Emin Həsənli: “Yoxlama vuruşu” o deməkdir ki, terrorçu ərazidə mülki əhalini məhv edirsə, onu zərərsizləşdirirlər”
Ermənistanın hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma və digər cinayətlər törətməkdə təqsirləndirilən Ermənistan Respublikasının vətəndaşlarının məhkəməsi davam etdirilir.
Məhkəmədə zərərçəkənlər, əsirlikdən azad edilənlər şahid qismində ifadə verir. Şahid qismində çıxış edən zərərçəkmiş Şərif Əliyev ifadəsində bildirib ki, 2020-ci ildə 44 günlük Vətən müharibəsi zamanı, noyabr ayında Xocavənd istiqamətində yaralanaraq əsir götürülüb. Əsir götürülməzdən əvvəl 4 nəfər hərbçi yoldaşı şəhid olub, özü və daha bir nəfər hərbçi yoldaşı yaralanıb. Ağır vəziyyətdə yaralı olan həmin azərbaycanlı hərbçi Ermənistan silahlı qüvvələrinin hərbçiləri tərəfindən “yoxlama vuruşu” ilə qətlə yetirilib. Maraqlıdır, “yoxlama vuruşu” nədir?
“Azərbaycanlı hərbçi yaralı əsir düşdüyü halda, ermənilər müharibə qanunlarını pozaraq onu "yoxlama vuruşu" ilə qətlə yetiriblər”
“Tərxis Olunmuş Hərbçilərin Gəncləri Maarifləndirmə” İB-nın sədri, hərbçi ekspert Emin Həsənli “Bakı-Xəbər”ə şərhində bildirdi ki, Ermənistan beynəlxalq hüququn ən ağır cinayətlərini törədib. Onlar soyqırımı, işğal, separatizm, hərbi və digər ağır cinayətlərin səbəbkarıdırlar: “Bu səbəbdən də Ermənistan beynəlxalq hüquq qarşısında sərt şəkildə cəzalandırılmalıdır. Ermənistanın keçmiş prezidentləri Koçaryan, Sarkisyan, Levon Ter-Petrosyan Azərbaycan məhkəməsi qarşısında cavab verməlidir. Ermənilər əsir götürdüyü azərbaycanlı hərbçilərə olmazın işgəncələr verib, azərbaycanlı hərbçiləri "yoxlama vuruşu" adı ilə qətlə yetiriblər. "Yoxlama vuruşu" o deməkdir ki, terrorçu ərazidə mülki əhalini məhv edirsə, onu zərərsizləşdirirlər. Sonra onun sağ olub-olmadığını yoxlayırlar. Azərbaycanlı hərbçi yaralı əsir düşdüyü halda, ermənilər müharibə qanunlarını pozaraq onu "yoxlama vuruşu" ilə qətlə yetiriblər. 1990-1994-cu illərdə olduğu kimi, 44 günlük Vətən müharibəsində də Azərbaycan bir erməni mülki əhalisini incitməyib, əsirlərlə normal davranıb. Azərbaycan dövləti erməni əsirləri təhvil verib, hətta meyitlərin ərazidən götürülməsinə belə şərait yaradıb. Qaytarılan əsirlərin üzərində hər hansı bir zorakılıq əlaməti olmayıb, bunun əksini sübut edə bilmədilər. Ancaq onlar Xocalı faciəsi zamanı meyidin üzərində belə dəhşətli əməliyyatlar keçirmişdilər. Bu səbəbdən də hesab edirik ki, Ermənistan etdiyi əməllərə görə cavab verməlidir”.
Günel CƏLİLOVA
