Azər Həsrət: "Azərbaycan mediası, Azərbaycan jurnalistləri bu yöndə durmadan fəaliyyət göstəriblər"
Azərbaycan mətbuatı öz fəaliyyəti ilə hər zaman öndə olub, cəmiyyətə dərindən nüfuz edib, dövlət siyasətinə yaxından dəstək göstərib. Müstəqillik dövrü Azərbaycan mediasının əsas missiyalarından biri dövlətimizin ərazi bütövlüyü uğrunda həyata keçirilən milli mübarizəyə öz töhfəsini vermək olub ki, o bunu layiqincə yerinə yetirib.
Azərbaycan ərazi bütövlüyünün bərpa edilməsində, separatizmin kökünün tam kəsilməsində aparılan dövlət siyasətində Azərbaycan mediasının və jurnalistlərin tarixi rolu nə oldu? Nə kimi rol oynadılar?
Ekspertlərin fikrincə, Azərbaycan mediası həm Birinci, həm də İkinci Qarabağ müharibələrində üzərinə düşən vəzifənin öhtəsindən layiqincə gəlib, Azərbaycanın böyük Zəfərinin müjdəçisi olub.
Heş şübhəsiz, Azərbaycan həqiqətlərinin həm cəmiyyətimizə, həm də dünyaya çatdırılmasında, bu vacib məsələnin təbliği sahəsində mediamızın rolu böyükdür. Eskeprtlər qeyd edir ki, mətbuatımız və jurnalistlərimiz eyni zamanda 44 günlük Vətən müharibəsinin gedişində ölkəmizin düşmən təbliğatına qarşı informasiya mübarizəsinə töhfələrini verdiyi kimi, postmüharibə dövründə də bu işi davam etdirməkdədir.
Bu da məlumdur ki, bu böyük işlərin gerçəkləşdirilməsində ən böyük missiyanı Ali Baş Komandanın özü reallaşdırdı. Onun Vətən müharibəsi dövründə 30-dan çox beynəlxalq media qurumlarına geniş müsahibələri bu reallıqların dünya ictimaiyyətinə çatdırılmasında müstəsna rol oynadı. Azərbaycan mediası bu gün də ölkə başçısı, Silahlı Qüvvələrin Müzəffər Ali Baş Komandanı İlham Əliyevin artıq tarixə qovuşmuş Qarabağ münaqişəsi ilə bağlı səsləndirdiyi hər bir fikrin, hər bir bəyanatın, işğaldan azad edilmiş ərazilərimizdəki vəziyyət barədə həqiqətlərin ölkə və dünya ictimaiyyətinə çatdırılmasında fəal rol oynayır. Bu danılmaz bir bir həqiqətdir.
"Azərbaycanın ərazi bütövlüyünün təmin edilməsinə mediamız, media əhli də az töhfə verməyib"
Siyasi şərhçi Azər Həsrət "Bakı-Xəbər"ə bildirdi ki, Azərbaycanın müstəqillik dövründəki haqlı mübarizəsinin önündə həmişə jurnalistlər də, media da gedib. Onun sözlərinə görə, hər kəs öz sahəsində üzərinə düşən vəzifəni yerinə yetirib və media təmsilçiləri də mümkün olan platformalarda dövlətimizin və xalqımızın haqq səsini çatdırmağı bacarıblar. "Bəzilərimiz Azərbaycan həqiqətlərini dünyaya beynəlxalq dövlətlərarası təşkilatların platformalarından çatdırmışıq. Məsələn, mən özüm uzun illər BMT, ATƏT, Avropa Şurası, Avropa Birliyi, NATO kimi qurumların platformalarından istifadə etmişəm. Mən özüm şəxsən bu işlə məşğul olmuşam. Eyni zamanda səsimizi çatdırmaq üçün Beynəlxalq İnsan Haqları Qeyri-Hökumət Təşkilatlarının platformalarından istifadə etmişik, dəfələrlə ermənilərlə üz-üzə gəlmişik, bu və digər şəkildə müzakirələrimiz də olub. Beynəlxalq qurumların tribunalarında onlarla sözümüzün çəp gəldiyi anlar da yaşamışıq. Bütün bunlar, əlbəttə, Azərbaycanın ərazi bütövlüyünü təmin edilməsi yönündə misqal-misqal qazanclarımız idi. Yəni demək istədiyim odur ki, Azərbaycan mediası, Azərbaycan jurnalistləri bu yöndə durmadan fəaliyyət göstəriblər. Təbii, bəzilərimiz də ölkədaxili ictimai rəyə işləyib, bu yöndə istər televiziya kanallarında, istərsə də media qurumlarımızda sözümüzü çatdırmışıq. Bəzi həmkarlarımız xarici ölkələrə köçüblər, xaricdə yaşayırlar, olduqları ölkələrdə bu işlərlə məşğuldurlar. Bütün bunlar üst-üstə gələndə Azərbaycanın ərazi bütövlüyünün təmin edilməsinə mediamız, media əhli də az töhfə verməyib. Əlbəttə, ən böyük işi Müzəffər Ali Baş Komandan İlham Əliyev başda olmaqla Azərbaycan Ordusu görüb. Bu birmənalıdır. Şəhidlərimiz, döyüşçülərimiz, qazilərimizin əməyi böyükdür "-deyə A.Həsrət bildirdi.
Bununla belə, A.Həsrət qeyd etdi ki, amma bu mərhələyə gəlib çatana qədər Azərbaycan mediasınının ayrı-ayrı fərdləri və qurumları da az iş görməyib, bu istiqamətdə üzırlərinə düşən missiyanı layiqincə yerinə yetiriblər. "Yəni alt yapını, o bazanı yaratmaq üçün, özəlliklə də Azərbaycanın haqq səsini çatdırmaq üçün mediamız, media təmsilçilərimiz çox işlər görüblər. Nəticə də göz qabağındadır. Yəni 44 günlük Vətən müharibəsində hamı müşahidə etdi ki, dünya üstümüzə o qədər də gəlmədi. Halbuki, ən adi məsələdə ermənilərin tərəfindən çıxış edirdilər, Azərbaycanı ittiham edirdilər. Amma 44 günlük savaş zamanı bizim gözlədiyimiz hücumlar olmadı. Niyə olmadı? Çünki yetərincə iş görülmüşdü, dünyaya dərdimizi anlada bilmişdik. Eyni zamanda Prezident İlham Əliyevin özü də şəxsən bu prosesdə yaxından iştirak etmişdi və etməkdədir. Yeri gəlmişkən deyim ki, Azərbaycan jurnalistləri ilə çiyin-çiyin çalışan şəxs elə məhz Prezident İlham Əliyev olub. Bu gün də elədir. Prezidentin özü də informasiya təbliğatı məsələlərində, antiazərbaycan təbliğatların alt-üst edilməsi məsələlərində hamımızdan öndə gedir"-deyə A.Həsrət bildirdi.
A.Həsrət əlavə etdi ki, həm Birinci, həm İkinci Qarabağ müharibəsində, həm də postmüharibə dövründə Azərbaycan mediası öz üzərinə düşən vəzifəni layiqincə yerinə yetirib. A.Həsrət əlavə etdi ki, məhz mediamız qələbə, Zəfər müjdəsini dünyaya çatdırdı və öz tarixi missiyasına layiq olduğunu bir daha təsdiqlədi.
İradə SARIYEVA
