Aydın Hüseynov: "Dövlət Proqramı kənd təsərrüfatı, balıqçılıq və akvakultura sahələrinin inkişafı üçün mühüm yol xəritəsi olmaqla yanaşı..."
Prezident İlham Əliyevmayın 25-də keçirdiyi kənd təsərrüfatı məsələlərinə həsr olunmuş müşavirədə kənd təsərrüfatının inkişafında durğunluq olduğunu qeyd edib.
Bu barədə Prezident İlham Əliyev bildirib:
"Qəbul edilmiş proqramlar və qərarlar böyük dönüşə səbəb olub. Ancaq son bir neçə il ərzində kənd təsərrüfatının inkişafında müşahidə edilən durğunluq, əlbəttə ki, bizi düşündürür və bu məqsədlə Dövlət Proqramı hazırlanıb və qəbul ediləcək. Bununla əlaqədar bəzi rəqəmləri səsləndirmək istərdim..."
Azərbaycan Prezidentinin 2026-cı il 25 may tarixli Sərəncamı ilə təsdiq edilmiş "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı" bu məsələnin həllində müstəsna rol oynayacaq.
Dövlət Proqramının bu sahənin inkişafında rolu nədir?
Ekspertlər qeyd edir ki, aqrar sahənin inkişafı dövlətin əsas hədəflərindən biridir. Kənd təsərrüfatı yalnız iqtisadi gəlir mənbəyi deyil, həm də ölkənin qida müstəqilliyini və vətəndaşların sosial rifahını təmin edən strateji sütundur. Bu baxımdan kənd təsərrüfatı sahəsində mövcud durğunluğun aradan qaldırlması, bu sahənin inkişafı zərurətə çevrilib.
Ekspertlər hesab edir ki, xarici bazarlardan asılılığı azaltmaq və əhalini təbii, keyfiyyətli məhsullarla təmin etmək bir nömrəli dövlət məsələsidir. Eyni zamanda neft-qaz sektorundan asılılığın azaldılması üçün ixracyönümlü kənd təsərrüfatının inkişafı əsas prioritetlərdəndir.
regionlarda yaşayan əhalinin əsas gəlir mənbəyi olmaqla, kəndlərdə demoqrafik dayanıqlığı və məşğulluğu təmin edir.
Bu strateji əhəmiyyəti nəzərə alaraq, Azərbaycanda aqrar sahəyə dövlət dəstəyi mexanizmləri genişləndirilir.Yeni Dövlət Proqramı qəbul olunub. Kənd təsərrüfatı, balıqçılıq və akvakultura sahələrinin inkişafını hədəfləyən genişmiqyaslı proqram həyata keçirilir.
Ənənəvi üsullardan "Ağıllı kənd" konsepsiyasına keçid edilir. Aqrodronlar, peyk texnologiyaları və süni intellekt kimi qabaqcıl yeniliklər məhsuldarlığı artırmaq üçün tətbiq olunur.
Fermerlərin gübrə, toxum, yanacaq və müasir suvarma sistemləri ilə təmin olunması üçün birbaşa dəstək paketləri mövcuddur.
Millət vəkili Aydın Hüseynov baki-xeber.com-a bildirdi ki, Azərbaycan Respublikası Prezidentinin 2026-cı il 25 may tarixli Sərəncamı ilə təsdiq edilmiş "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı" ölkənin ərzaq təhlükəsizliyinin gücləndirilməsi, kənd yerlərində məşğulluğun artırılması və ixrac imkanlarının genişləndirilməsi baxımından mühüm əhəmiyyət daşıyır.
"Dövlət Proqramı kənd təsərrüfatı, balıqçılıq və akvakultura sahələrində müasir texnologiyaların tətbiqini, istehsal və emal müəssisələrinin inkişafını, sahibkarların dəstəklənməsini, məhsuldarlığın artırılmasını və rəqabətqabiliyyətli məhsul istehsalını nəzərdə tutur. Bu sənəd həmçinin regionlarda iqtisadi fəallığın artmasına, yeni iş yerlərinin yaradılmasına və kənd əhalisinin rifahının yüksəlməsinə töhfə verəcək.
Hazırda ölkənin müxtəlif bölgələrində keçirilən regional müşavirələr Dövlət Proqramının məqsəd və vəzifələrinin yerli səviyyədə daha geniş izah olunmasına xidmət edir. Bu görüşlər zamanı fermerlər, sahibkarlar, mütəxəssislər və aidiyyəti qurumların nümayəndələri bir araya gələrək mövcud vəziyyəti müzakirə edir, təklif və problemləri səsləndirirlər.
Regional müşavirələrin əsas əhəmiyyəti ondan ibarətdir ki, Dövlət Proqramında nəzərdə tutulan tədbirlərin icrası zamanı bölgələrin xüsusiyyətləri və ehtiyacları nəzərə alınır. Eyni zamanda, yerli istehsalçıların fikir və təkliflərinin öyrənilməsi proqramın daha səmərəli həyata keçirilməsinə imkan yaradır. Bu cür müzakirələr dövlət və sahibkarlar arasında əməkdaşlığın güclənməsinə, qarşıya qoyulan hədəflərə daha operativ və effektiv şəkildə nail olunmasına şərait yaradır.
Nəticə etibarilə, Dövlət Proqramı kənd təsərrüfatı, balıqçılıq və akvakultura sahələrinin inkişafı üçün mühüm yol xəritəsi olmaqla yanaşı, regional müşavirələr də bu hədəflərin uğurla reallaşdırılmasında vacib platforma rolunu oynayır"-deyə millət vəkili qeyd etdi.
İradə SARIYEVA
