Tural İrfan: “ABŞ və İsrailin dağıdıcı silahları qarşısında Allahın arı kütləsi göndərməsi gülüncdür”
İsraildə bir neçə bölgədə qəfil ortaya çıxan on minlərlə arı ölkədə həyatı demək olar ki, iflic edib. Səmanı sarı bulud kimi örtən nəhəng arı sürüləri “tarixin ən böyük arı hücumu” kimi qiymətləndirilir. Bu qeyri-adi təbii hadisə yaşayış məntəqələrində panikaya səbəb olub, həmçinin hərbi fəaliyyətlərə də ciddi təsir göstərib.
Məlumata görə, arıların həddindən artıq sıxlığı hava məkanında görmə qabiliyyətini azaldıb. Hərbi təyyarələrin mühərriklərinə ziyan vurmaq riski səbəbindən bir sıra uçuşlar müvəqqəti dayandırılıb.
Yayılan görüntülərdə on minlərlə arının sürü halında binaları və ağacları bürüdüyü əks olunur. Səlahiyyətli qurumlar əhalinin təhlükəsizliyi üçün təcili xəbərdarlıq yayıb. Vətəndaşlara qapı və pəncərələri möhkəm bağlamaq, zəruri olmadıqca çölə çıxmamaq tövsiyə olunub. Bildirilib ki, açıq ərazilərdə arıların yüksək sıxlığı allergik reaksiyalar və hücum riskini artırır.
Arı hücumu təkcə mülki həyatı deyil, hərbi əməliyyatlara da təsir edib. Məlumata əsasən, İsrail Hərbi Hava Qüvvələri-nə məxsus bəzi təyyarələr uçuş həyata keçirə bilmir. Sıx arı kütləsinin mühərriklərə və həssas avadanlıqlara zərər vurma ehtimalı səbəbindən təhlükəsizlik məqsədilə hərbi uçuşlar müvəqqəti dayandırılıb.
Mütəxəssislər bildirirlər ki, bu cür genişmiqyaslı arı aktivliyinin səbəbi hələlik dəqiq məlum deyil. Ehtimallar arasında qəfil hava dəyişiklikləri və ekoloji tarazlığın pozulması göstərilir. Hazırda xüsusi qruplar arı sürülərinin hərbi bazalardan və yaşayış məntəqələrindən uzaqlaşdırılması istiqamətində işləri davam etdirir.
İsrailə onminlərlə arı kütləsinin basqınını bəzi dairələr Allahın qəzəbinin püskürməsi kimi qələmə verirlər.
Bir sıra insanların fikrincə, İsrail Fələstini qana boyamasaydı, dinc insanlara qarşı qətliamlar törətməsəydi Allahın qəzəbinə gəlməzdi. Yəni belə fikirlər yayılır.
Artıların İsrailə kütləvi basqınını Allahın qəzəbi kimi qəbul etmək olar?
Milli Cəbhə Partiyasının (MCP) sədr müavini, ilahiyyatçı Tural İrfan baki-xeber.com-a bildirdi ki, təbiət hadisələri müxtəlif vaxtlarda insanları təəccübləndirir. “Orta əsrlərdə də bəzən müharibələr zamanı qum fırtınası, tufan baş verir, rəqib tərəfin ordusunu dağıdırdı. Bəzən də haqlı tərəfə ziyan dəyir, sel aparırdı. Peyğəmbərin övladı İbrahim uşaqkən vəfat edəndə Ay tutuldu. Müsəlmanlar istədi bunu uşağın vəfatı ilə bağlasınlar. Peyğəmbər qəzəbləndi, dəfni yarımçıq saxlayıb qəbristanlıqda moizə oxumağa məcbur oldu. Anlatdı ki, heç kəsin ölümünə və ya doğumuna görə belə hadisələr baş vermir. Bu, sadəcə təbii təbiət hadisəsidir. İsrailin bəşəriyyətə qarşı xüsusilə ağır cinayətlər törətməsi məlumdur. Fələstin əhalisinin də məzlumluğu bütün dünyaya əyandır. Ancaq burada Allahın məzluma yardım etməməsi ilahi hikmətə bağlı mövzudur. Ən əsası isə insan faili - muxtar, ixtiyar sahibi yaradılıb. Cəzalar və mükafatların Axirətdə veriləcəyi İslamın ana prinsiplərindəndir. Bu dünyada günahkarlar cəzalansa idi dünyada adam qalmazdı. Çünki günahsız adam yoxdur. ABŞ və İsrailin dağıdıcı silahları qarşısında Allahın arı kütləsi göndərməsi gülüncdür. Allahı cılızlaşdırmaqdır. Allah Lut, Səmud, Ad, Firon qövmünü konkret məhv etdiyini Quranda bəyan edir. Sarsıdıcı zərbə ilə qəfil bir qövmü yerin dibinə batırır. Allah arı sürüsü göndərməyə möhtac deyil. Lakin ilahi meyarlara, dini inanca əsasən İsrail törətdiyi bu cinayətlərə görə təbii ki, cəzasını mütləq alacaq. Əks halda təkallahlı dinlərin inanc sisteminin qəbul etdiyi Allahın ədaləti prinsipi puça çıxmış olar”. T.İrfan vurğuladı ki, lakin bu cəza adi arı sürüsü şəklində deyil, daha dəhşətli və misilsiz üsulda olmalıdır. “Bu da dini mətnlərdə təsdiqini tapıb. Onilliklərdir silsilə cinayətlərə bu qədər uzun müddətdə Allahın susması cəzanın və əzabın daha şiddətli olacağını göstərir. Lakin görünür hələ o zaman yetişməyib. Allahın elmi, hikməti, hadisələrin pərdə arxası insan tərəfindən tam dərk edilməyib. Allah beynəlxalq cinayətlərə qarşı lokal şəraitdə arı sürüsü göndərmir”-deyə T.İrfan qeyd etdi.
İradə SARIYEVA
