Akif Nəsirli: “Rusiya mediasının məsələni necə yozmasından asılı olamayaraq, heç vaxt Azərbaycan fermerlərinin dövlətlə bağlı mövqeyini sarsıda bilməz”
Rusiya mediası Azərbaycan əleyhinə kampaniyanı günü-gündən daha da genişləndirir. Biz bu ölkənin mediasından özümüzə qarşı yalnız qərəz, qarayaxma, qeyri-obyektiv münasibət görürük.
Ölkəmizin daxilində baş verən kiçik bir problemi belə Rusiya mediası tamamilə başqa cür yozur və bundan Azərbaycan hakimiyyətinin əleyhinə istifadə etməyə cəhdlər edir.
Lerikin hansısa kəndində yaranmış vəziyyətlə əlaqədar yerli medianın obyektiv olaraq işıqlandırdığı bir məlumatdan Rusiya mediası sui-istifadə edib fermerləri Azərbaycan hakimiyyətinin əleyhinə qaldırmaq niyyətini ortaya qoyur.
Düzdür, fermer çətin vəziyyətdədir, çıxılmaz durumdadır, amma onları hökumətin əleyhinə qaldırmaq nə deməkdir? Özü də rus mətbuatı belə qələmə verir ki, guya Rusiya ilə münasibətləri korlayan Azərbaycan höküməti olub və Azərbaycan hakimiyyəti münasibətləri korlamasaydı, Azərbaycan fermerlərinin əkib-becərdiyi pomidor onların əllərində qalmayacaqdı, onlar bunu sata biləcəkdilər. Fermerlər əkib-becərdikləri pomidorları satsınlar deyə biz Rusiyanın hər kaprizinə, hər qərəzinə dözməli idik?
Rusiya mediası hansısa bir Azərbaycan fermerinin üzləşdiyi çətinliyi özü istədiyi kimi yozur. Məsələyə qərəzli şəkildə yanaşaraq Rusiya ilə Azərbaycanın münasibətlərinin soyuqlaşmasına görə məsuliyyəti ölkəmizin üzərinə qoymağa cəhd edir və fermerləri qızışdırıb ayağa qaldırmaq istəyirlər. İddia edirlər ki, əgər Azərbaycan hakimiyyəti Rusiya ilə münasibətləri soyuqlaşdırmasaydı fermerlər özləri yol tapıb mallarını Rusiya bazarına çıxara bilərdilər. Yalnız pomidorun timsalında danışırlar və bol məhsul olduğunu deyirlər.
Rusiyanın media orqanları bunu Azərbaycanın əlehinə yönəldir və yerli əhalini, o cümlədən də fermerləri yavaş-yavaş qızışdırmağa başlayırlar ki, sizin mallarınızın əllərinizdə qalmağının səbəbkarı Azərbaycan hakimiyyətidir, Azərbaycan hakimiyyəti Rusiya ilə münasibətləri belə soyuqlaşdırmasaydı bunlar baş verməzdi.
Özü də rus mətbuatı Azərbaycanın yerli mediasında getmiş məlumatları bu cür yanlış təfsir edir, bu cür şərh edirlər.
