Vüqar Bayramov: “Azərbaycanla Slovakiya arasında yalnız iqtisadi və siyasi əlaqələr deyil, eyni zamanda, humanitar və digər sektorlarda da əməkdaşlıq güclənib”
İşğaldan azad olunmuş torpaqlarda bərpa, yenidənqurma işləri sürətlə davam edir. Bu prosesdə həm yerli, həm də xarici dost ölkələrin şirkətləri iştirak edir.
Qarabağın yenidən qurulmasında rolu olan ölkələrdən biri də Slovakiyadır. Dekabrın 8-də Bratislavada Slovakiya Respublikasının Prezidenti Peter Pelleqrininin adından verilən rəsmi ziyafət zamanı Azərbaycan Prezidenti İlham Əliyev bildirib ki, hazırda tikilən “Ağıllı kənd” Slovakiyanın azad olunmuş ərazilərdə əldə etdiyi uğurun rəmzinə çevriləcək: “851 ev və 10 yaşayış binasından, eləcə də məktəb, uşaq bağçası və tibbi mərkəzdən ibarət kənd nailiyyətlərinizin və əbədi dostluğumuzun təzahürü olacaq. İşğaldan azad edilmiş ərazilərin bərpası bu gün Azərbaycanın bir nömrəli hədəfidir. Slovakiya nəinki bu işlərdə, o cümlədən minalardan təmizləmədə bizə yardım edir".
“Slovakiyanın texnoloji təcrübəsindən istifadə edilməsi hər iki ölkə arasında əməkdaşlığın formalaşmasına gətirib çıxara bilər”
Millət vəkili Vüqar Bayramov “Bakı-Xəbər”ə şərhində bildirdi ki, Azərbaycanla Slovakiya arasında yalnız iqtisadi və siyasi əlaqələr deyil, eyni zamanda, humanitar və digər sektorlarda da əməkdaşlıq güclənib: “Slovakiya “Ağıllı kənd”, “Ağıllı şəhər” layihələrini daha uğurlu idarə edən ölkələrdən biridir. Gözlənilir ki, bu sahədə əməkdaşlıq pratiki olaraq Azərbaycanda, xüsusən də işğaldan azad edilmiş ərazilərdə həmin təcrübədən daha sıx şəkildə istifadəyə imkan yaradacaq. Ölkələr arasında bu istiqamətdə əməkdaşlıq gözlənilir.
Digər mühum məqam minaların təmizlənməsi ilə bağlıdır. Məlumdur ki, minalarla ən çox çirklənmiş ölkə Azərbaycandır. Ermənistan torpaqlarımızı işğal etdiyi müddətdə ərazilərə çoxlu sayda mina basdırıb, təkcə Füzuli rayonunda basdırılan minaların sayı 100 mindən çox idi. Məlumdur ki, torpaqların minadan təmizlənməsi istiqamətində mühum işlər görülür. Bu sahədə də əməkdaşlığın gücləndirilməsi və inkişaf etdirilməsi əhəmiyyətlidir. Nəticə etibarı ilə Slovakiyanın texnoloji təcrübəsindən istifadə edilməsi hər iki ölkə arasında əməkdaşlığın formalaşmasına gətirib çıxara bilər”.
Günel CƏLİLOVA
