Məhəmməd Əsədullazadə: “Lavrov belə açıqlama ilə çıxış etməklə hansı qüvvələrin yanında olduğunu göstərir”
Ermənistandakı hadisələr ölkənin daxili işi olsa da, kilsəyə edilən hücumlar ciddi narahatlıq doğurur. Bunu Rusiya xarici işlər naziri Sergey Lavrov bildirib.
“Şübhəsiz ki, min illik tarixi olan Erməni Apostol Kilsəsinə hücumlar ciddi narahatlıq doğurur. Kilsə həmişə erməni cəmiyyətinin əsas dayaqlarından biri olub və biz istəmərik ki, bu kilsə heç bir ciddi əsas olmadan hücumlara məruz qalsın. Biz vəziyyətin ən qısa zamanda Ermənistan Konstitusiyasına uyğun, dindarların hüquqlarına tam hörmətlə həll olunmasını istəyirik”, - deyə nazir vurğulayıb.
Bu, təkcə başqa ölkənin daxili işinə qarışmaq deyil. Lavrovun bu açıqlaması əslində Rusiya tərəfindən rəsmi etirafdır ki, onlar kilsənin və revanşist müxalifətin arxasındadırlar.
“Fikrimcə, bütün bunlar iki ölkə arasında münasibətləri daha da kəskinləşdirəcək”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, Ermənistanda gedən siyasi proseslər, hakimiyyətlə kilsə arasında yaşanan böhran ilk növbədə bu ölkənin daxili işidir: “Baş nazir Nikol Paşinyan çalışır ki, Ermənistanda gedən proseslərdə öz mövqelərini gücləndirsin. Qarşıdurmadan qalib olaraq çıxsın. Ancaq göründüyü kimi, Rusiya Ermənistanda yaşananlardan narahatdır. Lavrov belə açıqlama ilə çıxış etməklə hansı qüvvələrin yanında olduğunu göstərir. Çünki Rusiya həqiqətən də revanşist müxalifəti və kilsəni dəstəkləyir. Bununla Paşinyana ciddi təzyiq göstərməyə çalışırlar. Moskva görəndə ki, Paşinyan onlar üzərində müəyyən üstünlük əldə edir, bu zaman prosesə açıq müdaxilə etməyə cəhd edirlər. Lavrov açıq şəkildə kilsənin yanında olduğuna eyham vurur. Burada məqsəd aydındır. Rusiya Ermənistanı yenidən öz orbitinə daxil etməyə çalışır. Ancaq o da məlumdur ki, Rusiyanın son kartları əlindən çıxmaq üzrədir. Bütün hallarda hesab edirəm ki, Moskvanın müdaxilə cəhdləri müsbət nəticə verməyəcək. Rusiyanın həyata keçirdiyi bu siyasət başqa dövlətin daxili işinə qarışmaq anlamına gəlir. Fikrimcə, Rusiya Cənubi Qafqazda bu tərz siyasəti inkişaf etdirməklə bəzi prosesləri öz əleyhinə yönəldir. Proseslərin bu yöndə inkişafı isə Rusiyanın strateji baxımdan ziyanına olacaq. Ermənistan Rusiyanın təzyiqlərinə boyun əyməyəcək. Rusiya revanşistlərə dəstəyi artırdıqca, erməni cəmiyyətində bu ölkəyə nifrət daha da güclənir. Fikrimcə, bütün bunlar iki ölkə arasında münasibətləri daha da kəskinləşdirəcək”.
Vidadi ORDAHALLI
