Son həftələrdə Türkiyənin S-400-ləri başqa bir ölkəyə verə biləcəyi ilə bağlı xəbərlər yenidən gündəmə gəlib. “Bloomberg” Türkiyənin F-35 proqramına qayıtmaq ümidi ilə S-400-lərdən imtina edə biləcəyini iddia edir.
Bəzi analitiklər, Rusiyadan 5,43 milyard dollarlıq müqavilə çərçivəsində üç ədəd S-400 almaq istəyən Hindistanın potensial alıcı ola biləcəyini iddia edir. "Turkey Today"ə danışan Türkiyə Milli Müdafiə Nazirliyinin (MSB) mənbələri isə bu iddiaların yalan olduğunu və Türkiyənin S-400-ləri heç bir ölkəyə ötürmək və ya satmaq niyyətində olmadığını bildiriblər.
S-400-lərlə bağlı şayiələr ABŞ səfiri Tom Barrakın açıqlamasından sonra daha da artıb və Türkiyənin inventarındakı S-400-lərin gələcəyi ilə yeni müzakirələr başlayıb. Barrak deyib ki, Ankara Amerika istehsalı “F-35” qırıcılarının istehsalı və satınalınması proqramına qayıtmaq istəyirsə, Rusiya istehsalı olan “S-400” hava hücumlarından müdafiə sistemlərindən imtina etməlidir. Onun sözlərinə görə, Vaşinqton və Ankara “S-400” məsələsi və Türkiyənin F-35 proqramına “yenidən qoşulmaq” istəyinə dair danışıqlar aparırlar. Barrak bildirib ki, Türkiyə “F-35” proqramına qayıtmaq üçün S-400 sistemlərini daha artıq istismar edə və ya onlara sahib ola bilməz.
Bu xəbərlərin ardından Hindistan mətbuatında Türkiyənin S-400-ləri Hindistana verə biləcəyi ilə bağlı məlumatlar yayılıb. Lakin Türkiyə və ya Hindistandan heç bir rəsmi açıqlama bu iddiaları təsdiqləməyib. Dehli mediası ABŞ-ın Türkiyənin sistemləri Hindistana verə biləcəyi ilə bağlı açıqlamasından dərhal sonra xəbər yayıb. Ancaq təhlükəsizlik mənbələri birmənalı olaraq bu iddiaları rədd edir.
Bu arada, Ukrayna mediası Rusiyanın Ukraynadakı əks-hücumlar səbəbindən hava hücumundan müdafiə qabiliyyətinin əhəmiyyətli dərəcədə zəiflədiyini yazıb. Bildirilib ki, Moskva sürətlə tükənən silah ehtiyatları və pisləşən müdafiə balansı səbəbindən yeni tədbirlər görməyə çalışır. İddialara görə, Rusiya 2017-ci ildə Türkiyəyə 2,5 milyard dollara satdığı S-400 hava hücumundan müdafiə sistemlərini geri qaytarmağa çalışır.
Xatırladaq ki, Türkiyə 2017-ci ildə Rusiya ilə S-400 hava hücumundan müdafiə sistemi ilə bağlı 2,5 milyard dollarlıq müqavilə imzalayıb. İlk partiya 2019-cu ilin iyul ayında Ankaradakı Mürted hava bazasına gətirlib və bu, Türkiyə ilə ABŞ arasında kəskin böhrana səbəb olub.
S-400 alışından sonra Vaşinqton Türkiyəni F-35 qırıcı təyyarələri proqramından çıxarıb. Türkiyə F-35 üçün təxminən 1,4 milyard dollar ödəsə də, ABŞ bu pulu geri qaytarmayıb.
TAHİR
