Son günlərdə Bakıda fəaliyyət göstərən taksi şirkətlərinin qiymətləri 40-50 faiz artırıb. Diqqət çəkən məqam ondan ibarətdir ki, qiymət artımı ənənəvi olaraq tariflərin yüksəldiyi hallarla, məsələn yağışlı hava, pik saatlar və ya yol sıxlığı ilə əlaqələndirilmir. İstifadəçilərin sözlərinə görə, adi vaxtlarda belə əvvəlki qiymətlərlə müqayisədə nəzərəçarpacaq fərq yaranıb. Amma bundan hətta taksi sürücüləri özləri də məmnun deyil. Məsələn, taksi sürücüsü Əziz Məmiyev "Azadlıq" radiosuna bildirib ki, gediş haqları yüksəlsə də, sürücülərin qazancında artım hiss olunmur. Oxşar narazılıq bir neçə gün öncə Gəncədə də qeydə alınıb; orada yüzlərlə sürücü "Bolt" şirkətinin təklif etdiyi aşağı tariflərə etiraz olaraq fəaliyyətini dayandırıb. Nəqliyyat eksperti Aslan Əsədov qeyd edir ki, mövcud qiymətlər sərnişinlər üçün baha görünsə də, sürücülərin xərclərini çətinliklə ödəyir: "Təəssüf ki, hələlik qazanan sürücülər deyil, xarici şirkətlərdir".
Xatırladaq ki, ölkəmizdə taksi xidmətlərinin qiymətləri dövlət tərəfindən tənzimlənmir və bazar prinsipləri əsasında formalaşır. Hazırda xüsusilə paytaxtda taksi bazarının iri iştirakçıları fəaliyyət göstərir və onlar müəyyən dərəcədə qiymət siyasətinə təsir edə bilirlər. Bu şirkətlər bazardakı vəziyyəti və kommersiya maraqlarını nəzərə alaraq, xidmət haqlarında dəyişikliklər edirlər. Əgər bazar həqiqətən sərbəst şəkildə fəaliyyət göstərirsə, qiymət artımları əsasən iqtisadi amillərlə bağlı olmalıdır. Məsələn, inflyasiya, yanacağın bahalaşması, avtomobillərin saxlanma xərclərinin artması, sürücülərin əməkhaqlarının yüksəlməsi və ya xidmət sahəsinə dair yeni tələblərin tətbiqi qiymətlərin artmasına səbəb ola bilər. Lakin son dövrlərdə taksi xidmətlərinin qiymətlərində belə ciddi bahalaşmanı əsaslandıracaq böyük iqtisadi dəyişikliklər müşahidə olunmur. Ona görə də qiymət dəyişikliklərinin səbəbləri ilk növbədə taksi sifarişi operatorlarının daxili siyasətində axtarılır. Son günlər taksi sifarişi operatorlarının sığorta xərclərinin artacağı ilə də bağlı fikirlər səsləndirilir. Ancaq yeni qaydalara əsasən, sığorta tarixçəsi hər avtomobil üzrə ayrıca hesablanacaq. Əvvəllər bir sahibə məxsus çoxsaylı avtomobillərdən birinin sığorta tarixçəsi digər nəqliyyat vasitələrinə də təsir göstərə bilirdi. Yeni sistemdə isə yalnız konkret avtomobilin sığorta tarixçəsi nəzərə alınacaq. Qeyd edək ki, rəsmi qurumlar və taksi platformaları tərəfindən qiymət artımı ilə bağlı hələlik geniş açıqlama verilməyib. Lakin bazarda müşahidə olunan son tendensiyalar göstərir ki, taksi sektorunda aparılan islahatlar və artan əməliyyat xərcləri qiymətlərə təsir edən əsas amillər kimi ön plana çıxır.
Samirə SƏFƏROVA
