Bu gün müasir Azərbaycanı dünya miqyasında xarakterizə edən mühüm cəhətlərdən biri ölkədə dinamik inkişafın olmasıdır. Azərbaycan xalqının müasir tarixi ümummilli lider Heydər Əliyevin adı və fəaliyyəti ilə sıx bağlıdır. Hər il iyunun 15-də qeyd olunan Milli Qurtuluş Günü xalqımızın taleyində dönüş nöqtəsi kimi dəyərləndirilir. Bu tarix təkcə siyasi hakimiyyət dəyişikliyi deyil, həm də dövlətçiliyimizin məhv olmaq təhlükəsindən xilas edilməsi, Azərbaycanın sabitlik, inkişaf və tərəqqi yoluna çıxarılması ilə səciyyələnir.
Heydər Əliyevin Azərbaycan qarşısındakı xidmətləri hələ sovet dövründə, xüsusilə 1969–1982-ci illərdə respublikaya rəhbərlik etdiyi zaman özünü aydın şəkildə göstərib. Həmin dövrdə Azərbaycan iqtisadi, sənaye, kənd təsərrüfatı, elm, təhsil və mədəniyyət sahələrində böyük nailiyyətlər əldə etdi. Ölkənin müxtəlif bölgələrində yeni sənaye müəssisələri yaradıldı, minlərlə insan işlə təmin olundu, milli kadr hazırlığına xüsusi diqqət yetirildi. Azərbaycandan yüzlərlə gəncin keçmiş SSRİ-nin nüfuzlu ali məktəblərinə göndərilməsi gələcək müstəqil dövlətimizin idarəçiliyi üçün peşəkar kadr bazasının formalaşmasına xidmət etdi. 1980-ci illərin sonlarında SSRİ-nin süqutu fonunda ölkədə mürəkkəb ictimai-siyasi proseslər baş verdi. Ermənistanın Azərbaycana qarşı ərazi iddiaları, Qarabağ münaqişəsinin başlanması və mərkəzi hakimiyyətin zəifləməsi ölkədə vəziyyəti daha da ağırlaşdırdı. Müstəqilliyin ilk illərində isə Azərbaycan ciddi siyasi böhran, iqtisadi tənəzzül və hərbi uğursuzluqlarla üzləşdi. 1992–1993-cü illərdə hakimiyyətdə olan AXC-Müsavat iqtidarı ölkəni dərin xaosa sürüklədi. Dövlət idarəçiliyində səriştəsizlik, ordu quruculuğunda ciddi nöqsanlar, daxili çəkişmələr və siyasi avantüralar Azərbaycanın müstəqilliyini təhlükə altına qoymuşdu. Həmin dövrdə torpaqlarımızın işğalı davam edir, ölkədə separatçılıq meyilləri güclənir, müxtəlif silahlı qruplar dövlət hakimiyyətinə meydan oxuyurdu. Gəncə hadisələri və vətəndaş qarşıdurması təhlükəsi dövlətçiliyin tamamilə süquta uğraması riskini yaratdı. Belə bir mürəkkəb şəraitdə xalqın təkidli tələbi ilə Heydər Əliyevin hakimiyyətə qayıdışı tarixi zərurətə çevrildi. 1993-cü il iyunun 15-də onun Azərbaycan Ali Sovetinin sədri seçilməsi ölkəmizin xilası yolunda mühüm dönüş nöqtəsi oldu. Bu tarix sonradan Milli Qurtuluş Günü kimi tariximizə daxil oldu.
Heydər Əliyevin rəhbərliyi ilə ölkədə ictimai-siyasi sabitlik təmin edildi, dövlət institutları möhkəmləndirildi, qanunsuz silahlı birləşmələr zərərsizləşdirildi və separatçılıq meyillərinin qarşısı qətiyyətlə alındı. Azərbaycanın beynəlxalq mövqeləri gücləndirildi, xarici siyasətdə balanslaşdırılmış kurs həyata keçirildi. 1994-cü ildə imzalanmış “Əsrin müqaviləsi” ölkənin iqtisadi inkişafında yeni mərhələnin əsasını qoydu. Bu müqavilə Azərbaycanı dünyanın enerji xəritəsində mühüm mövqeyə çıxardı və gələcək iqtisadi yüksəliş üçün möhkəm zəmin yaratdı. 1995-ci ildə ilk milli Konstitusiyanın qəbul olunması hüquqi dövlət quruculuğunun əsasını qoydu. Demokratik institutların formalaşdırılması, bazar iqtisadiyyatına keçid, sahibkarlığın inkişafı və beynəlxalq təşkilatlarla əməkdaşlığın genişləndirilməsi nəticəsində Azərbaycan sabit inkişaf yoluna qədəm qoydu. Ümummilli lider Heydər Əliyevin müəyyən etdiyi inkişaf strategiyası bu gün də uğurla davam etdirilir. Prezident İlham Əliyevin rəhbərliyi ilə Azərbaycan regionun ən güclü dövlətlərindən birinə çevrilməklə, iqtisadi və hərbi potensialını əhəmiyyətli dərəcədə artırıb. Son iyirmi ildən artıq müddətdə həyata keçirilən məqsədyönlü siyasət nəticəsində ölkəmizin beynəlxalq nüfuzu yüksəlib, enerji və nəqliyyat layihələri vasitəsilə Azərbaycan qlobal əhəmiyyətli tərəfdaşa çevrilib. 2020-ci ildə baş vermiş 44 günlük Vətən müharibəsində əldə olunan tarixi Zəfər Azərbaycan xalqının milli iradəsinin, dövlətimizin gücünün və Ali Baş Komandan İlham Əliyevin qətiyyətli rəhbərliyinin parlaq təzahürü oldu. Ermənistanın uzun illər işğal altında saxladığı torpaqlarımız azad edildi, Azərbaycanın ərazi bütövlüyü böyük ölçüdə bərpa olundu. 2023-cü ildə həyata keçirilən lokal xarakterli antiterror tədbirləri nəticəsində isə ölkəmizin bütün ərazisində dövlət suverenliyi tam təmin edildi. Bu möhtəşəm nəticələr təsadüfi deyil. Onlar Heydər Əliyev tərəfindən müəyyən edilmiş dövlətçilik konsepsiyasının, güclü ordu quruculuğunun, milli maraqlara əsaslanan siyasətin və xalq-hakimiyyət birliyinin məntiqi davamıdır. İlham Əliyev Ulu Öndərin siyasi kursunu müasir dövrün tələblərinə uyğun şəkildə uğurla inkişaf etdirərək Azərbaycanı yeni zirvələrə yüksəldib. Bu gün müstəqil, suveren və qüdrətli Azərbaycan Heydər Əliyev ideyalarının təntənəsini yaşayır. Milli Qurtuluş Günü təkcə keçmişə ehtiram deyil, həm də gələcəyə inamın ifadəsidir. Azərbaycanın qazandığı bütün uğurlar göstərir ki, Ulu Öndərin müəyyən etdiyi yol ölkəmizin inkişafının, sabitliyinin və tərəqqisinin əsas təminatıdır. Milli Qurtuluşdan başlanan yol bu gün Zəfərlə, suverenliyin tam bərpası ilə və güclü Azərbaycan reallığı ilə davam edir.
Tahir TAĞIYEV
