Azər Həsrət: “Trampın müsbət siqnallar verməsi ondan xəbər verir ki, yaxın zamanlarda atəşkəslə bağlı hansısa razılığa gəlinə bilər”
Məlum olduğu kimi, ABŞ prezidenti Donald Trampın xüsusi nümayəndəsi Steve Witkoffla Rusiya prezidenti Vladimir Putin arasında görüş olub.
Kremlin xarici siyasət müşaviri Yuri Uşakov Rusiya prezidenti Putinin ABŞ prezidenti Trampın Ukrayna üzrə xüsusi nümayəndəsi ilə görüşünün faydalı və konstruktiv keçdiyini ifadə edib: “Ukrayna ilə bağlı bəzi siqnallar verdik. Müvafiq siqnallar Trampdan da alındı" deyib.
Həqiqətən də Trampın nümayəndəsi Witkoffla Putinin arasında "konstruktiv" və "faydalı" danışıqların olduğuna inanmaq olar?
Onu da qeyd edək ki, 3 saat davam edən görüşdən saatlar sonra açıqlama verən Donald Tramp bildirib ki, yaxın günlər və həftələr ərzində Ukraynadakı müharibənin başa çatdırılması üçün fəal səylər göstəriləcək. Doğrudanmı, Rusiya Ukrayna ilə sülhə doğru real addımlar atacaq? Sülh gözlənilirmi?
“3 saatlıq görüşdə ABŞ prezidentinin nümayəndəsi Putinə izah edə bilib ki, qaradan başqa rəng yoxdur, dayanmaq lazımdır”
Siyasi şərhçi Azər Həsrət “Bakı-Xəbər”ə şərhində bildirdi ki, ABŞ prezidenti özünün sosial media platformasında paylaşım edib və bu görüşün müsbət nəticələrlə bitdiyi haqda fikirlərini bölüşüb: “Yəni Tramp da görüşün nəticələrinə müsbət yanaşıb, ümid işığı yarandığını vurğalayıb. Hesab edirəm ki, Tramp belə bir fikirdədirsə, deməli tərəflər razılaşmaya yaxınlaşmaq üzrədir. Əlbəttə, Rusiyaya, Putinə güvənmək olmaz. Ancaq görünən odur ki, 3 saatlıq görüşdə ABŞ prezidentinin nümayəndəsi Putinə izah edə bilib ki, qaradan başqa rəng yoxdur, dayanmaq lazımdır. Görünən odur ki, Putin də bu mesajı alıb, razılıq əlaməti verib ki, Donald Tramp görüşün nəticələrinin yaxşı olduğunu qeyd edir. İnanmaq olar və ya olmaz, bunu zaman göstərəcək. Amma onu da deyim ki, biz heç vaxt Rusiya rəhbərinə inanmamışıq, güvənməmişik. Arzu edirik ki, Ukraynada müharibə bitsin, işğala son qoyulsun. Rusiya Ukraynaya kompensasiya ödəsin. Ukrayna xalqı axır ki, öz rahatlığına qovuşsun. Şəxsən mən bunun yaxın müddətdə gerçəkləşəcəyini proqnozlaşdırmaqda çətinlik çəkirəm. Ancaq istənilən halda atəşkəs olacaqsa, bunun özü uğur kimi dəyərləndirilməlidir. Trampın müsbət siqnallar verməsi ondan xəbər verir ki, yaxın zamanlarda atəşkəslə bağlı hansısa razılığa gəlinə bilər. Gözləyək, görək”.
Günel CƏLİLOVA
