Əli Orucov: "Qeyri-sabit və mürəkkəb bir dünyada hadisələrə təsir göstərən və dünya düzənini şəkilləndirən güclərin dialoqda olmaları müsbət tendensiyalara yol açır"
Vladimir Putin və Donald Tramp arasında rəsmi olaraq görüş barədə razılıq əldə edildiyi haqda məlumatlar hələ təsdiqlənməyib.
Vladimir Putinin müşaviri Yuri Uşakov bildirib ki, Putin və Trump arasında görüş “yaxın günlərdə”, ola bilsin gələn həftə baş tutsun və görüş yeri olaraq Birləşmiş Ərəb Əmirlikləri (BAE) nəzərdən keçirilir.
AP News-a görə, Putin görüşün gələn həftə ola biləcəyini istisna etməyib və BƏƏ bu görüş üçün mümkün yer kimi nəzərdə tutulur.
Ümumilikdə qeyd edilir ki, görüş hələ təsdiqlənməyib, lakin tərəflər prinsipcə razılığa gəlmiş kimi görünürlər - ancaq detalları (tarix, yer, format və s.) hələ dəqiq məlum deyil.
Putinlə Trampın görüşünun belə tez baş tutması mümkündurmü?
Baki-xeber.com saytına məsələni şərh edən politoloq Əli Orucov bildirdi ki, Tramp Putinlə görüşə çoxdan can atır: "Birləşmiş Ştatlar prezidentinin özünün də marağındadır ki, seçki öncəsi verdiyi sözü tutduğunu göstərsin və barışcıl imicini möhkəmləndirə bilsin. Tramp hələ hakimiyyətə gəlməzdən öncə öz sələfi Baydeni sərt şəkildə tənqid edərək, Ukrayna-Rusiya müharibəsini bir həftəyə həll edəcəyini bəyan etmişdi. Ancaq göründüyü kimi, aradan aylar ötməsinə baxmayaraq, o nəinki müharibəni bitirməyib, qısa fasilə ilə də olsa dayandıra bilmədi. Hətta cəbhə xəttində vəziyyət daha intensiv və rəhmsiz xarakter aldı. Üstəlik, nüvə təhdidi də getdikcə artmaqdadır. Tramp Ukraynadan istədiyini aldı. Təhlükəsizlik zəmanəti vermədən kommersiya maraqlarını təmin etdi, mineral torpaqların istismarı ilə bağlı müqavilə bağladı. Ağ Ev rəhbəri istəyir ki, Putinlə də əlverişli ticari sövdələşmə qazana bilsin. Rusiyanın zəngin resursları biznesmen olan Trampın hədəfindədir. Onu daha çox qazanc düşündürür. Putin Trampın nəyə can atdığını və nə istədiyini bildiyindən bu təmaslardan qaçır. Çünki Putinin də öz planları və istəkləri var. Onları Birləşmiş Ştatlara qurban verməz. Ancaq istənilən halda, hər iki liderin görüşü baş tutarsa hansısa razılaşmalara gəlinməsi mümkün olar. Müharibəni dayandırmaq və danışıqlar prosesinə başlamaq üçün ilk növbədə dialoq və etimad mühiti yaratmaq lazımdı. Əgər Tramp-Putin görüşü məlumat verildiyi kimi baş tutarsa, hesab edirəm ki, bu mühit üçün fürsət olar. Təbii ki, ələ alınacaq təkcə Ukrayna-Rusiya mövzusu olmayacaq, digər qlobal və aktual problemlər də müzakirə ediləcək. Qeyri-sabit və mürəkkəb bir dünyada hadisələrə təsir göstərən və dünya düzənini şəkilləndirən güclərin dialoqda olmaları müsbət tendensiyalara yol açır. Düşünürəm ki, Moskva da müzakirələrə hazır olmalıdır. Əks halda bundan sonra da çox şeylər itirər".
Akif NƏSİRLİ
