Aydın Hüseynov: "Azərbaycan–Slovakiya münasibətlərinin son illərdə qazandığı dinamika yeni əməkdaşlıq mərhələsinin formalaşdığını göstərir"
“Azərbaycan Cənubi Qafqazın ən böyük iqtisadiyyatına malik ölkədir. O, Asiya və Avropa ilə kəsişmədə yerləşir və zəngin enerji resurslarına malikdir". Bu sözləri Slovakiya Prezidenti Peter Pelleqrini Azərbaycan Prezidenti İlham Əliyev ilə mətbuata bəyanatında söyləyib.
"Çox şadam ki, bizim ticarət dövriyyəmiz artmaqdadır və ciddi artım var. Biz qeyd etdik ki, bu sahədə hələ də istifadə edilməmiş potensial var" deyə Peter Pelleqrini əlavə edib.
“...Əməkdaşlığın daha geniş çərçivədə inkişafına təkan vermək gücünə malikdir”
Mövzu ilə bağlı fikir bildirən millət vəkili Aydın Hüseynov "Bakı-Xəbər"ə açıqlamasında qeyd etdi ki, Azərbaycan–Slovakiya münasibətlərinin son illərdə qazandığı dinamika yeni əməkdaşlıq mərhələsinin formalaşdığını göstərir: "Cənubi Qafqazın ən iri iqtisadiyyatına malik olan Azərbaycan enerji resursları və nəqliyyat imkanları ilə Avropa üçün strateji tərəfdaşa çevrilib. Bu reallığı Slovakiya Prezidenti Peter Pelleqrini Bakıda Prezident İlham Əliyevlə birgə çıxışında xüsusi vurğuladı. Onun “ticarət dövriyyəmiz artmaqdadır və ciddi artım var” sözləri iki ölkə arasında iqtisadi əlaqələrin artdıgını təsdiq edir. Enerji təhlükəsizliyi, yaşıl enerji, tranzit marşrutları, sənaye və xidmət sektorlarında əməkdaşlıq imkanları qarşılıqlı maraq doğurur. Azərbaycanın regionda formalaşdırdığı böyük infrastruktur layihələri Slovakiya kimi Avropa ölkələri üçün yeni bazarlar və yeni tərəfdaşlıq imkanları yaradır. Bu gün iki dövlətin siyasi dialoqu iqtisadi əməkdaşlıqla tamamlanır, iqtisadi əməkdaşlıq isə real layihələrə çevrilməkdədir. Ticarətin artması qarşılıqlı etimadın güclənməsi deməkdir. Azərbaycanla Slovakiya arasında qurulan körpü Avropa–Qafqaz əməkdaşlığının daha geniş çərçivədə inkişafına təkan vermək gücünə malikdir".
Günel CƏLİLOVA
