Elşad Həsənov: “Azərbaycanlıların bu təbliğata cəlb olunması çox böyük təhlükə deməkdir”
Məlumata görə, Gürcüstanda etnik azərbaycanlıların sıx yaşadığı Marneuli şəhərindəki məsciddə İranın ali dini lideri Ayətullah Əli Xameneiyə dəstək nümayiş etdirilib. Yayılan görüntülərdə fevralın 6-sı cümə namazında məsciddə Xameneinin posterinin qoyulduğu əks olunub. Məscidə gələnlər əllərində İranın dini liderinin şəkillərini tutublar.
Gürcüstan azərbaycanlılarını hazırda İranın dini liderinin müdafiəsinə qaldırmaq nə kimi ziyanlı rollar oynaya bilər? Nəzərə alaq ki, Amerika hazırda Azərbaycanla strateji yaxınlaşma kursu həyata keçirir və İranla ciddi qarşıdurma vəziyyətindədir.
Ekspertlər bildirir ki, ABŞ və Azərbaycan arasında ciddi yaxınlaşma var və çox möhkəm əlaqələr qurulub, eyni zamanda Amerikanın viste-prezidentinin Azərbaycana səfəri çərçivəsində Bakıda iki ölkə arasında strateji tərəfdaşlıq xartiyasını imzalayıb. Təbii ki, bu da Xamenei rejimini ciddi narahat etməyə bilməz. Bu günlərdə də Marneulidə dəstək göstərilməsi və ABŞ-a qarşı xoşagəlməz ifadələr işlədilməsi bütün mənalarda bölgəmiz üçün ziyanlıdır.
Siyasi ekspert Elşad Həsənov baki-xeber.com-a bildirdi ki, Gürcüstanda etnik azərbaycanlıların sıx yaşadıqları bölgələrdə, xüsusilə də Marneuli rayonunda İranın fars-molla rejiminin təsirləri özünü göstərir. “Son 20 ildə fars-molla rejimi ora böyük maliyyə yardımı ayırıb və demək olar ki, hər kənddə bu vəsait hesabına məscid tikdiriblər. Oradan olan kənd uşaqlarını İrana aparıb orada onlara dini təhsil veriblər. Bilirik ki, dini təhsillə yanaşı onlara hansısa ideoloji cəhətdən bizim üçün qəbul olunmayan metodlar öyrədirlər. Onlardan gələcəkdə İranın xeyrinə çalışmalarını təmin edirlər. Həmin dini-radikal qruplara mənsub olan bir nəfər Gürcüstan vətəndaşı Azərbaycanda terror törətməklə bağlı tapşırıqlar almışdı. Azərbaycanın Dövlət Təhlükəsizlik Xidmətinin əməkdaşları onu və yoldaşlarını həbs etdilər, onlar məhkəmənin hökmü ilə uzun müddətlik həbs cəzasına məhkum olundular. Yəni dini təbliğat Gürcüstanda çox güclü gedir. Hazırda Gürcüstanın digər rayonlarında da onlar öz imkanlarını daha da genişləndirirlər. Bu yaxınlarda Qardabani rayonunda da məscid yeri alaraq orada geniş təmir-tikinti işləri aparırlar, öz adamları vasitəsilə İranın Xamenei rejiminin təbliğatını aparırlar. Fevralın 6-da da Xameneiyə dəstək, ABŞ-a qarşı isə müəyyən şüarların səsləndirilməsi isə dini təbliğata uymuş kütlənin yanlış davranışıdır. Hesab edirəm ki, bununla da gələcəkdə Gürcüstanda yaşayan azərbaycanlı toplumu üçün də çox ciddi problemlər yaradacaq”.
E.Həsənovun sözlərinə görə, indiki şəraitdə Gürcüstanda yaşayan azərbaycanlıların hansısa formalarla bu təbliğata qoşulması ziyanlı tendensiyadır və gələcəkdə ciddi problemlər yarada bilər. E.Həsənov deyir ki, bu səbəbdən də Azərbaycanın Gürcüstandakı səfirliyi mütamadi olaraq tədbirlər həyata keçirir. “Ancaq Gürcüstandakı hazırkı mürəkkəb vəziyyətdən istifadə edən İran rejimi maliyyə yardımlarını artırmaqla orada öz təbliğatını genişləndirir. Molla rejimi orada özünə uyğun adamları seçib gələcək ordu hazırlayır. Azərbaycanlıların bu təbliğata cəlb olunması çox böyük təhlükə deməkdir. Özü də bu təkcə Gürcüstan üçün deyil, Azərbaycan üçün də təhlükəlidir. Onlar Azərbaycanda edə bilmədiklərini Gürcüstanda edirlər”.
Molla rejiminin apardığı siyasətin İran vətəndaşları tərəfindən narazılıqla qarşılandığını deyən E.Həsənov qeyd etdi ki, elə bu səbəbdən bu ölkədə etirazlar səngimir. “Azərbaycanın strateji tərəfdaşı olan Gürcüstanda yaşayan azərbaycanlılar belə təbliğatlardan uzaq olmalıdır. Onlar arasında çox ciddi ideoloji iş aparılmalıdır və səfalətdən, cəhalətdən qurtulmalıdır. Dünya süni intellektlə məşğuldur, bunlar isə molla rejiminin təbliğatı ilə məşğuldur”.
E.Həsənov hesab edir ki, əgər bu təbliğatın qarşısı alınmazsa molla rejimi o qüvvələrdən Azərbaycana qarşı da istifadə edə bilər.
İradə SARIYEVA
