ABŞ Prezidenti Donald Tramp İranla davam edən danışıqlarla bağlı diqqət çəkən açıqlamalar verib. İsrailin Kanal 12 televiziyasına danışan Tramp İranın xarici işlər naziri Abbas Əraqçinin "razılaşmanın çox yaxın olduğu" barədə açıqlamasına müsbət yanaşdığını bildirib.
Əraqçinin sözlərinə toxunan Tramp, onun da ABŞ-la razılaşma əldə etmək ehtimalının heç vaxt bu qədər yaxın olmadığını təsdiqlədiyini deyib.
Tramp sazişin imzalanması ilə bağlı tarix də açıqlayıb: "İnanıram ki, bu həftə sonu və ya bazar ertəsi günü İranla razılaşma imzalaya bilərik".
Digər tərəfdən, Tramp, İran mətbuatında Tehranın müqavilədən sonra dondurulmuş vəsaitlərinə çıxışı olacağına dair xəbərlərlə bağlı İran administrasiyasına təpkilərini çatdırdıqlarını, İran tərəfinin isə buna görə üzr istədiyini iddia edib.
ABŞ tərəfinin "razılaşma" açıqlamalarından sonra İran dövlət televiziyasına danışan İranın xarici işlər naziri Abbas Əraqçi, tərəflər arasında üzərində işlənən saziş mətninin yaxın bir neçə gün ərzində rəqəmsal şəkildə imzalana biləcəyini deyib.
Prosesin hələ tamamlanmadığını bildirən Əraqçi, saziş layihəsindəki bəndlərin icrasının yekun razılaşma üçün vacib şərt olduğunu vurğulayıb. İranlı nazir bildirib ki, bu öhdəliklər yerinə yetirilməsə, hərtərəfli razılaşmaya dair danışıqlar irəliləməyəcək.
Nüvə proqramına da toxunan Ərakçi, İranın 60% zənginləşdirilmiş uranın gələcəyi ilə bağlı müzakirələrə yanaşmasını açıqlayıb. O, bildirib ki, bu məsələdə həll yolu materialın İran sərhədləri daxilində zəiflədilməsindədir.
Hörmüz boğazının statusu məsəsləsinə gəlincə Ərakçi, boğazın idarə olunması ilə bağlı Omanla danışıqlar apardıqlarını bildirib. Hörmüz boğazının həm İran, həm də Omanın suverenliyi altında olduğunu vurğulayan nazir, gələcək inzibati strukturun keçmiş təcrübələrdən fərqli ola biləcəyini deyib.
İranın xaricdəki dondurulmuş aktivləri ilə bağlı bir mexanizmin nəzərdə tutulduğunu da bildirən Əraqçi, danışıqlar prosesinə qarşı çıxan qrupların olduğunu da deyib. İsrailin bu qrupların ön sıralarında olduğunu iddia edən İran naziri, mətbuatda dərc olunan bəzi razılaşma mətnlərinin isə həqiqəti əks etdirmədiyini bildirib.
Ərakçi İranın xarici təzyiqlər səbəbindən geri çəkilməyəcəyini bildirərək, anlaşma memorandumunun şərtlərinin yerinə yetirilməsinin prosesin gələcəyi üçün həlledici olacağını vurğulayıb.
Bu arada, "Bloomberg" yüksək səviyyəli mənbələrə istinadən, yekun razılaşmadan əvvəl ABŞ və İran arasında anlaşma memorandumunun əldə edilə biləcəyini bildirib. Məlumata görə, bu sənədin iyunun 14-də İsveçrənin Cenevrə şəhərində imzalanması planlaşdırılır və bundan sonra prosesin ikinci mərhələsi başlayacaq. Məlumatda həmçinin bəzi mənbələrə istinadən imzalanma mərasimi üçün seçimlər arasında Avstriyanın paytaxtı Vyananın da olduğu bildirilir.
Tahir TAĞIYEV
