Ramil Hüseynov: “Trampın məqsədi odur ki, Ukrayna Donbasdan imtina etsin”
ABŞ prezidenti Donald Tramp Ukraynada seçkilərin keçirilməsinin vaxtı çatdığını bəyan edib. Tramp bu barədə “Politico”ya verdiyi müsahibədə deyib.
O, Ukraynada seçkilərin keçirilməsinin vaxtı çatıb-çatmadığı sualına cavabında “Bəli” deyib: “Düşünürəm ki, vaxtı çatıb. Uzun müddət keçib. Vəziyyət yaxşılaşmır. Bəli, seçkilər üçün vacib bir zamandır. Onlar müharibəni seçkilərin keçirilməməsi üçün bəhanə kimi istifadə edirlər, amma Ukrayna xalqının bu seçimi olmalıdır. Bəlkə də Zelenski qalib gələrdi. Kim qalib gələrdi bilmirəm. Amma uzun müddətdir ki, seçkilər olmayıb. Demokratiyadan danışırlar, amma bir anda demokratik olmağı dayandırırlar”.
Zelenski Trampın ölkədə seçkilər keçirilməsi çağırışını şərh edərək deyib ki, buna hazırdır: “Mən hər zaman seçkilərə hazıram”.
Qızğın müharibə gedən ölkədə seçki keçirmək olarmı? Trampın belə şərtlə çıxış etməsinin arxasında nə dayanır?
“Hazırda orada seçkini nəinki praktiki, heç nəzəri baxımdan da həyata keçirmək mümkün deyil”
Sözügedən məsələni “Bakı-Xəbər”ə şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynovun fikrincə, Trampın belə absurd təşəbbüslə çıxış etməsi Putinin əlinə oynaması anlamına gəlir: “Tramp özü də yaxşı bilir ki, müharibə gedən ölkədə seçki keçirmək mümkün deyil. Xüsusən Ukraynada bunu nəinki praktiki, heç nəzəri baxımdan da həyata keçirmək mümkün deyil. Milyonlarla ukraynalı qaçqın düşərək ölkəni tərk edib. Cəbhədə qanlı döyüşlər gedir, Ukraynanın şəhərləri intensiv olaraq bombalanır. Bu günlərdə Ukraynada baş verən korrupsiya qalmaqalında da Birləşmiş Ştatların əli olması barədə məlumatlar var. Trampın məqsədi odur ki, Ukrayna Donbasdan imtina etsin. Müharibə nəyin bahasına olursa-olsun başa çatsın. Ukraynanın ərazi bütövlüyünün kobud şəkildə pozulması Trampın vecinə deyil. Hiss olunur ki, Tramp Zelenskiyə nifrət edir. Hər vasitə ilə onu aşağılamağa, təslimçi sülhə imza atmağa məcbur etmək istəyir. Belə olmasaydı Tramp Rusiyaya qarşı daha sərt mövqedən çıxış edərdi. Tərəddüd etmədən ABŞ Rusiyaya qarşı sanksiyaların miqyasını genişləndirərdi, neft sektorunu çökdürərdi. O zaman Putin geri addım atmağa məcbur olacaqdı. Ancaq tam əksinə olaraq Tramp Putini beynəlxalq izoliyasiyadan çıxartdı. Nəticədə o, Ukraynaya qarşı işğalçılıq fəaliyyətini daha amansız fazaya keçirdi”.
Vidadi ORDAHALLI
