Elşad Həsənov: “Rusiya bizə qeyri-dost münasibəti sərgiləyir, bu da Rusiyanın öz ziyanınadır”
Ənənəvi olaraq Azərbaycana qarşı qeyri-dost münasibət bəsləyən Rusiyanın əsl niyyətləri hər addımda özünü göstərir. Gizlin deyil ki, Rusiya antiazərbaycan mövqeyini əsasən Federal Təhlükəsizlik Xidmətinin (FTX-“FSB”) əli ilə sərgiləyir. Azərbaycanda Rusiyanın FSB əməkdaşlarının olması barədə əvvəllər də az-çox deyilib.
İyunun 30-da Azərbaycan DİN-in “Sputnik Azərbaycan”da apardığı əməliyyat tədbirləri zamanı əslində FSB əməkdaşları olan və saytda baş redaktor kimi fəaliyyət göstərən İqor Kartavıx və şef redaktor postunu tutan Yevgeniy Belousov saxlanıldı.
Rusiyanın FSB əməkdaşlarının Azərbaycan ərazisində jurnalist adı altında fəaliyyət göstərdiyi özünü bir daha təsdiqlədi.
Qeyd edək ki, 38 yaşlı İqor Kartavıx Orenburq vilayətindəndir. 2011-ci ildən “RİA Novosti”də, daha sonra isə “Rossiə seqodnə” agentliyində çalışıb. Məlumata görə, o, son iki ildə 6 milyon rubl (təxminən 77 min dollar) gəlir əldə edib.
33 yaşlı Yevgeni Belousov isə Moskvadandır. 2000-ci illərdən etibarən hərbi memorial strukturlarında çalışıb, daha sonra “Rossiə” telekanalında və “Rossiə seqodnə”da fəaliyyətini davam etdirib. Onun iki illik qazancı isə 2,8 milyon rubl (təxminən 36 min dollar) olub.
Hazırda hər iki şəxs Azərbaycan hüquq-mühafizə orqanlarının nəzarəti altındadır və onlara qarşı istintaq tədbirləri davam etdirilir.
Gördüyümüz kimi, "Spitnik Azərbaycan" da vəzifə tutan və əslində Rusiyanın FSB casusları olan insanlar tutuldu.
Rusiya tərəfi isə FSB-çilərin saxlanılmasını Bakının “qeyri-dost” hərəkəti kimi xarakterizə edib. Əslində isə Rusiya özü son dövrlər bizə qarşı “qeyri-dost” münasibətini hər addımda göstərir.
Rusiya bizə dost ölkədirsə, o zaman burada onun kəşfiyyatçıları nə gəzir? FSB əməkdaşlarının Azərbaycanda nə işi var?
“Azərbaycanda FSB əməkdaşlarının “jurnalist” adı altında fəaliyyəti bu ölkənin…”
Siyasi ekspert Elşad Həsənov “Bakı-Xəbər”ə bildirdi ki, Rusiya dövləti Rusiya-Ukrayna müharibəsi başlayandan sonra başını itirib. E.Həsənov qeyd etdi ki, ona qardaş olan xalqa qarşı müharibə aparan, torpaqlarını işğal edib insanlarını məhv edən bir ölkənin yürütdüyü siyasət dünyada qəbul olunmur və bütün dünya Rusiyanın apardığı siyasətin, təcavüzkar müharibənin əleyhinədir.
Rusiyaya qarşı 18-ci sanksiyanın hazırlandığını deyən müsahibimiz bildirdi ki, Rusiyanın Qərblə təmasları tamamilə kəsilib.
“Rusiya böyük və çoxmillətli ölkədir. Orda yaşayan digər millətlərə ruslar ikinci “sort” xalq kimi baxır, miqrantları adam yerinə saymırlar. Rusiyanın bu siyasətinin nəticəsidir ki, bu ölkədə tez-tez miqrantlara qarşı müxtəlif “tədbirlər” görülür, onlara cəzalar verilir, onlar aşağılanır, onları küçənin ortasında tutub müharibəyə aparırlar. Qeyri-millətlərə basqınlar edilir, qazandıqları pullar əllərindən alınır. Bu, Rusiya siyasətinin nümunələrindən biridir. Rusiya MDB ölkələrinə də öz “vassalları” kimi baxır, imperiya təkəbbürü ilə yanaşır.
Azərbaycan öz torpaqlarını işğaldan azad etdi, ərazi bütövlüyünü, suverenliyini bərpa etdi, öz qürurunu qaytardı. Azərbaycan öz milli dövlət maraqlarını hər şeydən üstün tutur. Keçən il dekabrın 25-də Rusiya səmasında vurulan Azərbaycanın mülki təyyarəsi ilə bağlı Azərbaycan Prezidentinin göstərdiyi qətiyyəti ruslar gözləmirdi. Çünki Rusiyadan heç kəs belə hesabat istəməmişdi, heç nə tələb etməmişdi, amma Azərbaycan Prezidenti milli dövlətçilik maraqlarından çıxış edərək bizim təyyarəni vuranların cəzalandırılmasını, təzminat ödənilməsini və bu hadisəyə görə yüksək səviyyədə üzr istənilməsini tələb etdi. Bu tələb isə Rusiyanın rəhbərliyinin, siyasi dairələrinin “çestinə” dəydi. Ondan sonra da münasibətlər soyumağa başladı. Baxmayaraq ki, Rusiyadan Valentina Matviyenko və II Kiril Azərbaycana gəldilər və Azərbaycan Prezidentini faşizm üzərində qələbənin 80 illiyinə dəvət etsələr də, İlham Əliyev irəli sürülən tələblər yerinə yetirilmədiyinə görə Moskvaya getmədi.
