İlyas Hüseynov: “Burada təhlükəsiziyi təmin etmənin iş prinsipləri, mandatı yönündə açıq suallar ola bilər”
Uzun müddətdir ki, Azərbaycanın Qəzzaya sülhməramlı qüvvə göndərib-göndərməməsi məsələsi gündəmdədir. Xarici mediada Azərbaycan sülhməramlılarının Qəzzaya göndərilə biləcəyi barədə xəbərlər dərc edilib.
"Axios" portalının məlumatına görə, ABŞ rəhbərliyi dekabrın 25-dək Qəzza üzrə “ikinci mərhələnin” başlanmasını elan etməyi planlaşdırır.
Azərbaycanın Qəzzaya sülhməramlı qüvvələr göndərməsi məsələsi ilə bağlı yayılan xəbərlərə Azərbaycanın xarici işlər naziri Ceyhun Bayramov Bakıda iranlı həmkarı Abbas Əraqçi ilə birgə mətbuat konfransında aydınlıq gətirib. Nazir bildirib ki, Azərbaycan ABŞ-dan Qəzzada sülhməramlı missiyada iştirak üçün dəvət alıb və ölkəmiz bu dəvəti alan ilk ölkələrdən biri olub: “Lakin bizi maraqlandıran məsələlərlə bağlı sorğular göndərmişik. Suallarımıza cavab olmadığından hazırda Qəzzaya Azərbaycan kontingentinin göndərilməsi ilə bağlı heç bir qərar yoxdur”.
Nazir Azərbaycanın sualına hələ cavab verilmədiyini deyib.
Bu məsələdə Azərbaycanı təxminən hansı suallar maraqlandıra bilər? Azərbaycan nə barədə suallar göndərə bilər?
“Hələ ki, Azərbaycanı qane edən cavablar olmadığı üçün bu missiya da göndərilmir”
Politoloq İlyas Hüseynov “Bakı-Xəbər”ə bildirdi ki, Azərbaycanın xarici işlər naziri Ceyhun Bayramov iranlı həmkarı Abbas Əraqçi ilə keçirdiyi mətbuat konfransında bir sıra mühüm məqamlara toxunub, önəmli sualları cavablandırıb və Azərbaycanın Qəzzaya sülhməramlı kontingent göndərməsi ilə bağlı açıq qalan suala da aydınlıq gətirib. “Nazirin dediyinə görə, bir sıra suallar ünvanlanıb və bu müvafiq sualların hələ cavabı olmadığından kontingentin göndərilməsi ilə bağlı məsələ də hələ açıq qalmaqdadır. Hesab edirəm ki, burada təhlükəsiziyi təmin etmənin iş prinsipləri, mandatı yönündə açıq suallar ola bilər. Məsələnin siyasi, geopolitik və təhlükəsizlik, eləcə də hərbi əhəmiyyəti çox yüksəkdir. Lakin nəzərə almaq lazımdır ki, Azərbaycan artıq sülh quruculuğu prosesində böyük təcrübə qazanıb. Kosovo, Əfqanıstan, İraq coğrafiyasında çox çətin bölgələrdə strateji əhəmiyyətli obyektlərin qorunmasında Azərbaycan hərbiçiləri böyük peşəkarlıq nümayiş etdiriblər”.
İ.Hüseynov qeyd etdi ki, 44 günlük Vətən müharibəsində, 23 saatlıq lokal xarakterli antiterror tədbirlərində Azərbaycan hərbiçiləri real döyüş şəraitində təcrübə qazanıblar. İ.Hüseynovun sözlərinə görə, bu səbəbdən də Azərbaycanın təcrübəsinə böyük ehtiyac hiss olunur. “Bunu da deməliyəm ki, sülhməramlı kontingentin göndərilməsi ilə bağlı ən birinci müraciət olunan dövlətlərdən biri də elə Azərbaycan olub. Çox çətin, həssas geosiyasi bölgədə təhlükəsizliyin təmin olunması Azərbaycanın beynəlxalq sülh imicinə, nüfuzuna da müsbət təsir edə bilər. Hesab edirəm ki, Azərbaycanın bütün narahatlıqları, açıq qalan suallar cavablandırıldıqdan sonra bu kontingentin göndərilməsinə müsbət yanaşıla bilər. Hələ ki, Azərbaycanı qane edən cavablar olmadığı üçün bu missiya da göndərilmir”-deyə İ.Hüseynov qeyd etdi.
İradə SARIYEVA
