Şakir Ağayev: “Məsələnin bu şəkildə qələmə verilməsi Aİ-nin Azərbaycana qarşı növbəti qərəzli münasibətidir”
Avropa İttifaqı (Aİ) və Ermənistan arasında Tərəfdaşlıq Şurasının Brüsseldə keçirilən VI iclasında “Avropa İttifaqı-Ermənistan Tərəfdaşlığı üçün Strateji Gündəlik” adlı sənəd imzalanıb.
Aİ və Ermənistan arasında imzalanan bu sənədi şərh edən Azərbaycanın Xarici İşlər Nazirliyinin bəyanatında bildirilir ki, bu sənəddə post-münaqişə dövründə reallıqları təhrif edən və bütövlükdə Azərbaycanla Ermənistan arasında sülh gündəliyinə zidd olan bir sıra məsələlərin prioritetləşdirilməsi ciddi narahatlıq doğurur.
"Sənədin giriş hissəsində və bir sıra digər bölmələrində Azərbaycan tərəfindən təqdim edilmiş reinteqrasiya planından imtina etdikdən sonra ölkəmizdən könüllü şəkildə Ermənistana miqrasiya etmiş erməni sakinlərə istinadən “Azərbaycanın hərbi əməliyyatlarından sonra köçkün düşmüş Qarabağ erməniləri” ifadəsinin işlədilməsi və bu məsələnin Aİ və Ermənistan arasında tərəfdaşlıq prioriteti kimi müəyyən edilməsi, eləcə də bu kateqoriya insanların “qaçqın” statusunda qeyd edilməsi Azərbaycana qarşı qərəzin açıq-aydın nümunəsidir”.
“Avropa İttifaqı-Ermənistan Tərəfdaşlığı üçün Strateji Gündəlik” adlı sənəddə “Azərbaycanın hərbi əməliyyatlarından sonra köçkün düşmüş Qarabağ erməniləri” ifadəsinin işlədilməsi həqiqətən də absurd və yolverilməzdir. Ermənipərəst mövqeyini gizlətməyən Aİ-nin məlum sənəddə reallıqdan uzaq, tarixi gerçəkliyə zidd belə ifadəyə yer verməsi kollektiv Qərbin gerçəyi inkar etməsi deməkdir. Bütün dünya bilir ki, birincisi, ermənilər Qarabağın yerli əhalisi deyil, onlar ora XIX əsrdə çar Rusiyası tərəfindən köçürülüb. İkincisi də, 23 saatlıq antiterror tədbirlərindən sonra ermənilər Qarabağı könüllü şəkildə tərk ediblər. Əgər iddia olunduğu kimi onlar bu torpaqlardan köçürülməyə məcbur edilibsə də, onları buna Azərbaycan məcbur etməyib, özlərinin də dedikləri kimi, bunu onlardan Ermənistan hökuməti və başqa başbilənləri istəyib. Yəni Qarabağdan köçən ermənilər müsahibələrində açıq şəkildə deyirdilər ki, “Ermənistandan bizə Qarabağı tərk edin deyiblər”. İndi onların belə bir sənəddə “qaçqın” kimi qələmə verilməsi gerçəkdən absurddur və Azərbaycana qarşı növbəti qərəzdir.
