Akif Nağı: “Maksimum az itki ilə böyük nəticə əldə olundu”
Prezident İlham Əliyev Ağdərənin Aşağı Oratağ kəndində Aşağı Oratağ, Çıldıran, Heyvalı və Çapar kəndlərinin sakinləri ilə görüşündə 2020-ci ilin noyabrında müharibənin dayandırılması səbəbi bəyan edib.
Prezident Əliyev deyib: “Son 80 il ərzində Azərbaycan kimi tam və mütləq Qələbə qazanan ikinci ölkə olmayıb. Müharibələr olub, münaqişələr olub, bu gün də davam edir. Amma heç biri tam və mütləq Qələbə ilə nəticələnməyib. Ancaq biz böyük xalq olaraq buna nail olduq, özü də cəmi 44 gün ərzində. Ondan sonra da bir gün ərzində. Biz şanlı Zəfərimizi, Zəfər yürüşümüzü iki mərhələyə bölərək həm də cavanlarımızı qoruduq. Çünki əgər 2020-ci il noyabrın 10-da müharibə dayanmasaydı, bəlkə də minlərlə şəhid verməli olacaqdıq. O cümlədən bax burada, bu dağlarda, Ağdərə dağlarında, Kəlbəcər dağlarında, Laçın dağlarında, Ağdamın minalanmış zolaqlarında minlərlə şəhid verə bilərdik. Biz onları qoruduq, onları qurban vermədik...”
“Prezidentin öz vətəndaşlarının, gənclərin həyatını risqə atmamaq mövqeyini nümayiş etdirir”
Prezidentin bu bəyanatı ilə bağlı baki-xeber.com-a danışan Azad Vətən Partiyasının sədri Akif Nağının sözlərinə görə, Azərbaycanın böyük qələbəsi ilə başa çatan Vətən müharibəsi ilə bağlı hələ çox fikirlər söylənəcək, tarixçilərin, tədiqatçıların, hərbiçilərin yanaşmaları olacaq. “Amma vacib məsələlərdən biridir ki, Prezident artıq bu müharibədə qazanılan qələbəni iki mərhələyə böldü. Bu da tarixçilər üçün bir işarədir. Müharibənin birinci mərhələsi sentyabrın 27-də başlayıb noyabrın 10-a qədər davam edən 44 günlük dövr. Sonra da 2023-cü və 2024-cü illərdə əldə olunan nəticələr. Tarixçilər bu dövrü tədqiq edəndə bu bölgüyə əməl etməlidirlər.
Ali Baş Komandanın bu yanaşması da humanist bir yanaşmadır və o, vəziyyəti düzgün dəyərləndirib qərar qəbul etmək bacarığını göstərdi. Birinci mərhələdə deyə bilərik əsasən qələbə əldə olunub. İkinci mərhələdə isə tam qələbə qazanıldı. Prezident vətəndaşları, gəncləri düşünərək, daha çox itkinin olmaması üçün belə bir seçim edib. Çox risqli seçim idi. Bu prosesin gedişində hansısa qüvvələr xaricdən hərbi prosesə müdaxilə edib Ermənistana dəstək verə, bizim qələbəmiz yarımçıq qala bilərdi. Amma Prezidentin risqli seçimi özünü doğrultdu. Yəni fasilə verilməlidir və bu fasilə dövründə ermənilərin üzərinə qoyulan öhtəliklərə nail olunmalı idi”.
Həmin dövrdə ermənilərin Azərbaycanın bir sıra ərazilərini-Ağdamı, Kəlbəcəri, Laçını könüllü tərk etdiklərini deyən A.Nağının sözlərinə görə, bu da Azərbaycan Prezidentinin mövqeyinin düzgünlüyünü göstərirdi və o mövqenin qələbəsi idi. “Bu Azərbaycan Prezidentinin mövqeyinin tamamilə düzgün olduğunun göstəricisidir.
Ondan sonrakı dövrdə təmkinlə Azərbaycan məsələləri ortaya qoydu, Laçın dəhlizinə çıxdı, ardınca lokal antiterror tədbirləri həyata keçirildi. Nəticədə maksimum az itki ilə böyük nəticə əldə olundu...”-deyə A.Nağı bildirdi.
A.Nağı bir daha vurğuladı ki, bu tarixçilər, hərbi tədqiqatçılar üçün bir təlimatdır, bir yoldur, eyni zamanda qərarın özünün düzgün olduğunu göstərir:“Burada digər məsələ də Prezidentin öz vətəndaşlarının, gənclərin həyatını risqə atmamaq mövqeyini nümayiş etdirir. Prezident çalışdı ki, maksimum az itki olsun, gənclər həlak olmasın. Son nəticə üçün həm vəziyyət düzgün qiymətləndirildi, həm də az az itki ilə böyük nəticə əldə olundu”.
İradə SARIYEVA
