Azər Həsrət: “Təbii ki, Rusiya bu dəhlizdə maraqlı deyil, amma bunun qarşısını almaq imkanında deyil”
Ermənistanın Rusiyaya münasibətini dəyərləndirən Rusiya Xarici İşlər Nazirliyinin sözçüsü Mariya Zaxarova, İrəvanın Rusiya ilə münasibətləri ilə bağlı açıqlamalarının onun hərəkətlərinə zidd olduğunu vurğulayıb. Zaxarova bildirib ki, Rusiyaya qarşı siyasət yürüdən Ermənistanın NATO ilə yaxınlaşması narahatlıq doğurur.
Ermənistanın Avropa İttifaqı (Aİ) ilə yaxınlaşmasına da toxunan Zaxarova, bu təşkilatın iqtisadi birlikdən aqressiv hərbi birliyə çevrildiyini iddia edib: “Ermənistan hökumətinin bu məsələyə yanaşması ölkələrimiz arasında qarşılıqlı faydalı strateji tərəfdaşlığı zəiflədir və İrəvanın bu tərəfdaşlıqdan əldə etdiyi faydaları itirmək riskini yaradır. Ermənistan hökumətinin Aİ ilə yaxınlaşmasını davam etdirərkən Avrasiya İqtisadi Birliyində (AİB) qalmaq yanaşması Rusiya tərəfi üçün qəbuledilməzdir. Ümid edirik ki, İrəvan praqmatik yol tutacaq”.
Zaxarova bildirib ki, onlar Ermənistanın müstəqil və suveren ölkə olaraq qalmasını dəstəkləyirlər.
Rusiya XİN sözçüsü qeyd edib ki, bütün bunlar Qərbin Rusiyanı Cənubi Qafqazdan çıxmaq istəyi ilə bağlıdır: “Əksinə, Rusiya Cənubi Qafqazdan çıxmayacaq və çıxmaq niyyətində də deyil. Bu, tarixi və coğrafi səbəblərə görə mümkün deyil. Lakin Aİ və ABŞ-ın regiondakı maraqlarının nə dərəcədə ciddi və uzunmüddətli olduğu sualı açıq qalır”.
Zaxarava deyir ki, Rusiya Qafqazdan çıxmayacaq. Bu, əslində o demək deyilmi ki, Zaxarova Rusiyanın adından burada Tramp layihəsi olmayacaq mesajı verir? Bunu Rusiyanın birmənalı mesajı kimi qəbul etmək olarmı? Çünki Zaxarova Aİ və ABŞ-ın regiondakı maraqlarının uzunmüddətli olacağına şübhə ilə yanaşır. Lakin TRIPP layihəsi reallaşsa, sözügedən maraqlar müvəqqəti olmayacaq. O üzdən, Zaxarovanın bu bəyanatını konkret olaraq bu regionda Tramp marşrutu olmayacaq kimi yozmaq olarmı?
Sözügedən məsələni baki-xeber.com-a şərh edən siyasi ekspert Azər Həsrət hesab edir ki, Zaxarovanın nə deməsindən asılı olmayaraq, Rusiya Cənubi Qafqazdan birdəfəlik çıxıb getməli olacaq: “Tarixin təkərini heç kəs geri çevirə bilməz. Çünki Rusiya bu torpaqlara işğalçı kimi gəlib. Cənubi və Şimali Qafqazı işğal edib. Yüz illər boyu bizə zülm edib, əziyyət verib. O cümlədən, erməniləri Cənubi Qafqaza köçürərək onlara süni dövlət yaradıb. Bu dövlət də ermənilər üçün sevincdən çox kədər gətirib. Yəni belə bir prosesin əlbəttə ki, bir məntiqi sonluğu olmalı idi. O mənada ki, ermənilər anlamağa başlayıblar ki, Rusiya əslinə qalanda onlara dövlət qurmaqla xoşbəxtlik gətirməyib, bədbəxtliklər gətirib. İndi Ermənistanda bunu anladıqlarına görə Rusiyadan üz döndərib Qərbə üz tuturlar. Eyni zamanda Tramp marşrutu ilə bağlı artıq qərar verilib və heç kəs buna qarşı çıxa bilməyəcək. Təbii ki, Rusiya bu dəhlizdə maraqlı deyil, amma bunun qarşısını almaq imkanında deyil. Rusiya istəyirdi ki, dəhliz onun nəzarətində olsun, amma alınmadı. Reallıq ondan ibarətdir ki, Ermənistan Rusiyadan qopur. Zaxarovanın dedikləri sadəcə Ermənistanı çəkindirmə cəhdidir, amma alınmayacaq. Zəngəzur dəhlizi baş tutacaq və açılacaq. Azərbaycanla Ermənistan bu layihədən faydalanacaq. Bu ölkələrlə yanaşı, digər dövlətlər də faydalanacaq. Rusiyaya qalan isə, boş səs-küy olacaq. Rusiya nəhayət anlamalıdır ki, artıq Cənubi Qafqaz onun əlindən tam olaraq çıxıb. Proses Şimali Qafqazın da onun əlindən çıxmasına doğru gedir. Sadəcə olaraq indiki Rusiya şəraitində bununla bağlı geniş təbliğat işi qurmaq çətinləşib. Çünki internet bağlanıb və hətta mobil rabitə belə bir sıra bölgələrdə kəsilib. Təbii ki, belə bir şəraitdə təbliğat aparmaq, xəbər yaymaq elə də asan deyil. Buna baxmayaraq, başlanan prosesi dayandırmaq mümkün olmayacaq. Belə bir şəraitdə Zaxarovanın dilini dinc qoyması daha yaxşı olardı”.
Vidadi ORDAHALLI
