Vüqar Bayramov: “Həm Slovakiyaya, həm də onun qonşularına daha çox qaz nəql etmək niyyətindədir”
Azərbaycan öz xarici siyasət prioritetlərini çoxdan müəyyən edib. Eyni zamanda, bu gün Şərq ilə Qərb arasındakı müəyyən bir körpü rolunu oynayırıq. Bu fikirləri Prezident İlham Əliyev Slovakiya Prezidenti Peter Pelleqrini ilə mətbuata bəyanatında söyləyib.
Dövlət başçısının fikrincə, infrastruktur, bağlantılar, nəqliyyat sektoruna qoyduğumuz sərmayə bu gün imkan verir ki, Azərbaycan Şərq-Qərb nəqliyyat dəhlizinin önəmli parçasına çevrilsin: “Biz Orta Dəhliz layihəsində fəal iştirak edirik. Mərkəzi Asiyanı Avropa ilə birləşdirən ən etibarlı və ən təhlükəsiz marşrut Azərbaycan ərazisindən keçir. Azərbaycan qazını almış ölkələrin sayı 14-ə çatıb və boru kəmərləri ilə ixrac edilən qazın təchizatçısı olan ölkə olaraq biz birinci yerdəyik. Yeni qaz yataqlarının işlənməsi nəticəsində əlavə resurslar əldə ediləcək və təbii ki, həm Slovakiyaya, həm onun qonşularına Azərbaycan qazının təchizatı daha da böyük həcmdə mümkün olacaqdır”.
Göründüyü kimi, Avropa ölkəsi olan Slovakiyaya daha böyük həcmdə qazın ixrac edilməsi gözlənilir.
“İqtisadi potensialı nəzərə alsaq, tərəflər arasında ticarət dövriyyəsini daha da artırmaq üçün ciddi imkanlar var”
Sözügedən məsələni “Bakı-Xəbər”ə şərh edən millət vəkili Vüqar Bayramovun fikrincə, son illər iki ölkə arasında siyasi və iqtisadi əlaqələrin daha da dərinləşməsi müşahidə olunmaqdadır: “Regionun enerji təhlükəsizliyinin güclənməsinə xüsusi töhfə verən Azərbaycan hazırda 14 ölkəyə, o cümlədən Slovakiyaya qaz nəql edir. Azərbaycan həm Slovakiyaya, həm də onun qonşularına daha çox qaz nəql etmək niyyətindədir. Azərbaycan ilə Slovakiya arasında yalnız enerji deyil, iqtisadiyyatın fərqli sahələrində əməkdaşlığın gücləndirilməsi imkanları var. Ötən il ölkələr arasında ticarət dövriyyəsi 46 milyon dollar olub. Bu ilin ilk 9 ayında isə 31 milyon dollara yaxın dövriyyə qeydə alınıb. İqtisadi potensialı nəzərə alsaq, tərəflər arasında ticarət dövriyyəsini daha da artırmaq üçün ciddi imkanlar var. Prezident İlham Əliyevin Slovakiyaya səfəri yalnız ikitərəfli münasibətlərdə deyil, bütövlükdə Mərkəzi və Şərqi Avropa dövlətləri ilə əlaqələrdə yeni səhifə açacaq. Bütövlükdə, ölkəmizin Mərkəzi və Şərqi Avropanin enerji təhlükəsizliyinin formalaşmasındakı rolu daha da artmaqdadır. Bu, Azərbaycanın strateji mövqeyini daha da möhkəmləndirir. Azərbaycan bir tərəfdən regional dəhlizlərin genişlənməsinə töhfə verir, digər tərəfdən isə Mərkəzi və Şərqi Avropanın enerji təhlükəsizliyinin formalaşmasına xüsusi dəstək verir. Bunun nəticəsidir ki, dünyada 14 ölkə Azərbaycandan qaz idxal edir. Onlardan 8-i Avropa İttifaqının üzvü olan ölkələrdir. Azərbaycan həm Slovakiyaya, həm də onunla qonşu olan ölkələrə daha çox qaz ixrac etmək potensialına malikdir. Çünki ölkəmizdə mavi qaz hasilatında artımlar müşahidə edilir. Bu da qaz ixracının genişlənməsi üçün zəmin yaradır. O üzdən hesab edirəm ki, Slovakiyaya qaz ixracı daha da artacaq. Digər tərəfdən, Azərbaycanın Avropanın enerji təhlükəsizliyində rolunun daha da artacağı gözlənilir”.
Vidadi ORDAHALLI
