Sızlar yada düşəndə ürəyimin telləri, O mehriban, o təmiz tələbəlik illəri. (Çox sevilən bəstəçi mahnısı)
Adətən hər kəsin (dostun, tanışın, qohumun, iş yoldaşlarının, məktəbli yoldaşlarının, özəlliklə tələbə yoldaşlarının) haqqında bir yazı yazarkən ilk tanışlıqdan, bu tanışlığın tarixçəsindən başlanır yazılar. Sizin nəzərinizə çatdırılan bu yazının ən möhtəşəm cəhəti yazan və haqqında yazılan şəxsin hər ikisi yaşının IX onilliyinin son mərhələsini yaşayan (düz 85 yaşını bitirib sonrakı yaşını yaşayan) ağsaqqalların söhbəti olmasıdır. Mən haqqında qələmə aldığım bu yazının personası Eldar Hüseynqulu oğlu Məmmədovu (hazırki Məmmədbəyli) 1960-cı ildən tanıyıram. Düz 66 il bundan əvvəl biz Azərbaycan Tibb İnstitutunun (indiki Azərbaycan Tibb Universitetinin) əczaçılıq fakültəsinə qəbul olunmuşuq və 5 il müddətində bir qrupda təhsil almışıq.
Son 20 il ərzində həmişə sıx əlaqə saxlamışıq. Demək olar ki, bütün bayram günlərində və digər tədbirlər zamanı mütləq şəkildə zəngləşib hal-əhval tutmuşuq. Nəhayət 20 il əvvəlki görüşümüzü nəzərə almasaq 02.02.2026-cı ildə – 66 ildən sonra iki tələbə yoldaşı, iki qardaş görüşə bildik. Görüşümüzün soyuq havada baş tutmasına baxmayaraq çox sıcaq oldu. Bir-birimizin iş, ailə məsələləri və həyatımızda baş verən əhvalatlarla yaxından tanış olduq.
Fikir verirsinizmi, uzun illər müddətində görüşmək istədiyimiz bu zaman 2026-cı ilin böyük çiləsinin sonuncu gününə düşmüşdü. Bununla yanaşı müdəqqəs Ramazan ayı, orucluq başlanmışdı. Qışın ən soyuq vaxtında görüşdük. Bizim sevincimiz o qədər yüksək idi ki, heç nə hiss etmədən söhbətimiz davam edirdi. Zamanın necə keçdiyini hiss etmirdik.
Əziz oxucu sizə zarafat gəlməsin, bu Allahın verdiyi uzun ömrün 85 ilini başa çatdıran iki ağsaqqal tələbə yoldaşlarının görüşü. Xatirələr bizi çox uzaqlara aparırdı... Kimdir Azərbaycanın uzaq dağlıq rayonunda, Gədəbəydə doğulub boya-başa çatmış dünya şöhrətli alim, sadə insan Eldar müəllim?! Xatirələrimiz varaqlanır... Gör, nə qədər dəyişiklik, yeniliklər görmüşük, neçə-neçə sevimli, bəzən kədərli günlərimiz olub.
Eldar müəllim sadə, sadə olduğu kimi səmimi, səmimi olduğu kimi prinsipial idi. Sakit, az danışan olduğu halda çox mehriban, yoldaşlarına qarşı təvazökar idi. Eldar müəllimin prinsipiallığı nədə idi? Yaşam dövründə baş verən bütün məsələlərdə haqlı tərəfi müdafiə edirdi, artıq birinci kursdan sonra onun millətini, vətənini sevən bir tələbə olduğunu hamı hiss edirdi. Ermənilərdən, ruslardan xoşu gəlmirdi, rus bölməsinin tələbələri ilə həmişə mübahisə edirdi.
Hava getdikcə soyuyurdu, biz isə buna fikir vermədən söhbətimizə davam edirdik. Mən söhbətimiz zamanı onun yadına komsomol məsələsi xatırladarkən? hər ikimiz bərkdən güldük. O, institutda yeganə adam idi ki, komsomolun üzvü deyildi. Fakültə iclaslarının birində dekan mənə tapşırdı ki, Eldarı komsomola qəbul edin. O zaman mən qrup və İnstitutun komsomol komitəsində nümayəndə idim. O komsomolda olmaq istəmədiyini dedikdə təbii ki, bu məsələ elə orda da qaldı.
Sonradan onu İnstitutun komsomol komitəsinə dəvət edib, təşkilatın üzvü olmağını tələb etmişdirlər. Lakin bu təşəbbüs də nəticəsiz qalmışdı.
Həmişə söhbətlərində perspektivdə elmlə məşğul olacağını deyirdi. Mən professorun bu müdrik yaşında necə də yaddaşını qoruyub saxlaya bildiyini hiss etdim. Bu yaddaşın nəticəsidir ki, o keçən hadisələrin hamısını olduğu kimi danışması, dəqiq yadında qalması məni heyrətləndirirdi.
Onda olan vətənpərvərlik, millətinə qarşı sevgi, türk olması ilə fəxr edən bir doğma qardaş, yaxın dost kimi yenidən doğmalaşdıq. Onu da qeyd etmək istəyirəm ki, görüşə gələrkən özü ilə gətirdiyi elmi kitabdan başqa dövrü mətbuatda dərc olunan bədii yazılarını da mənə verdi. Bu hədiyyələrin arasında professorun həyat və yaradıcılığna həsr olunmuş 400 səhifəlik biblioqrafik kitab da var idi.
Bu kitab məni çox maraqlandırdı, ayrılandan sonra evə gələndə tələsik kitabla tanış olmağa başladım. Birdən onun 85 illik yubileyinə həsr olunmuş təzə kitabının yaxın zamanlarda dərc olunacağını xatırladım. Tez ona zəng edib: Yeni kitabda sənin haqqında xatirələrimi yazmağa etiraz etməzsən ki? O gülə-gülə dedi ki, sən nə danışırsan. Əlbəttə bu mənim üçün ən böyük hədiyyə və hörmət olardı. Buyurun top sizdədir”. Mən yavaş-yavaş sizə təqdim olunan yazını tərtib etməyə başladım.
Öz istedadı, peşəkar qabiliyyəti ilə kimya sahəsində dünya şöhrətli alim olan Eldar müəllim elmi dərəcə aldığı zaman zarafatla demişdim ki, bilsəydim məmnuniyyətlə sənin aspirantın olardım.
Eldar müəllim təkcə alim kimi yox, sadiq dost kimi, gözəl ailə başçısı kimi, mehriban ata kimi, vəfalı həyat yoldaşı kimi, sevimli müəllim kimi, təəssübkeş qohum kimi hamının rəğbətini, məhəbbətini qazanan duyğu yüklü şairdir.
Əziz dostum, mehriban qardaşım Eldar müəllimi 85 illik yuibileyi münasibəti ilə ürəkdən təbrik edir, ona cansağlığı, həyatında və yaradıcılığında yeni-yeni uğurlar arzulayıram!
Hacı Əli QASIMOV Provizor
