ABŞ prezidenti Donald Tramp İranla atəşkəsin uzadılmasının zəruri olub-olmadığından əmin olmadığını bildirib. Tramp İranla razılaşma əldə edilməsə, münaqişənin yenidən başlayacağını bildirib. O, iddia edib ki, İran ABŞ-ın nüvə şərtini qəbul edib və yeraltı nüvə materiallarını onlara təhvil verməyə razılaşıblar.
"İranla razılaşma əldə etməyə çox yaxınıq. Növbəti birbaşa danışıqlar bu həftə sonu ola bilər. İranla bir çox razılaşmalar əldə edirik və düşünürəm ki, tezliklə çox müsbət irəliləyişlər olacaq" – deyə ABŞ prezidenti bildirib.
İranın yeni liderləri ilə çox yaxşı yola getdiyini vurğulayan Tramp, Tehranla bağlamaq istədikləri razılaşmanın "nüvə silahına sahib olmamağ"ı da əhatə etdiyini iddia edib: "İranın nüvə silahına sahib olmaması son dərəcə vacibdir və onlar bunu qəbul ediblər. İran buna qəti şəkildə razılıq verib. Yer altında qalan nüvə qalıqlarını bizə verməyə razılıq veriblər. Dolayısı ilə İranla bir çox məsələdə razılığa gəldik".
Pakistanın bu prosesdə ABŞ və İran arasında çox vacib vasitəçilik rolunu oynadığını qeyd edən Tramp, Pakistan hökumətinə təşəkkür edərək, "Əgər saziş İslamabadda imzalanarsa, oraya gedə bilərəm" deyib.
İranla razılığa gəlməyə çox yaxın olduqlarını dəfələrlə bildirən ABŞ prezidenti, Tehrana "təhdid" mesajları da göndərib. O, bildirib ki, əgər razılaşma olmazsa, müharibə davam edəcək.
Tahir TAĞIYEV