“Heç məhsulu bostanda zay olan fermerlərimiz də istəməz ki, dövlətimiz haqlı tələblərindən geri çəkilsin”
Liberal İqtisadçılar Mərkəzinin rəhbəri Akif Nəsirli “Bakı-Xəbər”ə bildirdi ki, əslində rus mediası Azərbaycanın kənd təsərrüfatı məhsullarının Rusiyaya idxalının qarşısının alınması ilə Rusiya hökumətinin ölkəmizə siyasi təzyiq etdiyini birbaşa etiraf edir: “Rusiya hökuməti Azərbaycan fermerlərinin məhsullarını, konkret olaraq pomidoru ölkəsinə ona görə buraxmır ki, Azərbaycan Rusiyanın dediklərini qəbul etmir, onun sözü ilə davranmır, öz müstəqil siyasətini yürüdür. Bu özü geosiyasi mənada biabırçılıqdır. Əslində iqtisadi məsələlər siyasi məqsədlərin alətinə çevrilməməlidir. Bu onu göstərir ki, Rusiyanın siyasi hakimiyyəti hələ də orta əsrlər səviyyəsində dövlət siyasəti yürüdür. Bu, məsələnin bir tərəfi, digər tərəfinə gəlincə, biz Rusiya kimi oğru qanunları ilə idarə olunan ölkənin tələblərinə tabe olmalı idik ki, Azərbaycan fermerinin əkib-becərdiyi pomidor Rusiya bazarında satılsın? Tutaq ki, biz ötən ilin dekabr ayında sərnişin təyyarəmizin Qroznı səmasında Rusiya Hava Hucumundan Müdafiə qurğusu ilə vurulmasının məsuliyyətinin Rusiyanın üzərinə düşdüyünü, Rusiyanın buna görə gərəyi olan addımlar atmalı olduğunu tələb etməməli idik ki, bizim pomidorumuz Rusiya bazarlarında satılsın? Xeyr, biz dövlət olaraq ən doğru seçimi etmişik. Bu gün Azərbaycan fermerinin istehsal etdiyi bütün məhsulları Rusiya geri qaytarsa da Azərbaycan müstəqil siyasətindən geri dönməməlidir, Azərbaycan Rusiya ilə bağlı götürdüyü siyasi kursdan yayınmamalıdır. Bunu Azərbaycan vətəndaşı da anlayışla qaşılayacaq. Bizim günahsız vətəndaşlarımızı öz səmasında qəsdən vuran və bu hadisənin törədilməsində məsuliyyət daşıyan şəxslərin heç birini cəzalandırmayan, təyyarə hadisəsi zamanı həyatını itirən şəxslərin özlərinə və ailələrinə qanuni təzminat ödəməkdən boyun qaçıran Rusiyanın qarşısından ölkəmizin geri çəkilməsini heç bir Azərbaycan vətəndaşı qəbul etməz. Heç məhsulu bostanda zay olan fermerlərimiz də istəməz ki, dövlətimiz haqlı tələblərindən geri çəkilsin”.
A.Nəsirli qeyd etdi ki, o təyyarədə həlak olanlar, zərər çəkənlər fermerlərin də yaxınları, əzizləri sayılır. “Azərbaycan hökuməti tələblərimizi yerinə yetirənə qədər Rusiyanın yaxasından əl çəkməməlidir. Bunu bütün vətəndaşlarımız istəyir, fermerlərimiz də həmçinin. Bu baxımdan, hesab edirəm ki, Rusiya mediasının bu təxribatlarının heç bir təsiri ola bilməz. Çünki Rusiyaya münasibətdə vətəndaşlarımızla dövlət eyni mövqedədir. Rusiya mediasının məsələni necə yozmasından asılı olamayaraq, heç vaxt Azərbaycan fermerlərinin dövlətlə bağlı mövqeyini sarsıda bilməz. Yəni heç fermerlərimiz də istəməz ki, biz Rusiyanın qarşısından çəkilək. Xalqımızın tələbi yerindədir və Rusiya təyyarəmizin vurulmasına görə bütün öhdəlikləri yerinə yetirməli, təyyarəmizi vuranları cəzalandırmalı, təzminat ödəməlidir. Dövlətimiz düzgün mövqedədir”.
Azərbaycanın Cənubi Qafqazın lider dövləti olduğunu vurğulayan A.Nəsirli qeyd etdi ki, ölkəmiz müstəqil siyasət yürüdür və Rusiyanın kurasiyasında olan dövlət deyil. “Hesab edirəm ki, bu doğru siyasi kursdur. Biz o kursu davam etdirməliyik. O ki qaldı Azərbaycan fermerlərinin üzləşdikləri problemə, bu problemi hökumətli-fermerli bir yerdə xüsusi qaydalarla təhlil etməliyik. Elə götürək, pomidor satışı məsələsini, Azərbaycan fermeri artıq Avropa, dünya standartlarına uyğun məhsul istehsalına başlamalıdır ki, məhsulu Rusiya bazarına buraxılmayanda Avropa bazarına ixrac edilə bilsin. Bu bizim əsas hədəfimiz olmalıdır. Bizim problemimiz odur ki, biz oğru qanunları ilə idarə edilən Rusiyanın bazarları üçün pomidor istehsal edirik. Bu asılılıqdan qurtarmaqdan ötrü Azərbaycanda dünya standartlarına uyğun kənd təsərrüfatı məhsullarının istehsal edilməsinə nail olmalıyıq”-deyə A.Nəsirli vurğuladı.
İradə SARIYEVA
