İbrahim Rüstəmli: “Türkiyənin iki şəhərində yerləşən zavodların vurulması da iki ölkə arasında ciddi gərginlik yarada bilər”
Rusiya Müdafiə Nazirliyi xəbərdarlıq edib ki, bəzi Avropa ölkələrinin Ukrayna üçün pilotsuz uçuş aparatlarının (PUA) istehsalını və təchizatını artırmaq qərarı qitədə "hərbi-siyasi vəziyyətin kəskin şəkildə gərginləşməsinə" səbəb ola bilər və potensial olaraq Avropanı münaqişəyə cəlb edə bilər. Nazirlik iddia edir ki, bu addım "Avropa ölkələrini tədricən Ukraynanın strateji arxa cinahına çevirir".
Açıqlamada qeyd olunur ki, Kiyev administrasiyasının dilə gətirdiyi və Avropada istehsal edilib "Ukraynaya aid" kimi təqdim edilən PUA-lardan istifadə edərək Rusiyaya hücum ssenariləri "gözlənilməz nəticələrə" səbəb ola bilər.
Rusiya Müdafiə Nazirliyi həmçinin Ukrayna üçün PUA və komponentlər istehsal edən müəssisələrin yerləşdiyi ölkələri də sadalayıb.
Siyahıya əsasən, Ukraynaya məxsus PUA istehsal müəssisələrinin bəzi filialları Böyük Britaniya, Danimarka, Latviya, Almaniya, Hollandiya, Litva, Polşa və Çexiyada yerləşir. Nazirlik iddia edir ki, PUA komponentləri isə Almaniya, İspaniya, İtaliya, Çexiya, İsrail və Türkiyədə istehsal olunur.
Rusiya Təhlükəsizlik Şurasının sədr müavini Dmitri Medvedev isə Ukrayna üçün PUA və hərbi texnika istehsal edən Avropadakı obyektlərin siyahısını "potensial hədəflərin siyahısı" adlandırıb.
Medvedev bildirib ki, bu obyektlərə hücumların nə vaxt baş verəcəyi bundan sonra nə baş verəcəyindən asılıdır.
“Rahat yatın, əziz tərəfdaşlar" – deyə Medvedev bildirib.
Qeyd edək ki, Türkiyənin “Karar” qəzeti də yazır ki, Ukraynaya hərbi yardım göstərən hədəflərə qarşı tədbir görəcək, yəni vurulacaq hədəflərin siyahısı hazırlanıb. Qəzetin yazdığına görə, həmin siyahıda Türkiyənin Ankara və Yalova şəhərlərindəki iki müəssisənin-zavodun da adı var. Həmin şəhərlərdəki zavodlar da onlar da Rusiyaya hədəfdir. İdda olunur ki, həmin şirkətlər də Ukraynaya hərbi yardım edirlər.
Hərbi ekspert İbrahim Rüstəmli baki-xeber.com-a bildirdi ki, bu olduqca maraqlı məsələdir, xüsusən də bu İran və Amerika münaqişəsində ortaya çıxan bir çox prioritetlərin bir növ təkrarı kimi qarşılanır. “Bilirsiz ki, İran ona atəş açan, zərbə endirən hədəfləri nişan alıb raketlər vasitəsilə vururdu. Yəqin bu indi də davam edir. Bu təcrübədə yeni tətbiq idi. İranın bundan başqa çarəsi yoxdur. Belə götürəndə Rusiya İran müharibəsində bütün dünya Ukraynanın tərəfindən çıxış edir, xüsusilə də Avropa dövlətləri. Çünki Rusiyanın hansı niyyətdə olması aydındır. Yəni əgər Rusiya Ukrayna cəbhəsində qələbə qazanarsa növbəti hədəf Avropa dövlətləri olacaq. Necə ki, İkinci Dünya Müharibəsindən sonra demək olar ki, SSRİ bütün Avropa dövlətlərini özəlləşdirmişdi, ərazilərini və hakimiyyətini öz üzərinə götürmüşdü. Buralar keçmiş Sovet ittifaqının, indiki Rusiyanın idarəçiliyi altında idi. Bütün Avropa onun vassalına çevrilmişdi.Yəni təhlükə olaraq bu gün Rusiyanın Ukrayna cəbhəsində qələbə qazanması çox realdır. Rusiya İran təcrübəsindən istifadə edir. İran çarəsiz olduğu üçün ona qarşı yönələn bütün hədəfləri vururdu. Rusiya Ukrayna cəbhəsində Avropa Ukraynaya verdiyi dəstəklə Rusiyaya qarşı döyüşür. Avropadan hələ Rusiyaya atəş açılmır. Amma Ukraynaya verilən silahların istehsal olunduğu zavodlar, strateji obyektlər var. Onların vurulması məsələsi realdır. Bu reallığın arxasında da Rusiya üçün ciddi problemlər, maliyyə itkisi, ciddi məsələlər dayanır.
İnanmıram ki, Rusiya bu addımı atsın, çünki Rusiyanın bunu etməsi Avropanın, Qərb dövlətlərinin Rusiya ilə münasibətlərində gərginlik yaradacaq və yüksək gərginlikdə eskalasiya baş verəcək. Bu məsələdə Rusiya çox ciddi itkilərlə üzləşəcək”.
İ.Rüstəmli qeyd etdi ki, Rusiyanın o ölkələrə zərbə endirəcəyi onun özü üçün də ağır nəticələr verə bilər və açıq savaş deməkdir. “Rusiya əgər müxtəlif ölkələrdə fəaliyyət göstərən Ukrayanaya yardım edən zavodları, strateji obyektləri vurarsa o artıq həmin dövlətlərin vurulması deməkdir. O dövlətlərin heysiyyatlna toxunulması anlamına gəlir.
Türkiyənin iki şəhərində yerləşən zavodların vurulması da iki ölkə arasında ciddi gərginlik yarada bilər. Ona görə Rusiyanın bu cür addım atmasını real görürəm, amma bu reallığın arxasında dayanan problemlərin həlli, bu hücuma qarşı alternativ addımların qarşısında Rusiyanın necə tab gətirəcəyini demək çətindir. Rusiya bu addımı atarsa bütün dünyanı özünə qarşı qaldırmış olacaq, onsuz da bütün dünya ona qarşıdır. Bir qədər açıq və aydın şəkildə ekskalasiya prosesi baş verəcək, bu da Rusiya üçün çox böyük itkilərlə nəticələnə bilər”-deyə İ.Rüstəmli qeyd etdi.
İradə SARIYEVA
