Faiq Ələkbərli: “ABŞ-ın vitse-prezidentinin onların yalanlarına inanması mümkün görsənmir, çünki...”
Amerika Birləşmiş Ştatlarının (ABŞ) vitse-prezidenti Ceyms Devid Vensin İrəvana rəsmi səfəri zamanı ermənilər ənənəvi davranışlarını sərgiləməkdən qalmayıblar. Ölkəyə rəsmi səfərə gələn xarici ölkə rəsmilərini qondarma genosid abidəsini ziyarətə aparmaq Ermənistanda rəsmi protokola salınıb. Odur ki, Ermənistana səfər edənlər bu “ziyarətdən” yayına bilmirlər. ABŞ-ın vitse-prezidenti də saxta soyqırım abidəsini ziyarət etsə də, qondarma “soyqırım muzeyinə” daxil olmayıb.
“Erməni Soyqırımı Muzey-İnstitutun” direktoru Edita Qzoyan fürsətdən istifadə edərək Vensə “erməni soyqırımı” və “Qarabağ problemi” ilə bağlı kitablar verib.
Ermənistan tərəf bir yandan sülh üçün çalışdıqlarını, başqa bir yandan sülh sazişi imzalamaq istədiklərini, Azərbaycana qarşı ərazi iddialarından əl çəkəcəklərini deyir, bir yandan da xaricdən gələn belə mötəbər qonaqlara qondarma Qarabağ probleminin guya hələ də “mövcud olduğunu göstərirlər”, onlara Qarabağ münaqişəsinin tarixi ilə bağlı saxtakarlıqlar əsasında yazılan kitab verirlər. Bu nə dərəcədə məqbul bir addımdır? Bu Ermənistanın sülh siyasətini ürəkdən aparmadığını, buna bir oyun kimi baxdığını göstərən faktlar deyimi? Yaxud belə jestlərlə Amerikadan hansısa bir reaksiyalar olmalıdırmı?
AMEA-nın Fəlsəfə və Sosiologiya İnstitutunun şöbə müdiri, fəlsəfə doktoru, siyasi ekspert Faiq Ələkbərli baki-xeber.com-a bildirdi ki, ABŞ-ın vitse-prezidentinin İrəvan səfərində ona sözdə “erməni soyqırımından” bəhs edilməsi və Qarabağ məsələsinin qabardılması, ona saxtakarlıq əsasında yazılan və reallıqdan uzaq kitabların verilməsi qətiyyən doğru deyil. “Bu Ermənistanın hələ sülhə tam hazır olmadığını göstərir. Ermənistan hökuməti Azərbaycanla sülh müqaviləsinin imzalanması üçün nə isə etmək istəyir, müyyən mənada edir də. Amma hələ də sözdə erməni “soyqırımı”nın və Qarabağ məsələsinin ortaya atılması, eyni zamanda Ermənistanın qonşu dövlətlərə, Azərbaycana, Gürcüstana və Türkiyəyə qarşı ərazi iddiaları ictimai səviyyədə dilə gətirilir. Ermənistan hökuməti sülh istəyirsə mütləq bu kimi əsassız məsələlərə bütövlükdə son qoymalıdır. Vaxtilə Azərbaycan ərazisində yerləşdirilən hayların (ermənilərin) burada elə böyük tarixi də yoxdur. Bu iki əsrdə onlar hər şeyi yalan üstə qurublar ki, guya bu torpaqlar onlarındır və sair. Bu məsələlərin reallıqdan uzaq olduğunu Paşinyan hökuməti anlayır, amma Ermənistanın dövlət qurumlarında erməni xəstəliyi artıq kök atıb və bundan birdən-birə xilas ola bilməzlər. Biz məsələyə bu yöndən baxıb dəyərləndiririk və görürük ki, onlar yenə də öz mahiyyətlərini ortaya qoyurlar”.
F.Ələkbərli hesab edir ki, Ermənistan rəhbərliyi sülh siyasətinə doğru gedir, amma ona mane olanlar var. “Paşinyan hökuməti sülhə doğru addımlarda maraqlıdır, amma erməni xalqının düşüncəsi ilə bağlı ciddi problemlər var. Ermənistan müxalifəti, kilsəsi sülh istəmir, vəziyyətin kəskinləşməsini istəyirlər. Bilirlər ki, bu günün gerçəklikləri onların xeyrinə işləmir, dünyada və bölgədə baş verənlərdən narahat olurlar, ona görə də təxribatlarını davam etdirirlər”.
F.Ələkbərlinin sözlərinə görə, Tramp adminstrasiyası “erməni soyqırımının” uydurma olduğunu və Qarabağ münaqişəsinin həll olunduğunu bilir. F.Ələkbərli qeyd etdi ki, keçən ilin avqustunda Ağ Evdə imzalanan sənədlərlə də münaqişənin başa çatdığı bir daha təsdiqləndi. “Ermənilərin Vensə verdiyi kitablarda əks olunanlar uydurmalardan ibarətdir. ABŞ-ın vitse-prezidentinin onların yalanlarına inanması mümkün görsənmir, çünki Vens bu məsələlər barədə məlumatlı olmamış deyil”-deyə F.Ələkbərli vurğuladı.
İradə SARIYEVA
