Fuad İbrahimov: “Artıq Azərbaycanla Ermənistan arasında idxal prosesi başlayıb”
Dövlət Gömrük Komitəsinin son hesabatında, bu ilin mart ayında Azərbaycanın Ermənistandan ilk dəfə olaraq 960 ABŞ dolları dəyərində mal idxal etdiyi qeyd edilib. Bundan başqa, cari ilin yanvar-mart aylarında Azərbaycandan Ermənistana 5,757 milyon ABŞ dolları dəyərində məhsul ixrac olunub. Artıq Ermənistandan da Azərbaycana mal idxalı başlayıb. Bilindiyi kimi Ermənistandan Azərbaycana 960 dollarlıq mal idxal olunub.
Ekspertlər hesab edir ki, bu artıq iki ölkə arasında ticarət və mal mübadiləsinin getdikcə dönməz xarakter aldığını göstərən bir əlamətdir və sülh prosesinin irəlilədiyini göstərir.
İqtisadçı ekspert Fuad İbrahimov baki-xeber.com-a bildirdi ki, simvolik də olasa artıq Ermənistandan Azərbaycana məhsul idxal olunursa bu müsbət haldır. F.İbrahimov qeyd etdi ki, Azərbaycandan Ermənistana neft ixrac olundu. “Əlbəttə, bunlar hamısı müsbət haldır. Bu ilk növbədə sülh istiqamətində atılan addımdır. Yəni əgər ticarət, bir-birinin mallarına baxış varsa bu yaxşı bir haldır. Bu mütləq lazımdır. Müharibə dövrünə son qoyulmalıdır. Biz bunların bədnamlığını, özlərinə vurduqları ziyanı və bizə verdikləri əziyyətləri unutmuruq. Ancaq ki, işin aliliyi ondan ibarətdir ki, sülh bərqərar olsun. Sülh bərqərar olsa, ticarət döviyyəsi artsa hər iki ölkənin iqtisadiyyatına müsbət təsir göstərəcək. Ən başlıcası da bizim sərhəddimiz Ermənistanladır. Bölgə üzrə sərhəd rayonlarının ticarət dövriyyəsinə, xarici göstəricilərinə ancaq müsbət təsir edə bilər. Hər zaman belə olub. Sərhəd bölgələrində yerləşən rayonların, şəhərlərin hamısı qonşularla ticarətdən daha çox zənginləşib”.
Bu amilin bölgədəki sərhəd boyu rayonların da iqtisadi göstəricilərinə, əhalinin alış-verişinə, gediş gəlişinə və sairə müsbət təsir edəcək. “Demirəm, bu gün hamı durub Ermənistana gedəcək, Ermənistandakılar da bura gələcək. Nə vaxtsa bunu başlamaq lazımdır. Bu müsbət göstəricidir ki, Ermənistan 960 dollarlıq da olsa mal idxal edilib. Ermənistandan hansı məhsulun idxal edildiyi rəsmən qeyd olunmayıb, olunsaydı ona istinadən fikir bildirmək olardı. Burada hansı məhsulun idxal olunmasından daha çox diqqət çəkən məqam odur ki, artıq Azərbaycanla Ermənistan arasında idxal prosesi başlayıb.
Qeyd edək ki, mətbuatda yayılan məlumata görə, Ermənistandan Azərbaycana idxal olunan 960 dollar həcmində məhsul gül (qızılgül) olub. Qızıl güllər Niderlanddan Ermənistana, ordan isə Azərbaycana gətirilib.
İradə SARIYEVA
