Məhərrəm Zülfüqarlı: “Fikrimcə, məhz indi Putinə bu səlahiyyətin verilməsi Ermənistanla bağlı ola bilər”
Rusiya Dövlət Duması prezident Vladimir Putinə istədiyi ölkəyə hücum etmək icazəsi verib. Belə ki, Rusiya Dövlət Duması prezidentə rusiyalıların “təzyiqə məruz qaldığı” ölkələrə qoşun yeritmək səlahiyyəti verən qanun layihəsini birinci oxunuşda qəbul edib.
“Bu qanun layihəsi Rusiya vətəndaşlarının hüquq, azadlıq və qanuni mənafelərini qorumağa, Rusiya təşkilatlarını xarici qanunsuz təcavüzlərdən müdafiə etməyə, habelə xarici istiqamətdə davam edən qatı rusofobiya kampaniyasına qarşı mübarizə aparmağa kömək edəcək”, - deyə Dövlət Dumasının Müdafiə komitəsinin sədri Andrey Kartapolov bildirib.
Maraqlıdır, prezidentə belə bir səlahiyyətin verilməsi postsovet ölkələri üçün hansısa təhdid yarada bilərmi?
Sözügedən məsələni baki-xeber.com-a şərh edən tarix elmləri doktoru, professor Məhərrəm Zülfüqarlının fikrincə, Rusiya Federasiyasının 1999-cu ildən bəri həyata keçirdiyi xarici siyasət, orta əsrlərə məxsus Çar Rusiyasının yeritdiyi siyasətin eynisidir: “Sadəcə olaraq ad fərqi var. O zaman hakimiyyətdə Çar idi. İndi Rusiyaya prezident rəhbərlik etsə də, özünü mütləq monarxiyanın nümayəndəsi kimi aparır. Bu, nədə özünü göstərir? Birincisi, SSRİ dağılandan sonra Moskvanın müstəmləkələri olan respublikalar dövlət müstəqilliyi əldə etdilər. O zaman - 1991-ci ilin iyununda Rusiya da öz dövlət müstəqilliyini bərpa etdi. Bu, bir qədər müəmmalı idi. Çünki digər respublikaları əsarətdə saxlayan Moskva idi, amma Rusiya da kommunist rejimindən xilas olurdu. Bu, reallığa əsaslansaydı, müsbət olardı. Ancaq belə olmadı. Rusiya postsovet ölkələrini öz təsir dairəsinə salmağa çalışdı. Xüsusən də “KQB”nin polkovniki Putin prezident olandan sonra zaman-zaman Rusiyanın siyasəti dəyişdi. Rəsmən bəyan edilməsə də, bu, SSRİ-nin bərpasına yönəlmiş siyasət idi. İndi baxaq görək Dumanın verdiyi səlahiyyət nəyi dəyişir. Bu, sadəcə formaca nəyisə dəyişir. Məzmunca Duma onsuz da prezidentə tabedir. Rusiya avtoritar ölkə olduğu üçün Dumanın və digər qurumların işi birbaşa bir nəfərdə asılıdır. Ukrayna müharibəsinə bir gün qalmış Putinin rəhbərliyi ilə keçirilən toplantıda bütün bunlar bir daha məlum oldu”.
Professor hesab edir ki, Putin Ukrayna ilə bağlı bir sıra məsələləri düzgün hesablamadı: “Onlar hesab edirdilər ki, Ukrayna əhalisi müqavimət göstərməz, əhali onları gül-çiçəklə qarşılayacaq. Beləcə 3 günə Rusiya bütün Ukraynaya nəzarəti bərpa edəcək. Nəticədə Ukrayna Rusiya birləşdiriləcək. Ondan sonra digər keçmiş SSRİ ölkələri birləşdiriləcəkdi. Plan bu idi. Ancaq Ukraynanın dirənişi bütün bu planları pozdu. Çünki Rusiya heç vaxt ətraf ölkələr üçün cəlbedici olmayıb. Tam əksinə, bütün ölkələr Rusiyadan məsafə saxlamağa çalışır. Çünki 4 ildən çoxdur slavyan dövləti olan Ukraynanı məhv edir, mülki insanları öldürür, şəhərləri, kəndləri məhv edir. Heç bir ölkə istəməz ki, Rusiya ilə yaxın olsun. İndi də Duma prezidentə səlahiyyət verir ki, harada rus var ora hücum edə bilərsən. Fikrimcə, məhz indi Putinə bu səlahiyyətin verilməsi Ermənistanla bağlı ola bilər. Çünki Putin Paşinyanla aprelin 1-də keçirilən görüşdə israrla bildirdi ki, Rusiyada yaşayan ermənilər də səsvermədə iştirak etməlidilər. Paşinyan isə dedi ki, ölkə Konstitusiyasında yalnız Ermənistan vətəndaşlarının iştirakı nəzərdə tutulub. Ola bilsin Rusiya seçki ərəfəsində Ermənistanda təxribatlar törətmək və bunu ruslara qarşı ayrı-seçkilik kimi göstərmək istəyir. Bu minvalla Rusiya ordusunun müdaxiləsini həyata keçirmək istəyir. Bu təxribatların fərqində olan Ermənistan Avropa İttifaqından kömək istəyib. Bütün hallarda erməni əhalisinin seçkidə Rusiyaya stavka edəcəyini düşünmürəm”.
Vidadi ORDAHALLI
