Ramil Məmmədli: “Bununla Erməni Apostol Kilsəsinin daha bir təsir imkanı heçə endirilib”
Ermənistanda Kilsəyə və revanşistlərə növbəti zərbə vurulub. Belə ki, Ermənistanın müdafiə naziri Suren Papikyanın əmri ilə silahlı qüvvələrin 20 ildən artıqdır fəaliyyət göstərən Ruhani Rəhbərliyi ləğv edilib.
Həmin əmrə əsasən, 2000-ci ilin iyulunda Ermənistan müdafiə nazirinin verdiyi 728 nömrəli əmr qüvvədən düşmüş hesab edilir. Ermənistan Müdafiə Nazirliyi struktur dəyişikliyi ilə bağlı Eçmiədzin kilsəsinə rəsmi məktub göndərib.
Məlumat üçün qeyd edək ki, sözügedən struktur uzun illərdir Ermənistan ordusunda ideoloji və mənəvi xidmət sahəsində fəaliyyət göstərirdi.
Sözügedən məsələni baki-xeber.com-a şərh edən hərbi ekspert Ramil Məmmədlinin fikrincə, bu qərar əsasən siyasi motivlərlə bağlıdır: “Məsələ ondadır ki, Paşinyan bununla Kilsənin hakimiyyətə təsir imkanlarını neytrallaşdırmağa çalışır. Həm erməni kilsəsi, həm də parlament partiyaları revanşist qüvvələri təmsil edirlər. Bundan əvvəl Rusiyanın ordudakı təsir rıçaqlarını neytrallaşdırmaq üçün bir sıra addımlar atdı. Paşinyana yaxın və loyal olan şəxslər ordunun ali strukturlarında yerləşdirildi. Ancaq deməzdim ki, Rusiyaya yaxın bütün zabit heyəti dəyişdirilib. Rusiyanın Ermənistan ordusunda təsir imkanları hələ də qalır. Orduda Ruhani Rəhbərliyinin ləğvi daha çox kilsənin təsir imkanlarının neytrallaşdırılmasına hesablanıb. Təsadüfü deyil ki, müdafiə naziri Suren Papikyanın əmrində, xüsusilə, qeyd olunur: “2026-cı il fevralın 1-dən etibarən Ermənistan Silahlı Qüvvələrinin Ruhani Xidmətinin rəhbərinin və Erməni Apostol Kilsəsi tərəfindən təyin olunmuş ruhani xidmətçilərin Ermənistanın müdafiə sistemində fəaliyyəti dayandırılsın”. Bununla Erməni Apostol Kilsəsinin daha bir təsir imkanı heçə endirilib. Ümumiyyətlə, orduda Ruhani Xidmət həmişə, xüsusilə də hərbi paradlar dövründə müəyyən dairələrdə narazılıq doğurub. Bu tədbirlərdə keşişlərin dəstəsinin də iştirakı olurdu. Bu, həm də Azərbaycanın maraqlarına uyğun deyildi. Çünki erməni keşişləri heç vaxt sülhə yox, nifrətə köklənmiş din xadimləridir. Onlar heç vaxt sülh prosesinə töhfə verməyiblər”.
Vidadi ORDAHALLI
