. Aİİ məsələsinə gəldikdə isə, bu gün bir qeyri-müəyyənlik var. Ermənistan həm Aİİ-dən, həm də Avroittifaqdan maksimum istifadə edir. 2022-ci ilin fevralında Ukraynada müharibə başlayandan sonra Ermənistan Rusiyanın sanksiyalardan yayınmasında fəal rol oynadı. Bundan iqtisadi olaraq qazandı. Qərb buna görə Ermənistana irad bildirmədi. Ermənistan həm də Aİİ üzvü olaraq Rusiyadan ucuz qiymətə qaz idxal edir. Rusiya Ermənistanın Avropa İttifaqı ilə yaxınlaşması fonunda, Ermənistana bu güzəşti etmək istəmir. İsrarla bəyan edir ki, indidən seçim edin. Ermənistan rəhbərliyi ilin sonuna qədər bu referenduma getməyəcək. Çünki ölkə buna hazır deyil. Hesab edirəm ki, Putinin belə israr etməsi erməni cəmiyyətində Rusiyaya nifrəti daha da artıracaq. Ola bilsin Rusiya Ermənistanı Aİİ-dən xaric etməyə cəhd etsin və digər üzv ölkələri bunu dəstəkləməyə məcbur etsin. Belə olduğu halda Avropa İttifaqı Ermənistanı qorumaq üçün ölkəyə iqtisadi yardım edə bilər”.
Vidadi ORDAHALLI
