İbrahim Rüstəmli: “Azərbaycanın qələbəsini kiçiltmək, ona kölgə salmaq üçün uydurmadıqları yalan yoxdur, bu əsassız iddia da onlardan biridir”
Türkiyə Silahlı Qüvvələrinin tanınmış komandanlarından biri Bəxtiyar Ersaya Türkiyə Prezidenti tərəfindən orgeneral (ordu generalı) rütbəsi verilməsi Ermənistandakı bəzi dairələri ciddi narahat etməyə başlayıb və onlar bununla bağlı yalanlar, hədyanlar danışmaqda davam edirlər.
B.Ersayın yeni hərbi rütbə alması ilə bağlı erməni deputat Tiqran Abramyan həqiqətə uyğun olmayan, gerçəklikdən uzaq fikirlər səsləndirib.
Ermənilər Bəxtiyar Paşaya oldu generalı rütbəsinin verilməsini, guya Qarabağ müharibəsində Türkiyənin iştirakına bir sübut kimi təqdim edirlər.
Bundan böyük saxtaklarlıq olar? Bu qədər yalan danımağı necə bacarırlar, adam məəttəl qalır.
Bütün dünya bilir ki, qardaş Türkiyə 44 günlük Vətən müharibəsində Azərbaycanın haqq işinə yalnız mənəvi dəstək verib.
Qeyd edək ki, Bəxtiyar Ersay Paşa uzun illər Türkiyənin cənub-şərqində, İraq və Suriyada PKK terror təşkilatına qarşı aparılan hərbi əməliyyatlarda fərqlənib. O, terrora qarşı mübarizədə qazandığı təcrübə və peşəkarlığı ilə tanınıb.
“Biz bu qələbəni Azərbaycan oğullarının canı, qanı bahasına qazanmışıq”
Hərbi ekspert İbrahim Rüstəmli “Bakı-Xəbər”ə ilk növbədə onu bildirdi ki, ermənilər onsuz da həmişə bizim qələbəmizə kölgə salmağa cəhd edirlər, Türkiyənin guya bu müharibədə iştirak etdiyini iddia edirlər. “Ermənilər bir şeyi anlamırlar ki, müharibə müasir dövrün tələblərinə uyğun şəkildə aparılır. Hər şey dünyanın gözü önündə baş verib.
Azərbaycan müstəqil bir dövlət olaraq dünyanın bir sıra ölkələri ilə bu və digər səviyyələrdə strateji hərbi əməkdaşlıq haqqında müqavilələr imzalayıb. Bu müqavilələr ona dövlət sənədi olaraq öz tərəfdaşlarını müharibə zamanı, çətin dövrlərdə öz yanında görmək imkanı verir. Məsələn, Türkiyə ilə Azərbaycan arasında strateji müttəfiqlik bəyannəməsi, sənədi var. O sənəddə qeyd olunur ki, Azərbaycan Respublikasının ərazisinə hər hansı bir hərbi təcavüz Türkiyə respublikası ərazisinə təcavüz kimi dəyərləndiriləcək, yaxud əksinə, Türkiyə ərazisinə hərbi təcavüz Azərbaycan ərazisinə hərbi təcavüz kimi dəyərləndiriləcək. Bunlar hüquqi aktlar, normativ hüquqi sənədlərlə həyata keçirilən məsələlərdir. Bu məsələlərdə ermənilərin mövqeyi ənənəvi olaraq birmənalı deyil...Ümumiyyətlə, ermənilər hər zaman bu cür şər-böhtan səsləndirirlər. Onların Azərbaycanın qələbəsini kiçiltmək, ona kölgə salmaq üçün uydurmadıqları yalan yoxdur, bu əsassız iddia da onlardan biridir.
Türkiyə bu müharibədə Azərbaycana mənəvi dəstək verib və ermənilərin indi ortaya atdığı iddialar tamamilə saxtakarlıqdan, yalandan ibarətdir”.
Vaxtilə ermənilərin Azərbaycan torpaqlarını öz havadarlarının köməyi nəticəsində işğal etdiyini xatırladan İ.Rüstəmli vurğuladı ki, Azərbaycan onlardan fərqli olaraq öz ordusunun, öz əsgərlərinin gücünə o torpaqları işğaldan azad edib. “Ermənilər bizim torpaqları Rusiyanın yaxından köməyi ilə işğal edib. Birinci Qarabağ müharibəsinin iştirakçısı kimi tam məsuliyyətimlə deyirəm ki, biz o vaxt Zəngəzura qədər gedib çıxmışdıq, amma Rusiyanın buna müdaxiləsi nəticəsində öz tormaqlarımızı itirdik. Azərbaycan 44 günlük Vətən savaşına çox ciddi hazırlaşmışdı. Əvvəlcə informasiya təhlükəsizliyi sayəsində biz çox strateji tədbirlər həyata keçirdik, sonra müharibənin özünü etdik. 44 gündə zəfər qazanmağımızın arxasında Azərbaycan xalqının və Prezidentinin vahidliyi, birliyi dayanır, bu qələbə bu birliyin nəticəsində qazanıldı. Ermənilər nə deyirlər desinlər, onların danışdıqları yalanlar həqiqəti dəyişməz. Bu qələbənin əsas müəllifi Azərbaycandır. Bəli, biz Türkiyə, İsrail, Pakistan və sair dövlətlərdən mənəvi dəstək almışıq. Amma bu o demək deyil ki, israillilər, pakistanlılar, türkiyəlilər gəlib bizim əvəzimizə döyüşüblər, xeyr, döyüşməyiblər. Biz bu qələbəni Azərbaycan oğullarının canı, qanı bahasına qazanmışıq. Bu qələbə Azərbaycan xalqının ana südü kimi halal haqqıdır. Ermənilərin şər, böhtan dolu fikirlərinə əhəmiyyət vermək lazım deyil. Onlar həmişə boş-boş danışırlar”-deyə İ.Rüstəmli qeyd etdi.
İradə SARIYEVA
