Ramil Məmmədli: "Bütün bunlar 5 aprel görüşünün bilavasitə davamıdır"
Xəbər verildiyi kimi, Ermənistan-ABŞ birgə təlimlərinə start verilib. Belə ki, "Eagle Partner 2024" adlı təlimlər Ermənistanda keçirilir. Təlimlərdə Ermənistan silahlı qüvvələrinin, ABŞ Quru Qoşunlarının Avropa və Afrikadakı birliklərinin və Kanzas Milli Qvardiyasının hərbçiləri iştirak edir.
Bütövlükdə görünən odur ki, Ermənistanla təlimlər 5 aprel ABŞ-Avropa İttifaqı-Ermənistan tamaşasının davamıdır. Çünki Ermənistan özü susduğu halda, ABŞ və Fransa ermənilərin Qarabağa qayıtması məsələsini davamlı qaldırırlar. İki ölkə arasında sülh danışıqları ilə bağlı ciddi irəliləyişlərin gözlənildiyi bir şəraitdə Qərb, xüsusən də ABŞ daha çox dəxli olmayan məsələləri qabardır. Danışıqların həssas bir dönəmində Ermənistanla hərbi təlimlərə start verilir.
O baxımdan, həqiqətən də Ermənistanla təlimləri 5 aprel ABŞ-Aİ-Ermənistan tamaşasının davamı hesab etmək olarmı? Həmçinin, gizli razılaşmaların, hərbi yönümlü müzakirələrin davamı sayıla bilərmi?
"Görünən odur ki, Qərb Ermənistanı dirçəltmək, hərbi baxımdan gücləndirmək istəyir"
Sözügedən məsələyə aydınlıq gətirən hərbi ekspert Ramil Məmmədli "Bakı-Xəbər"ə açıqlamasında qeyd etdi ki, bütün bunlar 5 aprel görüşünün bilavasitə davamıdır: "Bunu əsaslandırmaq üçün də kifayət qədər əsaslar var. Bu ilin 5 aprel ABŞ-Aİ-Ermənistan üçtərəfli görüşündə məlum məsələ idi ki, təkcə iqtisadi-siyasi məsələlər müzakirə edilməyib. Həmin müzakirələrdə həm də Ermənistana hərbi yardım prioritet olub, amma bu, gizli razılaşmalar formasında olub. Hələ o zaman Azərbaycan buna etiraz etdi və bildirdi ki, üçtərəfli görüşdə Ermənistana hərbi yardımın verilməsi nəzərdə tutulub. Çox keçmədi ki, bütün bu deyilənlər özünü doğrultdu. Fransa 40-a yaxın müasir uzaqvuran "Sezar" haubitsalarının Ermənistana verilməsinə qərar verdi. Söhbət hücum silahlarından gedir. O cümlədən, digər hücum xarakterli silahların Ermənistana verilməsi sürətləndirildi. Bütün bunlar təkcə Ermənistanı Rusiyanın təsirindən çıxarmaq məqsədi daşımır. Məgər Ermənistana verilən hücum silahları Rusiyaya qarşı yönələcək? Təbii ki, yox. Ermənistanın məqsədyönlü şəkildə hərbi baxımdan himayə edilməsi, silahlandırılması Azərbaycana qarşı yönəlib. Bu baxımdan ABŞ-ın Ermənistanla birlikdə "Eagle Partner 2024" hərbi təlimlərini keçirməsi ümumi işin tərkib hissəsidir və 5 aprel görüşü ilə bilavasitə əlaqəlidir. Görünən odur ki, Qərb Ermənistanı dirçəltmək, hərbi baxımdan gücləndirmək istəyir. Strateji hədəf Rusiyanı Ermənistandan çıxarmaq olsa da, arxasında digər maraqlar da var. Onlardan biri də Ermənistanı Cənubi Qafqazda ABŞ-ın forpostuna çevirməkdir".
Vidadi ORDAHALLI
