Azər Həsrət: “Bu xəbərdarlıq çəkindirici təhdid məqsədli təşəbbüsdür”
Respublikaçı ABŞ konqresmeni Tomas Massi ABŞ-ın Şimali Atlantika Alyansından çıxmasını nəzərdə tutan HR 6508 qanun layihəsini (“NATO Qanunu”) Nümayəndələr Palatasına təqdim edib. Bu barədə siyasətçinin rəsmi saytında məlumat yayılıb.
“NATO “Soyuq müharibə”nin qalığıdır. Biz NATO-dan çıxmalı və bu pulu sosialist ölkələrini deyil, öz ölkəmizi müdafiə etmək üçün istifadə etməliyik. Bu ittifaq 30 il əvvəl dağılan Sovet İttifaqına qarşı durmaq üçün yaradılıb. Blokda iştirak Amerika vergi ödəyicilərinə trilyonlarla dollara başa gəlib və ABŞ-ın xarici münaqişələrdə iştirakı risqini yaratmağa davam edir. Varlı ölkələr öz müdafiə xərclərini ödəməkdən imtina etdikdə, Amerika dünya üçün “təhlükəsizlik yorğanı” olmamalıdır”, - o bildirib.
Məlumat üçün qeyd edək ki, ABŞ Prezidenti Donald Tramp dəfələrlə müttəfiqlərinin müdafiə xərclərinin yetərli olmaması səbəbindən ölkəni NATO-dan çıxarmaqla hədələyib. Maraqlıdır, ABŞ NATO-dan çıxacaqmı? Yoxsa bununla Avropanı şantaj edir?
“...Düşünmürəm ki, ABŞ-ın NATO-dan çıxacağı ilə bağlı qərar verilsin”
Sözügedən məsələ ilə bağlı fikirlərini “Bakı-Xəbər”lə bölüşən siyasi şərhçi Azər Həsrət hesab edir ki, ABŞ-ın NATO-dan çıxacağı real deyil: “Çünki NATO-nu quran elə Birləşmiş Ştatların özüdür. NATO ümumiyyətlə, hər kəsdən əvvəl ABŞ-ın özünə lazımdır. Çünki ABŞ özü təkbaşına dünyaya hökm edəcəyi təqdirdə həm də belə bir hərbi-siyasi alyansa ehtiyacı var. Yəni yanına aldığı dövlətlərlə birlikdə dünyaya hökm edir. Bundan niyə imtina etsin ki? Düzdür, NATO xərcləri ilə bağlı ABŞ-ın narahatlıqları başadüşüləndir. Həqiqətən də NATO üzvlərinin heç də hamısı nizamlı bir şəkildə bu qurumun xərclərini qarşılamır. Bəzən də heç qarşılamaq imkanları olmur. Yəni blokun xərc yükü əsasən ABŞ-ın üzərinə düşür. Yəni o baxımdan düşünmürəm ki, ABŞ-ın NATO-dan çıxacağı ilə bağlı qərar verilsin. Sadəcə bu, bir çəkindirmə və qorxutma cəhdidir. Üstəlik, nəzərə almaq lazımdır ki, Trampın prezidentliyi əbədi deyil. Onun indi ABŞ üçün qeyri-adi sayıla biləcək addımları tək bununla bağlı deyil. Başqa istiqamətlərdə də belə addımlar atır. Lakin biz hamımız bilirik ki, Trampın prezidentliyinin 3 ili qalıb. Faktiki yanvarın 20-də Trampın prezidentliyinin bir ili tamam olur. Növbəti 3 ildən sonra yeni prezident gələcək və Birləşmiş Ştatların əvvəlki qaydada dünyada öz siyasətini yürütməsinə yaşıl işıq yandıracaq. Deməyim odur ki, ABŞ öz mindiyi gəminin kapitanlığından niyə imtina etsin ki? NATO ABŞ-ın gəmisidir və bu blokun kapitanı da odur. Gəmi onun, kapitanlıq onun. O zaman niyə bundan imtina etsin ki? Ona görə də düşünürəm ki, bu xəbərdarlıq çəkindirici təhdid məqsədli təşəbbüsdür. Onu da nəzərə almaq lazımdır ki, ABŞ-da bu cür təşəbbüslər dərin bürokratiya qatından keçmək məcburiyyətindədir. Fikrimcə, uzun və nəticəsiz bir proses ola bilər. Hər halda, NATO ABŞ-ın ideyası olub və çətin ki, bundan imtina etsin”.
Vidadi ORDAHALLI
