Məhərrəm Zülfüqarlı: “Babək islama qarşı deyil, ərəb işğalına, istilaya, qəsbkarlara qarşı Vətəninin azadlığı naminə mübarizə aparıb”
Azərbaycanın Xalq Qəhrəmanı Babəkin həyatı ilə bağlı Türkiyədə çəkilməsi planlaşdırılan serial təxirə salınıb. “Bozdağ Yapım”ın lentə alacağı serial ərəb iş adamlarının sərt etirazına görə ləğv edilib.
"Tabii" platformasında yayımlanması planlaşdırılan ekran işində baş rolu İlan Şən canlandıracaqdı.
Bəllidir ki, Xürrəmilər hərəkatının rəhbəri Babək Ərəb Xilafətinə qarşı Cənubi Azərbaycandakı azadlıq mübarizəsinə rəhbərlik etmiş sərkərdə olaraq tarixə düşüb.
Türkiyədə Babək haqda film çəkilməli imiş, ona da ərəb iş adamları mane olub və filmin çəklişi qeyri-müəyyən vaxta qədər təxirə salınıb.
Siyasət xatirinə tarixə natamam baxış və ya tarixin saxtalaşdırılması nə qədər doğrudur? Məgər Babək vuruşmayıb?
“Etiraz edən ərəblər bilməlidirlər ki, IX əsrdə artıq…”
Tarix elmləri doktoru, professor Məhərrəm Zülfüqarlı “Bakı-Xəbər”ə bildirdi ki, bu olduqca aktual mövzudur və həmişə Babəkə qarşı sağdan-soldan hücuma keçildiyini müşahidə edirik. “Qəribə hal odur ki, Azərbaycan xalqı öz qəhrəmanlarına sahib çıxdıqca xaricdən buna müdaxilələr olur. Məsələn, ərəblərə keçməzdən əvvəl deyim ki, kommunist rejimi Babəki özününküləşdirmişdi. Deyirdilər ki, Xürrəmilər feodal zülmlərinə və azadlıq uğrunda mübarizə aparıb, kommumistlər də bu mübarizəni aparırlar. Babək qırmızı bayraq qaldırıb, kommunistlər də. Belə iddilar vardı. Hətta kommunist tarixçi tərəfindən “Babək və Babəkizm, Azərbaycanda kommunist hərəkatı - IX əsr” adlı bir əsər yazılmışdı. Yəni belə bir məsələ kommunist rejimi dövründə də vardı.
İran İslam Respublikası Babəki “şiəliyin davamçısı” kimi qələmə verir və guya İmam Hüseynin intiqamını almaq uğrunda mübarizə apardığını iddia edir, bunu da şiəlik təliminin tərəfdarı kimi göstərirlər.
Bu yazılanları oxuduqca bilməliyik ki, ərazilərimizi işğal edib xalqımızı istismar edənlərə, torpaqlarımızı qəsb edənlərə qarşı mübarizə aparan Babək Azərbaycan xalqının qəhrəmanıdır.
Qaldı Türkiyənin Babək haqda film çəkməsinə, bu təqdirəlayiq haldır. Amma çox təəssüf ki, onlar xarici təzyiqlərə görə filmin çəkilişlərini dayandırıblar, amma gərək dayandırmaya idilər. Nəyə görə? Birincisi, əgər buna etiraz edən ərəb iş adamları həqiqətən də müsəlmandırlarsa qəbul etməlidirlər ki, Babəkin rəhbərlik etdiyi hərəkat 816-cı ildə olub, amma Azərbaycan ərəblər tərəfindən tam olaraq 705-ci ildə işğal edilib. Babək elə bir dövrdə yaşayırdı ki, artıq islam dini qəbul olunmuşdu. Babək özü də müsəlman idi və öz adı Həsən, qardaşının adı Abdulla idi. Burda islama aid heç bir şey yoxdur. Çünki çox zaman qarışdırırlar ki, Xürrəmilər islama qarşı mübarizə aparıblar, xeyr, Xürrəmilər işğala, işğalçılara qarşı, Vətənin azadlığı uğrunda mübarizə aparıblar. İkincisi, etiraz edən ərəblər bilməlidirlər ki, IX əsrdə artıq Ərəbistanda islam dini tamamilə aşınmışdı.
