Ermənistanın Baş naziri Nikol Paşinyan ABŞ-a səfəri çərçivəsində Vaşinqtonda yerləşən Müqəddəs Kitab Muzeyinə baş çəkib. Səfər zamanı o, muzeyə orta əsrlərə aid olduğu deyilən Qriqor Narekatsinin əlyazmasının surətini hədiyyə edib.
Məlumat üçün bildirək ki, Qriqor Narekatsi (951-1003) erməni mistik və lirik şair, rahib və ilahiyyatçı olub. O, Erməni Apostol və Katolik Kilsələrində müqəddəs kimi hörmət edilir və 2015-ci ildə Papa Fransisk tərəfindən Kilsənin Doktoru elan edilib. Qriqor Narekatsinin fəaliyyəti, gördüyü işlər barəsində sosial mediada məlumat demək olar ki, yoxdur. Bu da həmin şəxsin doğrudan da ilahiyyatçı, rahib olduğuna şübhə yaradır.
Qasım Hacıyev: “Ermənilər təkcə din xadimi deyil, uydurma ictimai-siyasi xadimlər də yaradıblar”
Tarix elmləri doktoru, professor Qasım Hacıyev "Bakı-Xəbər"ə bildirdi ki, Qriqor Narekatsi haqqında məlumat olduqca azdır: “Vaxtilə ermənilər o qədər “erməni mənbələri” yaradıblar ki, onlar hər kəsin gözünü yorub. Horenli Movsesin kitabını əvvəl “Erməni tarixi” , sonra “Ermənistan tarixi” elədilər. Horenli Movses və digərləri şişirdilmiş, saxtalaşdırılmış müəlliflərdir. Onların bir çoxu anonimdir, hətta dedikləri, iddia etdikləri adda şəxs yoxdur.
Ümumiyyətlə, dünya ölkələrini özlərinə çəkə bilmək üçün bu cür uydurmalara əl atıblar”.
Həmsöhbətimizin sözlərinə görə, ermənilər təkcə din xadimi deyil, uydurma ictimai-siyasi xadimlər də yaradıblar: “Almaniyada Qafqaz xalqlarına divan tutan bütün cəlladları milli qəhrəman kimi qələmə verirlər. Onların heç bir sahədə özlərini təbliğ etməyə, yüksək göstərməyə imkanları qalmayıb. Ermənilər din, əlifba, elmin, ədəbiyyatın yaranmasında özlərini birinci kimi təqdim edirlər. Qriqor Narekatsi də uydurma şəxsdir”.
Tural İrfan: “Erməni tarixi saxta olduğu üçün yaratdıqları tarixi şəxsiyyət obrazları da saxtadır”
İlahiyyatçı Tural İrfan “Bakı-Xəbər”ə şərhində bildirdi ki, erməni tarixi saxta olduğu üçün yaratdıqları tarixi şəxsiyyət obrazları da saxtadır: “Özlərindən qədimlik, mədəniyyət, tarix uydurmaq üçün hətta başqa xalqların simalarını belə öz adlarına çıxmaqdan çəkinməyiblər. Hindistanın şimalından və Babilistandan İran vasitəsi ilə Qafqaza gələn ermənilərin tarixi də qondarmadır. Alban dini abidələrini, çox zaman da Alban tarixçiləri, ilahiyyatçıları öz adlarına çıxırlar”.
Günel CƏLİLOVA