Azərbaycanda 340-dan çox rus dilində tədris həyata keçirən məktəb var, ali məktəblərdə rus bölmələri mövcuddur. Azərbaycanda yaşayan digər xalqlar da çox tolerant şəkildə yaxşı yaşayırlar. Heç kəs deyə bilməz ki, Azərbaycanda yaşayan ruslar milli mənsubiyyətinə görə incidilib. Amma Rusiyada bu məsələlər qabarıq şəkildə özünü göstərir”.
E.Həsənov hesab edir ki, bu siyasət də gələcəkdə Rusiyanın dağılmasına səbəb olacaq, bu siyasət onun daxildən parçalanmasına gətirib çıxaracaq, çünki ruslar orda yaşayan digər xalqlara “vassal”, “kölə” kimi yanaşır. O qeyd etdi ki, bu cür yanaşma Rusiyada yaşayan digər xalqları razı sala bilməz. E.Həsənovun sözlərinə görə, artıq digər xalqlar Rusiyanın daxilində hərəkətə keçib, başqırdlar, tatarlar, uyğurlar və başqa xalqlar bununla barışa bilməz, bu xalqlar ayağa qalxaraq onların zorla müharibəyə aparılmasına etiraz ediblər.
“Sputnik Azərbaycan”da jurnalist adı altında fəaliyyət göstərən FSB əməkdaşlarının aşkarlanaraq saxlanılmasına gəlincə, E.Həsənov qeyd etdi ki, Azərbaycan hökuməti bu ilin fevral ayında “Sputnik Azərbaycan”ın bağlanması barədə qərar qəbul edib: “Ancaq buna baxmayaraq, onların “jurnalistləri” fəaliyyət göstəriblər. Gizlin deyil, bunlar hamısı Rusiya xüsusi xidmət orqanlarının əməkdaşlarıdır və Azərbaycanda pozuculuq işləri aparırlar, beynəlxalq sferada ölkəmiz barədə bədnam informasiyalar yayırlar, qərəzli fikirlər tirajlayırlar. Onlar bunu öz imzaları ilə yaymasalar da, həmin informasiyaları Rusiyaya ötürürlər, orda da bu informasiyalardan istifadə edirlər. Rusiya bu gün Azərbaycana qarşı heç nə edə bilmir. Çünki burda onun artıq heç bir dayağı yoxdur. Yalnız özünün casusları, səfirlik xəttində olan kəşfiyyatçıları, “jurnalist” adı altında fəaliyyət göstərən FSB əməkdaşları Azərbaycanda kəşfiyyat-pozuculuq işləri aparırlar. Bizim xüsusi xidmət orqanları bunların hamısını çox yaxşı bilir. Fikrimcə, bunların hər biri nəzarətdədir.
Azərbaycan onları indiyə qədər niyə həbs etməmişdi? Biz həmişə qonşu dövlətlərlə münasibətlərimizin normal olmasını istəyirik, xüsusən də Rusiya ilə. Rusiya böyük ölkədir, bizi bir-birimizə bağlayan tellər var. Ancaq Rusiyanın belə vandal hərəkətləri, təbii ki, bizdə də qıcıq doğurur. Baxmayaraq ki, Rusiya böyük dövlətdir, amma bizim də özümüzün milli maraqlarımız, milli qürurumuz var, belə şeylərə dözəsi deyilik. Təbii ki, biz də adekvat addımlar atmalı idik. O cavablardan biri də “Sputnik Azərbaycan”da “jurnalist” adı altında gizlənən FTX əməkdaşlarını ifşa etmək oldu, onlar saxlanıldı. Onlar icazəsiz Azərbaycanda fəaliyyət göstərirlər”.
E.Həsənov qeyd etdi ki, Rusiyanın Azərbaycana, eləcə də başqa xalqlara və dövlətlərə qarşı qeyri-dost münasibəti həmişə özünü büruzə verir. “Sputnik Azərbaycan”da işləyən FSB əməkdaşlarının həbs edilməsinin Rusiyanın ciddi reaksiyasına səbəb olduğunu deyən E.Həsənov xatırlatdı ki, hadisədən sonra Azərbaycan səfiri Rusiya XİN-ə çağrılıb. “Təbii ki, biz Rusiya ilə vəziyyəti daha da gərginləşdirmək istəmirik, ancaq bizim böyük qürurumuz, milli marağımız var. Ona görə bizim bu cavabımız onlarda tərs şapalaq effekti yaratdı.
Hesab edirəm ki, Azərbaycanın adekvat cavabı çox doğrudur, yerindədir”-deyə E.Həsənov qeyd etdi.
Azərbaycanın Rusiya ilə düşmən olmadığını deyən və bu ölkə ilə strateji müttəfiq olduğumuzu xatırladan E.Həsənov bildirdi ki, Azərbaycan müttəfiqlik müddəalarını yerinə yetirir, amma Rusiyadan bunu görmürük: “Rusiya bizə qeyri-dost münasibəti sərgiləyir, bu da Rusiyanın öz ziyanınadır. Azərbaycanda FSB əməkdaşlarının “jurnalist” adı altında fəaliyyəti bu ölkənin dost olmayan münasibətinin göstəricilərindəndir. Amma yenə deyirəm, biz Rusiyaya düşmən deyilik. Hesab edirəm ki, Rusiya öz səhvlərini başa düşəcək, bu məsələlərdən özünə nəticə çıxaracaq”-deyə E.Həsənov qeyd etdi.
İradə SARIYEVA
