İlyas Hüseynov: “...ABŞ prezidenti Donald Trampın yeni hakimiyyəti dövründə münasibətlərdə yeni mərhələnin başlanmasına ümid formalaşıb”
Prezident İlham Əliyev prezident seçilməsi münasibətilə 2024-cü il noyabrın 6-da Donald Trampa ünvanladığı təbrik məktubunda Azərbaycan Respublikasının Amerika Birləşmiş Ştatları ilə münasibətlərinin hərtərəfli inkişafına xüsusi əhəmiyyət verdiyini bildirib. O, Donald Trampın prezidentliyi dövründə Azərbaycan-ABŞ münasibətlərinin yeni inkişaf mərhələsinə qədəm qoyacağına əminliyini ifadə edib.
Prezident İlham Əliyev, həmçinin qeyd edib: “Biz Birləşmiş Ştatlar ilə qarşılıqlı fəaliyyətimizin böyük potensialından yararlanaraq ikitərəfli tərəfdaşlığımızı bütün sahələrdə, o cümlədən siyasi, iqtisadi-ticari, təhlükəsizlik, enerji, yaşıl və rəqəmsal keçid və digər istiqamətlər üzrə daha da genişləndirmək və dərinləşdirmək əzmindəyik. İnanırıq ki, Sizin yeni prezidentlik dövrünüzdə Azərbaycan ilə Birləşmiş Ştatlar arasında münasibətlər daha da möhkəmlənəcək, yeni əməkdaşlıq sahələri müəyyən olunacaqdır”.
Prezident İlham Əliyev Donald Trampa Amerika Birləşmiş Ştatlarının 47-ci Prezidenti kimi fəaliyyətə başlaması münasibətilə ünvanladığı 2025-ci il 21 yanvar tarixli məktubunda onun gələcək fəaliyyətinin dünyada sülhün təşviqində, beynəlxalq təhlükəsizliyin gücləndirilməsində önəmli rol oynayacağına əminliyini ifadə edib.
Prezident Əliyev Birləşmiş Ştatlarla əməkdaşlığın perspektivlərinə toxunaraq qeyd edib: “Biz həm ənənəvi, həm də yeni əməkdaşlıq sahələri üzrə Birləşmiş Ştatlar ilə fəal və səmərəli birgə işimizi, qarşılıqlı inam və etimada əsaslanan tərəfdaşlığımızı bundan sonra da qətiyyətlə davam etdirmək və Sizinlə bu istiqamətlərdə sıx işləmək niyyətindəyik. İnanıram ki, Sizin yeni prezidentliyiniz dövründə Azərbaycan Respublikası ilə Amerika Birləşmiş Ştatları arasında dostluq və əməkdaşlıq münasibətləri daha da möhkəmlənəcək və yeni məzmun kəsb edəcəkdir”.
Qeyd edək hazırda Azərbaycan Prezidenti İlham Əliyev və Ermənistanın baş naziri Nikol Paşinyan ABŞ-da səfərdədir. Avqustun 8-də ABŞ-da tarixi əhəmiyyətli görüş olacaq. Amma yaxın keçmişdə baş vermiş bəzi hadisələr bugünkü proseslərin əhəmiyyətini və bu proseslərin hazırlanmasında nələrin baş verdiyini bir daha ortaya qoyur.
Avqustun 8-də baş tutacaq həlledici görüşə qədər baş verən mühüm hadisələri xatırlatmaq istəyirik.
Prezident İlham Əliyevin 2024-cü ilin noyabr seçkilərindən sonra və 2025-ci ilin yanvar ayında ABŞ prezidenti D.Trampa ünvanladığı məktubunda belə fikir var - “inanıram ki, sizin prezidentliyiniz dövründə Azərbaycanla strateji münasibətlərdə yeni mərhələ başlanacaq”.
Hazırda həmin mərhələnin əlamətləri necə görünür?
“Böyük ümidlə deyə bilərik ki, onun yeni prezidentliyi dövründə də Azərbaycan və Ermənistan arasında yekun sülh müqaviləsini imzalamaq olar”
Plotoloq İlyas Hüseynov “Bakı-Xəbər”ə bildirdi ki, Azərbaycanla ABŞ arasında münasibətlər inkişaf etməkdədir və bu münasibətlər bir sıra sahələri əhatə edir: “İlk növbədə enerji təhlükəsizliyi sahəsindəki münasibətlərdə inkişaf hiss olunmaqdadır. Eyni zamanda beynəlxalq təhlükəsizlik sahəsində də çox yaxşı iş birliyi formalaşıb. Azərbaycan dünyadakı bir sıra qaynar nöqtələrdə sülhməramlı əməliyyatlara qoşularaq antiterror koalisiyasının sarsılmaz üzvü olduğunu sübuta yetirib. Azərbaycan sülhməramlıları Əfqanıstanı ən sonuncu tərk edən dövlətlərdən biri olub”.
İ.Hüseynovun sözlərinə görə, nəzərə almaq lazımdır ki, burda çox strateji obyektlərin mühafizəsində Azərbaycan sülhməramlıları iştirak edirdi. “Eyni zamanda biz cənab Prezident İlham Əliyevin Donald Trampa ünvanladığı məktublarda da aydın hiss olunan fikirləri diqqətə almalıyıq. Çünki hər zaman qırmızı xətlə keçən fikir bundan ibarətdir ki, ABŞ prezidenti Donald Trampın yeni hakimiyyəti dövründə münasibətlərdə yeni mərhələnin başlanmasına ümid formalaşıb. Bu həqiqətən də belədir. Donald Trampın birinci prezidentliyi dönəmində Azərbaycan Vətən savaşında öz torpaqlarını işğaldan azad etdi və böyük ümidlə deyə bilərik ki, onun yeni prezidentliyi dövründə də Azərbaycan və Ermənistan arasında yekun sülh müqaviləsini imzalamaq olar. Hesab edirəm ki, hətta 8 avqustda keçiriləcək görüşdə Cənubi Qafqazda sülh və quruculuq yolunda böyük bir addım atılacaqdır. Və bu görüş tarixə yazılacaq, Azərbaycan və Ermənistan arasında sülh istiqamətində çox böyük irəliləyişi əks etdirəcəkdir. ABŞ-ın səyi və təşəbbüsləri ilə Cənubi Qafqazda önəmli geosiyasi konfiqurasiyanı qurmaq mümkündür”.
İ.Hüseynov vurğuladı ki, bu həm sərhəd təhlükəsizliyi, həm kommunikasiya xətlərinin açılması və onun təhlükəsizliyi baxımından müstəsna əhəmiyyətə malikdir: “Bir önəmli detalı da xatırlatmaq istəyirəm ki, Prezident İlham Əliyevin Xankəndidə keçirilən III Qlobal Şuşa Media Forumunda Azərbaycan-ABŞ münasibətlərinə dair fikirlərini ABŞ prezidenti özünün sosial şəbəkə hesabında paylaşmışdı. Hesab edirəm ki, bu da çox böyük göstərici sayıla bilər. Eyni zamanda da arzumuz bundan ibarətdir ki, pronozlaşdırılan, ehtimal edilən görüş milli maraqlarımız çərçivəsində yekunlaşsın və ölkəmizə sülh bəxş etsin”.
İradə SARIYEVA