Nizamülmülkün “Siyasətnamə” əsərinə müraciət edək. O qeyd edirdi ki, Möhtəsim şərab içirdi, əyyaşlıqla məşğul olurdu və şərab içəndən sonra da namaz qılırdı. Burdan görünür ki, Məhəmməd Peyğəmbərin yaradıcısı olduğu islam dini artıq IX əsrdə ərəblərin öz daxilində aşınmışdı. Yəni artıq parçalanma da vardı. Dediyimiz o xəlifələr ilk dörd xəlifədən (dörd xəlifə deyəndə Əbübəkr, Osman, Ömər və Əli nəzərdə tutulur-İ.S ) tamamilə fərqlənirdilər, öz şəxsi mənfəətlərinə görə istənilən haqsızlığı edirdilər. Babək də məhz bu haqsızlığa, zülmə, Vətənimizi işğal edənlərə qarşı mübarizə aparırdı. Mənə belə gəlir ki, “Babək” filminin çəklişlərinə etiraz edən ərəb iş adamlarının heç özləri bilmirlər ki, Xürrəmilər hərəkatı necə, kimə qarşı və niyə baş verib. Yəqin ki, həmin ərəblərin heç islam dini haqqında da təsəvvürləri yoxdur, onlar xurafatçıdırlar. Hardansa Babəkin islama qarşı mübarizə apardığını eşidiblər və ona görə də bu filmin çəkilməsinə etiraz ediblər. Dediyim kimi, Babək islama qarşı deyil, ərəb işğalına, istilaya, qəsbkarlara qarşı Vətəninin azadlığı naminə mübarizə aparıb. Babəkin dediyi fikirlər indi də aktuallığını qoruyur. 44 günlük Vətən müharibəsində biz bunun aktuallığını bir daha gördük. Babək deyirdi ki, azadlıq verilmir, azadlıq alınır. Azərbaycanın qəhrəman əsgərləri də bunu bir daha sübut etdilər ki, 27 il ATƏT-in Minsk qrupunun vasitəçiliyi ilə danışıqlar apardıq, heç bir nəticə hasil olmadı, sonda Azərbaycan öz torpaqlarını özü işğaldan azad etdi. Bu da Babəkin “azadlıq verilmir, azadlıq alınır” fikrini bir daha təsdiq edir. Babəkin başqa bir fikri də var: “Bir gün azad yaşamaq qırx il miskin, qul kimi yaşamaqdan yaxşıdır”. Bu da azadlıq fikrini irəli çəkir. Babək azadlıq uğrunda əsl mübariz idi. Babəki ancaq əsl azad insan başa düşə bilər. Ola bilsin ki, hansısa ərəb şeyxinin, hansısa biznesmenin, varlı bir insanın nə tarixdən, nə dindən xəbəri var, sadəcə olaraq öz puluna arxalanıb etiraz edir.
Mənim tövsiyən budur ki, qardaş Türkiyənin kinematoqrafçıları heç bir xarici təzyiqlərə məhəl qoymasınlar və bu filmi yaratsınlar, burda Babəkin bilavasitə azadlıqsevər, azadlıq uğrunda mübarizə aparan bir qəhrəman, Azərbaycan xalqının, eləcə də türk xaqlının qəhrəmanı olduğunu bir daha sübut etsinlər”.
M.Zülfüqarlı hesab edir ki, alimlərimiz Babəklə, Xürrəmilər Hərəkatı ilə bağlı tədiqatlarını davam edirməlidir, təbliğat işlərini gücləndirməliyik. M.Zülfüqarlı bizim cəmiyyətdə bəzilərinin Babəki hədəfə aldığını qınadığını da dedi: “Bizim bəzi millət vəkillərimiz parlamentdə xaqlın problemlərini qaldırmaq əvəzinə Babəkə, şah İsmayıla qarşı hədyanlar deyirlər. Onlar da bu cür çıxışları yığışdırmalıdırlar. Əgər bunlar öz vəzifələrini dərk etmirlərsə istefa verməlidirlər. Onların işləri Babəki, Şah İsmayılı tənqid etmək yox, xalqın problemlərinin həllinə kömək etmək olmalıdır. Biz Babəki Azərbaycan xalqının qəhrəmanı kimi təbliğ etməliyik, bununla da Azərbaycan tarixini daha da zənginləşdirməliyik. Xarici qüvvələrin hər bir təzyiqinə cavab verməyə hazır olmalıyıq”.
İradə SARIYEVA
