Tehran administrasiyası ABŞ-la sazişin vaxtı və şərtləri ilə bağlı ehtiyatlı yanaşma sərgiləsə də, ölkə daxilindəki sərt dairələr razılaşmaya qarşı açıq təpki göstərməyə başlayıblar.
"Wall Street Journal" qəzetinin məlumatına görə, İran və ABŞ arasındakı danışıqlarda İranın sərt mövqeyini formalaşdıran şəxslərdən biri İslam İnqilabı Keşikçiləri Korpusunun (SEPAH) komandanı Əhməd Vahididir.
200 minlik İnqilab Keşikçilərinə rəhbərlik edən Vahidinin ABŞ-la qısa bir zamanda yaxınlaşmağı dəstəkləyən daha mülayim şəxslərə qarşı təsirini artırdığı deyilir.
Mənbələrə görə, İran prezidenti Məsud Pazeşkian və xarici işlər naziri Abbas Ərakçi kimi şəxslər iqtisadi təzyiqlər səbəbindən Vaşinqtonla tez bir zamanda razılaşma əldə etməyi dəstəkləsələr də, İran İslam İnqilabından sonra İnqilab Keşikçilərinin təsisçilərindən biri olan Vahidi hərbi çəkindirmənin bərpasına üstünlük verir. ABŞ mediası Tehranda danışıqlar masasında ən nüfuzlu şəxslərdən biri hesab edilən Əhməd Vahidinin "İranın hərbi çəkindirmə qabiliyyətini qorumaq, raket ehtiyatlarını məhdudlaşdırmamaq və dondurulmuş aktivlərin azad edilməsi" mövzusunda güzəştlərə qarşı çıxdığını bildirir.
Qeyd edilir ki, sələfinin öldürülməsindən sonra müharibənin ilk günlərində vəzifəyə başlayan Vahidi bu gün də həm İranın hərbi strategiyasında, həm də Vaşinqtonla aparılan kritik danışıqlarda həlledici aktyorlardan biri kimi qəbul edilir.
Son xəbərlərdən belə görünür ki, Tehrandakı mühafizəkarlar ABŞ-la razılaşmaya qarşı açıq müqavimət göstərməyə başlayıblar. Dünən bir qrup iranlı ABŞ-la danışıqlara etiraz etmək üçün paytaxt Tehranın İbn Sina meydanında toplaşıb. Aksiya zamanı İran Parlamenti və danışıqlar qrupunun rəhbəri Məhəmməd Bağır Qalibaf və İranın xarici işlər naziri Abbas Ərakçi əleyhinə şüarlar səsləndirilib.
Bundan əvvəl isə İran Parlamentinin mühafizəkar üzvü Mahmuda Nəbəviyan sosial media hesabında saziş layihəsini sərt tənqid edib. O qeyd edib ki, memorandumda Hörmüz boğazının dərhal və məhdudiyyətsiz açılması və uranın azaldılması ilə bağlı müddəalar olsa da, İrana qarşı sanksiyaların ləğvi, dondurulmuş aktivlərin sərbəst buraxılması və İranın 300 milyard dollarlıq fonda çıxışı ilə bağlı qeyri-müəyyənliklər mövcuddur. Nəbəviyan soruşub: "Bu mətn milli maraqlara xidmət edirmi?"
İran Parlamentinin Milli Təhlükəsizlik və Xarici Siyasət Komissiyasının sözçüsü İbrahim Rezai də sosial media hesabında İran danışıqlar qrupunun həddindən artıq güzəştə getdiyini bildirib: "Danışıqlar masasında səxavət düşmənin hesablamalarında dəyişiklik yaratdı və İranın zəif olduğu qənaətini yaratdı".
Tahir TAĞIYEV