“Novoye vremya” qəzetinin baş redaktoru Şakir Ağayev “Bakı-Xəbər”ə bildirdi ki, Avropa İttifaqı (Aİ) və Ermənistan arasında Tərəfdaşlıq Şurasının Brüsseldə keçirilən VI iclasında “Avropa İttifaqı-Ermənistan Tərəfdaşlığı üçün Strateji Gündəlik” adlı sənədin imzalanmasında bir sıra ziddiyyətli məqamlar var. “Bu sənədin bütün bəndlərini nəzərdən keçirəndə görürsən ki, Aİ Azərbaycanla Ermənistan arasında reallaşmaqda olan sülh müqaviləsinə maneçilik törətmək istəyir. Çox təəssüflər olsun ki, Ermənistan tərəfi də qarşılıqlı surətdə bu məsələlərdə Aİ ilə razılaşıb və belə bir sənədi imzalayıb. Qarabağdan könüllü getmiş ermənilərin “qaçqın” kimi qiymətləndirilməsi və ümumiyyətlə belə bir məsələnin qoyuluşu düzgün deyil. “Azərbaycanın hərbi əməliyyatları” ifadəsinin işlədilməsi də qəbuledilməzdir. Azərbaycan öz ərazisində lokal antiterror tədbirləri həyata keçirib və bu da Azərbaycanın tam hüququdur. Bunu Azərbaycan öz ərazilərində qanunun qorunması istiqamətində separatizm və terrorizmə qarşı tədbirlər olaraq görüb. Belə əməliyyatlar da dünyanın hər yerində aparılır. Hansı dövlət razı olar ki, onun daxilində separatizm, terrorizm olsun? Heç bir dövlət. Digər tərəfdən, Azərbaycan dövləti erməniləri Qarabağdan qovmayıb. Bu prosesə qədər Azərbaycan hökuməti dəfələrlə Qarabağda yaşayan ermənilərə müraciət edib onların reinteqrasiyasını həyata keçirmək istəyib. Hətta erməni nümayəndələri ilə Yevlaxda görüşlər də keçirilib və onlara burada yaşamaları üçün tam təminat verilib. Yəni Azərbaycan qanunlarına tabe olmaq, Azərbaycan vətəndaşlığını qəbul etmək, ölkənin konstitusiyasına əməl etmək şərti ilə Qarabağdakı ermənilər qalıb yaşaya bilərlər. Onlara Qarabağda Azərbaycan vətəndaşı kimi yaşamaq şansı verildi. Amma onlar bu şansı dəyərləndirmədilər. Çox təəssüflər olsun ki, onlar ənənəvi erməni xislətinə sadiq qalaraq öz istədiklərini etdilər. Yəni onların nümayəndələri Azərbaycan rəsmiləri ilə danışıqlarda Azərbaycan vətəndaşlığını qəbul etməyə, qanunlarımıza, konstitusiyamıza uyğun yaşamağa razılıqlarını bildirsələr də, sonra vədlərinə əməl etməyib könüllü şəkildə Azərbaycanın Qarabağ bölgəsini tərk edib. Azərbaycan dövləti onlar üçün şərait yaratdı. Onlar buradan normal şəkildə çıxıb getdilər, qalanlar da oldu. Yəni onların buradan zorla qovulduğu barədə iddialar əsassızdır. Hesab edirəm ki, məsələnin bu şəkildə qələmə verilməsi Aİ-nin Azərbaycana qarşı növbəti qərəzli münasibətidir. Bu, həmçinin, Azərbaycanla Ermənistan arasında normallaşmaya, sülhə doğru atılan addımlara ağır bir zərbədir.
Eyni zamanda da bu bir təxribatdır ki, onlar bu absurdluğu sənədləşdirərək Qarabağdan köçüb getmiş erməniləri bizə qarşı qaldırmaq niyyəti güdürlər. O ermənilərin xeyli hissəsi Qarabağdan könüllü getdikdən sonra Ermənistanda qalmayıb üçüncü ölkələrə gediblər, qalanların isə geri qayıtmaq arzusu yoxdur, onlar həyatlarını orada davam etdirirlər. İndi bu iddianı qaldırmaqla belə rəy yaratmaq istəyirlər ki, ermənilər Qarabağdan guya qovulublar və geri qayıtmalıdırlar.
Aİ və Ermənistan belə bir sənəd imzalayır, amma Aİ əvvəlcədən Azərbaycana hər hansı bir məlumat göndərmir. Səbəb nədir? Ermənilər Qarabağdan əli yalın, başı açıq qaçıb getməyiblər, könüllü gediblər. Amma illər əvvəl azərbaycanlılar öz ata-baba yurdları Qərbi Azərbaycandan, indiki Ermənistandan zorla deportasiya ediliblər, ayağı yalın, başı açıq qaçmağa məcbur ediliblər. Aİ elə obyektiv idisə, nə üçün o sənədə indiki Ermənistan ərazisindən zorla qovulan azərbaycanlıların geri qayıtmaq hüququ haqqında bir söz belə salmayıb? Əgər o məsələni də ora daxil edərdisə, onda hardasa bu sənəddə bir həqiqət izi olardı”.
Ş.Ağayev təəssüflə qeyd etdi ki, Aİ bir dəfə də olsun azərbaycanlıların adını o sənəddə çəkməyib və bu da o qurumun bizə qərəzli münasibətindən qaynaqlanır. “Bütövlükdə bu sənəd qəbuledilməzdir və bununla bağlı Azərbaycanın Xarici İşlər Nazirliyi öz münasibətini bildirib”-deyə Ş.Ağayev qeyd etdi.
İradə SARIYEVA
