Rusiya onlarla pilotsuz uçuş aparatı (PUA) ilə Rumıniya ilə sərhədin yaxınlığındakı qaz nəqli infrastrukturu obyektinə hücum edib. Bu stansiya vasitəsilə Ukraynaya ABŞ və Azərbaycandan qaz tədarük olunurdu.
Ukrayna Energetika Nazirliyinin bəyanatına görə, avqustun 6-na keçən gecə Rusiya qaz infrastrukturu obyektinə - Rumıniya sərhədi yaxınlığındakı Odessa vilayətində yerləşən Ukraynanın GTS operatorunun kompressor stansiyasına məqsədyönlü hücum həyata keçirib.
Bu kompressor stansiyası artıq ABŞ-dan LNG və Azərbaycan qazının sınaq həcmlərini tədarük edən Trans-Balkan qaz kəməri vasitəsilə Yunanıstanın LNG terminallarını Ukrayna qaz anbarları ilə birləşdirən marşrutun bir hissəsi idi.
Avqustun 6-da bu təchizatları təmin edən avadanlıq Rusiyanın onlarla hücum PUA-sı tərəfindən hücuma məruz qalıb.
“Bu, Rusiyanın sırf mülki infrastruktura, konkret olaraq enerji sahəsinə və eyni zamanda, Azərbaycan, ABŞ və Avropadakı tərəfdaşları ilə münasibətlərə, ukraynalıların və bütün avropalıların normal həyatına zərbəsidir”, - deyə bəyanatda bildirilir.
Ukraynanın energetika naziri Svetlana Qrinçuk vurğulayıb ki, bu hücum 2027-ci ildə Rusiya təbii qazından tamamilə imtina etməyi planlaşdıran bütün Avropaya verilən bir siqnaldır.
“Əgər ruslara bizim enerji infrastrukturumuzu və qaz marşrutlarımızı cəzasızlıq şəraitində vurmağa icazə verilsə, o zaman Avropada heç bir infrastruktur obyekti təhlükəsiz olmayacaq. Cəzasızlıq yalnız terroru genişləndirir”, -deyə nazir qeyd edib.
ZÜMRÜD
